ທ່ານ ນາຍົກລັດຖະມົນຕີຕ້ອນຮັບປະທານກຸ່ມບໍລິສັດທາງລົດໄຟຈີນຈຳກັດ
ໃນວັນທີ 11 ກັນຍາ 2012 ຢູ່ທີ່ຫ້ອງວ່າການລັດຖະບານ, ທ່ານ ທອງສິງ ທຳມະວົງ, ນາຍົກລັດຖະມົນຕີແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານລີສາງຈີ້ນ ປະທານກຸມບໍລິສັດທາງລົດໄຟຈີນຈຳກັດ ແຫ່ງ ສປ ຈີນ ແລະ ຄະນະ, ໃນໂອກາດທີ່ເດີນທາງມາຢ້ຽມຢາມ ສປປ ລາວ ເພື່ອລາຍງານສະພາບການພັດທະນາທຸລະກິດ ແລະ ລັກສະນະພິເສດເງື່ອນໄຂຍຸດທະສາດ, ການກໍ່ສ້າງຂອງໂຄງການທາງລົດໄຟລາວ-ຈີນ ແລະ ພ້ອມທັງ ໄດ້ລາຍງານວຽກງານທີ່ໄດ້ປະຕິບັດຜ່ານມາເພື່ອຊຸກຍູ້ການທາງລົດໄຟ ລາວ-ຈີນ ໃນໄລຍະກ່ອນ ແລະ ວຽກງານກະກຽມຫ້າງຫາເພື່ອລົງມືປະຕິບັດໂຄງການດັ່ງກ່າວ, ເລີ້ມແຕ່ປີ 1990 ບໍລິສັດດັ່ງກ່າວໄດ້ມາປະຕິບັດໜ້າທີ່ອອກແບບກໍ່ສ້າງພື້ນຖານໂຄງ ລ່າງຢູ່ ສປປ ລາວ ຊຶ່ງບໍລິສັດໄດ້ໃຫ້ການສະໜັບສະໜູນໂຄງການທາງລົດໄຟລາວ-ຈີນ ແລະ ໄດ້ລົງທຶນດ້ານຈໍານວນພົນ, ວັດຖຸເງິນຄຳຫລາຍພໍສົມຄວນໃນການດຳເນີນວຽກງານການປຽບ ທຽບຄັດເລືອກແບບແຜນການຖ່າຍຮູບທາງອາກາດ, ເລືອກແລວທາງລົດໄຟ, ການເຈາະຮູສຳຫລວດດ້ານທໍລະນີສາດ, ການສຳຫລວດພູມມີປະເທດ, ການຄາດຄະເນດ້ານເສດ ຖະກິດ, ການສຶກສາຄວາມເປັນໄປໄດ້, ການອອກແບບເບື້ອງຕົ້ນ, ການກະກຽມລົງມືກໍ່ສ້າງເປັນຕົ້ນຄາດວ່າໂຄງການທາງລົດໄຟລາວ- ຈີນ ຈະໄດ້ລົງມືໂດຍໄວ.
ໃນໂອກາດນີ້ ທ່ານ ນາຍົກລັດຖະມົນຕີ ທອງສິງ ທຳມະວົງ ໄດ້ສະແດງການຕ້ອນຮັບ, ຂອບໃຈ ແລະ ຊົມເຊີຍພ້ອມທັງໄດ້ຕີລາຄາສູງຕໍ່ທ່ານ ປະທານກຸມບໍລິສັດທາງລົດໄຟຈີນຈຳກັດ ແລະ ຄະນະທີ່ໄດ້ເດີນທາງມາຢ້ຽມຢາມ ແລະ ລາຍງານກ່ຽວກັບການຈັດຕັ້ງປະຕິບັດຂອງໂຄງການທາງລົດໄຟລາວ-ຈີນ ໃນຄັ້ງນີ້ເຊິ່ງເປັນການຊຸກຍູ້ສົ່ງເສີມ ແລະ ຮັດ ແໜ້ນການພົວພັນຮ່ວມມືລະຫ່ວາງ ສປປ ລາວ ແລະ ກຸ່ມບໍລິສັດທາງລົດໄຟຈີນຈຳກັດ ໄດ້ມີການຮ່ວມມືກັນຢ່າງແໜ້ນແຟ້ນຍິ່ງຂຶ້ນ ແລະ ເຮັດໃຫ້ໂຄງການດັ່ງກ່າວໄດ້ປະກົດ ຜົນເປັນຈິງ ແລະ ສຳເລັດຜົນໂດຍດີ
