ງານມະໂຫລານໂອລິມປິກກຳລັງດຳເນີນານແຂ່ງຂັນຢ່າງຟົດຟື້ນຢູ່ນະຄອນຫຼວງລອນດອນຂອງອັງກິດ. ໃນເວລາກໍ່ສ້າງສະໜາມກິລາຫຼັກ "ລອນດອນໂບວ" ຫຼື ຖ້ວຍລອນດອນນັ້ນ, ເຈົ້າໜ້າທີ່ອັງກິດເຄີຍກ່າວວ່າ, ຈະຈັດງານໂອລິມປິກເປັນແບບສີຂຽວ ຫຼື ອະນຸລັກສິ່ງແວດລ້ອມທີ່ສຸດ ຄື: ໃນໄລຍະຈັດງານ, ອັງກິດຈະຫຼຸດການລະບາຍກ໋າກບອນດີອ໋ອກຊິດໃຫ້ໜ້ອຍລົງ 50%. ແຕ່ລອນດອນບັນລຸເປົ້າໝາຍຕາມທີ່ໄດ້ສັນຍາໄວ້ ຄື ຈັດງານໂອລິມປິກແບບອະນຸລັກສິ່ງແວດລ້ອມທີ່ສຸດນັ້ນໄດ້ຢ່າງແທ້ຈິງແລ້ວຫຼືບໍ່? ເຖິງວ່າລອນດອນຈະໄດ້ຮັບຄວາມຍ້ອງຍໍສັນລະເສີນໃນການທຳຄວາມພະຍາຍາມເພື່ອຈັດງານໂອລິມປິກແບບສີຂຽວກໍຕາມ, ແຕ່ກໍມີຫາງສຽງສະແດງຄວາມສົງໄສແລະມີຄຳຕຳນິຕິຕຽນບໍ່ໜ້ອຍ.
ຂ່າວແຈ້ງວ່າ, ບໍລິສັດດອບເຄມີແຄວ(Dow Chemical)ແລະບໍລິສັດນ້ຳມັນເຊື້ອໄຟອັງກິດ, ເຊິ່ງເປັນຄູ່ຮ່ວມມືໃນການຈັດງານໂອລິມປິກລອນດອນ ລ້ວນແຕ່ມີປະຫວັດບໍ່ດີໃນການອະນຸລັກສິ່ງແວດລ້ອມ, ການຜູກສຳພັນແລະເປັນຄູ່ຮ່ວມມືກັບບໍລິສັດຄືແນວນີ້, ຄືວ່າເປັນການສຽດສີຕໍ່ຄຳຂວັນທີ່ວ່າ "ງານໂອລິມປິກສີຂຽວ". ພ້ອມກັນນັ້ນ, ໃນໄລຍະຈັດງານໂອລິມປິກ, ການນຳໃຊ້ພະລັງງານໝູນວຽນໄດ້ກວມອັດຕາມີພຽງແຕ່ 9% ເທົານັ້ນ, ແຕ່ອັງກິດໄດ້ຕັ້ງເປົ້າໝາຍໄວ້ວ່າໃຫ້ກວມອັດຕາ 20%. ນີ້ສະແດງໃຫ້ເຫັນວ່າ, ການນຳໃຊ້ພະລັງງານໝູນວຽນໃນຕົວຈິງໃນໄລຍະຈັດງານໂອລິມປິກ ຍັງໄກຈາກລະດັບຄາດໝາຍຫຼາຍສົມຄວນ. ສ່ວນໂຄງການໄຟຟ້າແຮງລົມທີ່ຢາກກໍ່ສ້າງຢູ່ບໍລິເວນໃກ້ກັບບ້ານໂອລິມປິກຕາມແຜນການເດີມນັ້ນ ກໍຖືກໂຈະໄວ້ຍ້ອນສາເຫດຕ່າງໆໃນຫຼາຍດ້ານ.
ຫວ່າງບໍ່ດົນມານີ້, ຂ່າວສານຝຣັ່ງ ຫຼື ຂ່າວສານອາເອັຟເປ(AFP) ກໍແຈ້ງວ່າ, ບາງບໍລິສັດທີ່ໃຫ້ການອຸປະຖຳງານໂອລິມປິກກໍມີຫຼາຍບັນຫາ, ບຸກຄົນລິເລີ່ມສີຂຽວຈົນກະທັ້ງ ຢາກຕັ້ງໃຫ້ມີ "ຫຼຽນຄຳຟອກຂຽວ" ເພື່ອເປັນກຽດໃຫ້ແກ່ຜູ້ອຸປະຖຳທີ່ຢາກປິດບັງການປະພຶດທຳລາຍສິ່ງແວດລ້ອມຂອງເຂົາເອງ. ສ່ວນບໍລິສັດດອບເຄມີແຄວເຊິ່ງເປັນບໍລິສັດຮັບໂຄສະນາສະໜາມກິລາຫຼັກຂອງງານໂອລິມປິກ ກໍແມ່ນບໍລິສັດຮັບເອົາທຸລະກິດຈາກບໍລິສັດທີ່ເກີດເຫດສິ່ງເຄມີຮົ່ວໄຫຼຢູ່ອິນເດຍໃນປີ 1984, ສ່ວນໂລຫະທີ່ໃຊ້ເຂົ້າໃນການຫຼໍ່ຜະລິດຫຼຽນລາງວັນຂອງງານໂອລິມປິກຄັ້ງນີ້ ກໍແມ່ນມາຈາກບໍ່ແຮ່ຂອງບໍລິສັດຣີໂອ ຕິນໂຕ(Rio Tinto) ທີ່ກຳລັງປະເຊີນໜ້າກັບການກ່າວຟ້ອງໃນຂໍ້ຫາທຳ ລາຍສິ່ງແວດລ້ອມ.
ຂ່າວແຈ້ງຕື່ມວ່າ, ຄະນະກຳມະການລັກສະນະແບບຍືນຍົງ 2012 ລອນດອນ ໄດ້ກ່າວຕຳນິຄະນະກຳມະການຈັດງານໂອລິມປິກລອນດອນໃນບາງຂໍ້ຕົກລົງ, ເປັນຕົ້ນແມ່ນ ສ້າງ "ຫໍຄອຍໂອລິມປິກ" ດ້ວຍເຫຼັກກ້າທາດໜັກທີ່ມີຄວາມສູງ 114,5 ແມັດ ແລະ ໜັກປະມານ 1500 ໂຕນ ທີ່ບໍ່ມີຄວາມໝາຍແຕ່ຢ່າງໃດ; ໄດ້ຕຳນິຄະນະກຳມະການຈັດງານໂອລິມປິກລອນດອນທີ່ອະນຸຍາດໃຫ້ຜະລິດຢາງພຼາສະຕິກນັບເປັນພັນເປັນໝື່ນໂຕນ, ສ່ວນສາຍຜະລິດສິນຄ້າເຫຼົ່ານີ້ບໍ່ສາມາດຮັບປະກັນການອະນຸລັກສິ່ງແວດລ້ອມໃນການຜະລິດແລະສະໜອງຜະລິດຕະພັນ.
ນອກນີ້, ກ່ອນຈະຈັດງານໂອລິມປິກ, ໂຄສົກພາກສ່ວນອຸຕຸນິຍົມລອນດອນກໍກ່າວວ່າ, ເຖິງວ່າໃນ 3 ເດືອນຜ່ານມາຢູ່ອັງກິດມີຝົນຕົກເລື້ອຍໆແລະໄດ້ເຮັດໃຫ້ອາກາດຂອງທົ່ວນະຄອນຫຼວງລອນດອນສະອາດຂຶ້ນໃນລະດັບໃດໜຶ່ງກໍຕາມ, ແຕ່ກໍຍາກທີ່ຮັບປະກັນໄດ້ວ່າ ລອນດອນຈະບໍ່ຖືກຜົນກະທົບຈາກມົນລະພິດທາງອາກາດໃນໄລຍະຈັດງານໂອລິມປິກ.
© China Radio International.CRI. All Rights Reserved. 16A Shijingshan Road, Beijing, China. 100040 |