ຍີ່ປຸ່ນ"ຊື້ເກາະຕ້ຽວອີໄດ້ເປັນສາເຫດ"ເຮັດໃຫ້ມວນຊົນຈີນມີປະຕິກິລິຍາຢ່າງຮຸນແຮງ
ວັນທີ 11 ກັນຍານີ້, ລັດຖະບານຍີ່ປຸ່ນ ກັບ ອັນທີ່ເອີ້ນວ່າ"ຜູ້ມີກຳມະສິດດ້ານທີ່ດິນ"ໄດ້ເຊັນສັນຍາຊື້ອັນທີ່ເອີ້ນວ່າ"ໝູ່ເກາະເຊັນຄະຄຸ" ກໍ່ຄື,ເກາະຕ້ຽວອີ ພ້ອມທັງສາມເກາະທີ່ຂຶ້ນກັບເກາະນີ້ຂອງຈີນ, ຍີ່ປຸ່ນມີເຈຕະນາທີ່ເຮັດໃຫ້ເກາະຕ້ຽວອີ"ຫັນເປັນຂອງລັດ"ດ້ວຍລາຄາ 2 ຕື້ 50 ລ້ານເຢັນ(ປະມານ 166 ລ້ານຢວນ). ເຫດການອັນທີ່ເອີ້ນວ່າ"ຊື້ເກາະ"ຂອງລັດຖະບານຍີ່ປຸ່ນເຮັດໃຫ້ປະຊາຊົນຈີນມີປະຕິກິລິຍາຢ່າງຕໍ່ເນື່ອງ ແລະ ຮຸນແຮງ. ມວນຊົນ ແລະ ຜູ້ຊ່ຽວຊານຂອງຈີນໄດ້ມີຄວາມເຫັນວ່າ,ການກະທຳທີ່"ຊື້ເກາະຫັນເປັນຂອງລັດ"ຂອງຍີ່ປຸ່ນຈະສ້າງຮອຍບາດໝາງລະຫວ່າງການພົວພັນຈີນ ກັບ ຍີ່ປຸ່ນ.
ນັບແຕ່ລັດຖະບານຍີ່ປຸ່ນປະກາດ"ຊື້"ເກາະຕ້ຽວອີ ຂອງຈີນໃນວັນທີ 10 ກັນຍານີ້ເປັນຕົ້ນມາ, ມວນຊົນແຫ່ງຕ່າງໆຂອງຈີນໄດ້ພາກັນປະທ້ວງລັດຖະບານຍີ່ປຸ່ນທີ່"ຊື້"ເກາະຕ້ຽວອີແລະເກາະທີ່ຂຶ້ນກັບເກາະນີ້. ສຳລັບຢູ່ນະຄອນຫຼວງປັກກິ່ງ, ແຂວງກວາງຕຸ້ງ ,ແຂວງສ່ານຕົ່ງ ແລະ ແຫ່ງອື່ນໆຂອງຈີນ, ມວນຊົນຈຳນວນໜຶ່ງໄດ້ໄປປະທ້ວງຢູ່ໜ້າປະຕູຂອງສະຖານທູດແລະກົງສູນຍີ່ປຸ່ນປະຈຳຈີນ. ນອກນີ້, ປະລິມານຈຳໜ່າຍສິນຄ້າຍີ່ປຸ່ນຢູ່ຈີນກໍ່ໄດ້ຫຼຸດຕ່ຳລົງ.ນັກທ່ອງທ່ຽວບາງຄົນກໍ່ເລິ່ມຖອນຕົວອອກຈາກຄະນະທ່ອງທ່ຽວ, ຍົກເລີກແຜນການທີ່ໄປທ່ຽວຍີ່ປຸ່ນ.
ເຖິງວ່າ,ມວນຊົນຂອງຈີນຈະມີຄວາມຄຽດແຄ້ນທີ່ສຸດຕໍ່ການກະທຳຂອງຝ່າຍລັດຖະບານຍີ່ປຸ່ນກໍ່ຕາມ, ແຕ່ບໍ່ໄດ້ເກີດມີເຫດການທີ່ຮຸນແຮງໃດໆ.
ກ່ຽວກັບການເຄື່ອນໄຫວ"ຊື້ເກາະ"ທີ່ຜິດກົດໝາຍຂອງຍີ່ປຸ່ນນັ້ນ, ຜູ້ນຳຂອງຈີນໄດ້ສະແດງທ່າທີໃນຫຼາຍກໍລະນີ, ແລະປະກາດຈຸດຢືນອັນໜັກແໜ້ນກ່ຽວກັບອະທິປະໄຕຂອງຈີນມາແລ້ວຫຼາຍຄັ້ງ. ຄະນະກຳມາທິການການຕ່າງປະເທດຂອງສະພາແຫ່ງຊາດຈີນ ແລະ ຄະນະກຳມາທິການການຕ່າງປະເທດຂອງສະພາປຶກສາການເມືອງແຫ່ງຊາດຈີນຕ່າງກໍ່ໄດ້ອອກຖະແຫຼງການ, ສະແດງຄວາມຄຽດແຄ້ນອັນຮຸນແຮງ ແລະ ຕຳນິຢ່າງເຄັ່ງຂຶມຕໍ່ການກະທຳ"ຊື້ເກາະ"ຂອງຍີ່ປຸ່ນ. ໃນເວລາກ່າວຄຳປາໄສຕໍ່ເລື່ອງນີ້, ທ່ານເກີງຢ້ຽນເຊີ່ງ ໂຄສົກກະຊວງປ້ອງກັນປະເທດຈີນກ່າວວ່າ, ກອງທັບຂອງຈີນກຳລັງເອົາໃຈໃສ່ຕິດຕາມສະຖານະການຢ່າງໃກ້ຊິດ, ຈຳນຳໃຊ້ສິດທິແລະມາດຕະການອັນຈຳເປັນທີ່ເຫັນວ່າເໝາະສົມ. ສະຫະພັນຊາວໜຸ່ມ ແລະ ສະຫະພັນນັກຮຽນຈີນກໍ່ກ່າວວ່າ, ຊາວໜຸ່ມ ແລະ ນັກຮຽນຊາວໜຸ່ມຂອງຈີນຄັດຄ້ານຢ່າງເດັດດ່ຽວ ແລະ ກ່າວປະນາມຢ່າງຮຸນແຮງຕໍ່ລັດຖະບານຍີ່ປຸ່ນທີ່"ຊື້"ເກາະຕ້ຽວອີ.
ສ່ວນທ່ານຫຼີກົວຊຽງ ຜູ່ຊ່ຽວຊານບັນຫາເກາະຕ້ຽວອີ, ຮອງຫົວໜ້າສູນຄົ້ນຄວ້າປະຫວັດສາດ ພູມີສາດເຂດຊາຍແດນຂອງສະພາບັນດິດວິທະຍາສາດສັງຄົມຈີນກ່າວວ່າ, ຖ້າວ່າຍີ່ປຸ່ນສືບຕໍ່ເຮັດຕາມລຳພັງໃຈ, ຈະສ້າງຜົນສະທ້ອນທາງລົບອັນຮ້າຍແຮງຕໍ່ການຂະຫຍາຍການພົວພັນລະຫວ່າງຈີນ ກັບ ຍີ່ປຸ່ນ.
