ລັດຖະມົນຕີວ່າການກະຊວງປ້ອງກັນປະເທດຈີນ-ລາວພົບປະກັນ
ວັນທີ7ກັນຍານີ້, ຢູ່ທີ່ນະຄອນຫຼວງວຽງຈັນ, ທ່ານພົນເອກ ລຽງກ່ວງເລ້ຍ, ທີ່ປຶກສາແຫ່ງລັດຈີນ, ທັງເປັນລັດຖະມົນຕີວ່າການກະຊວງປ້ອງກັນປະເທດຈີນໄດ້ພົບປະກັບທ່ານພົນໂທ ດວງໃຈ ພິຈິດ, ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງປ້ອງກັນປະເທດລາວ. ສອງຝ່າຍໄດ້ແລກປ່ຽນຄຳຄິດຄຳເຫັນຢ່າງເລິກເຊິ່ງກ່ຽວກັບບັນຫາຕ່າງໆ, ເຊັ່ນ, ການພົວພັນສອງລັດແລະສອງກອງທັບ, ສະຖານະການຄວາມປອດໄພຂອງສາກົນກໍ່ຄືຂອງພາກພື້ນ ແລະອື່ນໆ, ແລະໄດ້ຕົກລົງຄວາມເຫັນເປັນເອກະພາບກັນຢ່າງກວ້າງຂວາງ.
ທ່ານພົນເອກ ລຽງກ່ວງເລ້ຍ ກ່າວວ່າ, ຈີນແລະລາວເປັນປະເທດບ້ານໃກ້ເຮືອນຄຽງທີ່ມີໄມຕີຈິດມິດຕະພາບຕໍ່ກັນແລະມີພູຜາແມ່ນ້ຳຕິດຈອດກັນ. ແຕ່ການສ້າງຕັ້ງສາຍພົວພັນທາງການທູດເປັນເວລາ 50 ກວ່າປີເປັນຕົ້ນມາ, ການຮ່ວມມືໃນຂົງເຂດຕ່າງໆກໍໄດ້ຂະຫຍາຍກວ້າງອອກແລະກ້າວສູ່ລວງເລິກຢ່າງບໍ່ຢຸດຢັ້ງ. ໂດຍສະເພາະໃນຊຸມປີມໍ່ໆມານີ້, ສອງກອງທັບໄດ້ດຳເນີນການແລກປ່ຽນແລະການຮ່ວມມືທີ່ມີປະສິດທິຜົນຢ່າງຫຼວງຫຼາຍໃນຂົງເຂດຕ່າງໆ, ເຊັ່ນ, ຄະນະນຳລະດັບສູງຢ້ຽມຢາມເຊິ່ງກັນແລະກັນ, ການອົບຮົມບຸກຄະລາກອນ, ການກໍ່ສ້າງໂຮງຮຽນ, ການຄຸ້ມຄອງວຽກງານປ້ອງກັນຊາຍແດນ, ຄວາມໝັ້ນຄົງຂອງພາກພື້ນດັ່ງນີ້ເປັນຕົ້ນ, ເຊິ່ງໄດ້ຊຸກຍູ້ໃຫ້ການພົວພັນສອງປະເທດຂະຫຍາຍຕົວຢ່າງຮອບດ້ານ. ພາຍໃຕ້ສະພາບການໃໝ່ທີ່ສະຖານະການສາກົນກໍ່ຄືພາກພື້ນເກີດມີການປ່ຽນແປງຢ່າງເລິກເຊິ່ງແລະສັບສົນນັ້ນ, ຈີນຍິນດີຮ່ວມມືກັບຝ່າຍລາວ ເພີ່ມທະວີການແລກປ່ຽນດ້ານຍຸດທະສາດ, ຂະຫຍາຍການຮ່ວມມືແບບຕ່າງຝ່າຍຕ່າງມີຜົນປະໂຫຍດໃຫ້ກ້າວສູ່ລວງເລິກ, ຊຸກຍູ້ໃຫ້ສາຍພົວພັນສອງລັດແລະສອງກອງທັບຂະຫຍາຍໄປໜ້າຢ່າງບໍ່ຢຸດຢັ້ງ.
ທ່ານພົນໂທ ດວງໃຈ ພິຈິດ ກ່າວວ່າ, ສອງປະເທດລາວຈີນມີມິດຕະພາບອັນເປັນມູນເຊື້ອຢ່າງແໜ້ນໜາ, ແຕ່ດົນນານມານີ້, ສອງຝ່າຍເຄົາລົບເຊິ່ງກັນແລະກັນ, ປະຕິບັດຕໍ່ກັນຢ່າງສະເໝີພາບກັນ. ຝ່າຍລາວຂອບໃຈນຳຝ່າຍຈີນທີ່ໃຫ້ການສະໜັບສະໜູນແລະການຊ່ວຍເຫຼືອຢ່າງຫຼວງຫຼາຍໃນການສ້າງສາປະເທດແລະກອງທັບປະຊາຊົນລາວ, ລາວໃຫ້ຄວາມສຳຄັນຫຼາຍຕໍ່ການພົວພັນກັບຈີນ, ຍິນດີເພີ່ມທະວີການແລກປ່ຽນແລະການຮ່ວມມືກັບຈີນຕື່ມອີກ, ທຳຄວາມພະຍາຍາມຢ່າງຕັ້ງໜ້າ ເພື່ອປົກປັກຮັກສາຜົນປະໂຫຍດຮ່ວມຂອງສອງປະເທດ ກໍ່ຄືສັນຕິພາບແລະສະຖຽນລະພາບຂອງພາກພື້ນ.
ທ່ານພົນເອກ ລຽງກ່ວງເລ້ຍ ແມ່ນເດີນທາງມາຮອດນະຄອນຫຼວງວຽງຈັນໃນວັນທີ6ກັນຍານີ້, ເລີ່ມຢ້ຽມຢາມສັນຖະວະໄມຕີຢູ່ລາວຢ່າງເປັນທາງການຕາມຄຳເຊີນຂອງ ທ່ານພົນໂທ ດວງໃຈ ພິຈິດ.
