ໂຄສົກກະຊວງການຕ່າງປະເທດຈີນຕອບຄຳຖາມຂອງນັກຂ່າວກ່ຽວກັບຖ້ອຍຄວາມຂອງຜູ້ນຳຍີ່ປຸ່ນທີ່ກ່ຽວພັນເຖິງເກາະຕ້ຽວອີ
ວັນທີ 24 ສິງຫານີ້, ທ່ານຫົງເຫຼີຍ, ໂຄສົກກະຊວງການຕ່າງປະເທດຈີນ ໄດ້ຕອບຄຳຖາມຂອງນັກຂ່າວ ກ່ຽວກັບຖ້ອຍຄວາມຂອງຜູ້ນຳຍີ່ປຸ່ນທີ່ກ່ຽວພັນເຖິງເກາະຕ້ຽວອີ.
ນັກຂ່າວຖາມວ່າ, ໃນງານຖະແຫຼງຂ່າວທີ່ຈັດຂຶ້ນໃນວັນທີ 24 ສິງຫານີ້, ທ່ານໂຢຊີຮີໂກ ໂນດາ, ນາຍົກລັດຖະມົນຕີ ຍີ່ປຸ່ນກ່າວວ່າ, ເມື່ອປີ 1895, ລັດຖະບານເມຈິຍີ່ປຸ່ນໄດ້ຈັດເອົາເກາະຕ້ຽວອີເຂົ້າໃນແຜ່ນດິນຂອງປະເທດຍີ່ປຸ່ນ, ເກາະຕ້ຽວອີບໍ່ມີບັນຫາທີ່ວ່າແມ່ນຂອງປະເທດໃດ. ຕໍ່ເລື່ອງນີ້, ຈີນມີການຕອບໂຕ້ແນວໃດແດ່?
ທ່ານຫົງເຫຼີຍ ກ່າວວ່າ, ພວກຂ້າພະເຈົ້າສະແດງຄວາມບໍ່ພໍໃຈຢ່າງແຮງກ້າຕໍ່ຜູ້ນຳ ຍີ່ປຸ່ນທີ່ຫວ່ານຖ້ອຍຄວາມທຳລາຍອະທິປະໄຕເໜືອແຜ່ນດິນຂອງຈີນຢ່າງເປີດເຜີຍ.
ທ່ານກ່າວວ່າ, ເກາະຕ້ຽວອີ ແລະເກາະດອນຢູ່ອ້ອມຂ້າງ ແມ່ນດິນແດນຂອງຈີນມາແຕ່ບູຮານ, ແມ່ນຄົນຈີນຄົ້ນພົບ, ຕັ້ງຊື່ ແລະ ພັດທະນານຳໃຊ້ກ່ອນໝູ່. ແຕ່ຍີ່ປຸ່ນພັດແມ່ນຮຽກອະທິປະໄຕເໜືອເກາະຕ້ຽວອີໃນໄລຍະສົງຄາມເຈຍອູເມື່ອປີ 1895, ແລະຍຶດເອົາເກາະດອນເຫຼົ່ານີ້ໃນຊ່ອງທາງຜິດກົດໝາຍ.
ເມື່ອວັນທີ 1 ທັນວາ 1943, ປະມຸກລັດຂອງຈີນ, ອາເມລິກາ ແລະ ອັງກິດ ໄດ້ອອກ "ຖະແຫຼງການເລີແກ" ໂດຍລະບຸວ່າ, ຍີ່ປຸ່ນຕ້ອງມອບດິນແດນທີ່ຍຶດເອົາຈາກຈີນ, ເຊິ່ງລວມທັງພາກຕາເວັນອອກສຽງເໜືອ, ເກາະໄຕ້ຫວັນ ແລະ ເກາະເຜິງຮູ ແລະເກາະ ດອນຕ່າງໆຢູ່ອ້ອມຂ້າງຄືນໃຫ້ຈີນໝົດ. ວັນທີ 26 ກໍລະກົດ 1945, ປະມຸກລັດຂອງຈີນ, ອາເມລິກາ ແລະ ອັງກິດ ໄດ້ອອກ "ຖະແຫຼງການໂປທ໌ສະດຳ" ໂດຍລະບຸວ່າ, ຂໍ້ມາດຕາໃນຖະແຫຼງການເລີແກຄົງຈະໄດ້ຮັບການປະຕິບັດຕົວຈິງ. ເດືອນສິງຫາ 1945, ຍີ່ປຸ່ນຍອມຮັບຖະແຫຼງການໂປທ໌ສະດຳ, ແລະປະກາດຍອມຈຳນົນໂດຍບໍ່ມີເງື່ອນໄຂ, ນີ້ໝາຍ ຄວາມວ່າ ຍີ່ປຸ່ນຕ້ອງມອບເກາະໄຕ້ຫວັນ, ເກາະຕ້ຽວອີ ແລະ ເກາະດອນຢູ່ອ້ອມຂ້າງຄືນໃຫ້ຈີນ.
