ຕາມຂ່າວCRI, ມາຮອດວັນທີ9ສິງຫາຕາມເວລາລອນດອນ, ການແຂ່ງຂັນກິລາປະເພດຕ່າງໆຂອງງານໂອລິມປິກຍັງເຫຼືອພຽງແຕ່4ວັນເທົ່ານັ້ນ. ໃນມື້ນັ້ນ, ນັກກິລາຈີນຊິງໄດ້ຫຼຽນຄຳ1ຫຼຽນແລະຫຼຽນເງິນ2ຫຼຽນ, ສ່ວນຄະນະນັກກິລາອາເມລິກາຊິງໄດ້ຫຼຽນຄຳ5ຫຼຽນ, ແລະໄດ້ລື່ນກາຍຈີນເປັນອັນດັບ1ໃນຕາຕະລາງສະຫຼຸບຫຼຽນດ້ວຍຫຼຽນຄຳ39ຫຼຽນ, ຈີນລົງເປັນອັນດັບທີສອງ. ມາຮອດວັນທີ9ສິງຫານີ້, ມີ80ປະເທດແລະເຂດແຄວ້ນຊິງໄດ້ຫຼຽນລາງວັນແລ້ວແລະໃນນັ້ນມີ43ປະເທດແລະເຂດແຄວ້ນຊິງໄດ້ຫຼຽນຄຳ.
ອະທິບາຍຮູບ: ໃນການແຂ່ງຂັນໂດດນ້ຳຈາກແທ່ນສູງ10ແມັດເພດຍິງດ່ຽວຮອບຊິງຊະນະເລີດຂອງງານໂອລິມປິກລອນດອນ, ນາງເສິນຢົ້ວລິນ ແຊມປຽນເກົ່າໃນຄັ້ງຜ່ານມາສາມາດຊິງໄດ້ຫຼຽນຄຳອີກເທື່ອໃໝ່, ສາມາດປ້ອງກັນແຊມໃນລາຍການນີ້ໄວ້ໄດ້ດ້ວຍຄະແນນສູງກວ່າຄູ່ແຂ່ງຢ່າງຖ້ວມທົ້ນ, ນີ້ກໍແມ່ນຫຼຽນຄຳຫຼຽນທີ200ຂອງຄະນະນັກກິລາຈີນທີ່ຊິງໄດ້ໃນງານໂອລິມປິກລະດູຮ້ອນ. ນັກກິລາອົສຕຼາລີຊິງໄດ້ຫຼຽນເງິນແລະນັກກິລາມະເລເຊຍຊິງໄດ້ຫຼຽນທອງ.
ໃນການແຂ່ງຂັນມວຍສາກົນສະໝັກຫຼິ້ນເພດຍິງລຸ້ນ51ກິໂລຮອບຊິງຊະນະເລີດ, ນາງເຢິນຊານຊານ ແຊມປຽນໂລກຂອງຈີນເສຍໃຫ້ນາງອາດາມສ ນີໂຄລາ ນັກກິລາເດັ່ນຂອງອັງກິດດ້ວຍຜົນແຂ່ງຂັນ7ຕໍ່16ຄະແນນ, ໄດ້ຫຼຽນເງິນ, ນາງອາດາມສ໌ໄດ້ຫຼຽນຄຳເຊິ່ງເປັນຫຼຽນຄຳທຳອິດໃນການແຂ່ງຂັນມວຍສາກົນສະໝັກຫຼິ້ນພດຍິງໃນປະຫວັດງານໂອລິມປິກ.
ໃນການແຂ່ງຂັນແລ່ນໄວ200ແມັດເພດຊາຍ, ແມ່ນນັກກິລາຈາກຈາໄມກາໄດ້ທັງຫຼຽນຄຳ, ຫຼຽນເງິນແລະຫຼຽນທອງ. ໃນນັ້ນ, ທ້າວໂບລທ໌ ອູເຊນ ປ້ອງກັນແຊມໄວ້ໄດ້ດ້ວຍຜົນງານ19ວິນາທີ32ລິບດາ, ກາຍເປັນນັກກິລາຜູ້ທຳອິດໃນປະຫວັດງານໂອລິມປິກທີ່ຊິງໄດ້ຫຼຽນຄຳໃນການແຂ່ງຂັນແລ່ນໄວ100ແມັດແລະ200ແມັດເພດຊາຍໃນງານໂອລິມປິກສອງຄັ້ງລຽນຕິດ.
© China Radio International.CRI. All Rights Reserved. 16A Shijingshan Road, Beijing, China. 100040 |