ບຸກຄົນຊົງຄຸນວຸດທິຂອງຍີ່ປຸ່ນຮຽກຮ້ອງໃຫ້ລັດຖະບານຮັບຮອງວ່າເກາະຕ້ຽວອີແມ່ນຜືນແຜ່ນດິນທີ່ມີຄວາມຂັດແຍ່ງກັນ ແລະ ສຳຫຼວດຕົນເອງຄືນກ່ຽວກັບບັນຫາປະຫວັດສາດ
ຕອນບ່າຍວັນທີ 28 ກັນຍານີ້, ຢູ່ສະໂມສອນສະມາຊິກສະພາສູງທີ່ໂຕກຽວ, ບຸກຄົນຊົງຄຸນວຸດທິຂອງຍີ່ປຸ່ນເກືອບຮ້ອຍຄົນໄດ້ອອກຖະແຫຼງການ, ໂດຍຮຽກຮ້ອງໃຫ້ລັດຖະບານຍີ່ປຸ່ນຮັບຮອງວ່າເກາະຕ້ຽວອີແມ່ນຜືນແຜ່ນດິນທີ່ມີຄວາມຂັດແຍ່ງກັນ ແລະ ສຳຫຼວດຕົນເອງຄືນກ່ຽວກັບບັນຫາປະຫວັດສາດ.
ກ່ຽວກັບບັນຫາເກາະຕ້ຽວອີ, ຖະແຫຼງການຂຽນວ່າ, ບັນຫາຜືນແຜ່ນດິນຈະແກ້ໄຂດ້ວຍວິທີອື່ນບໍ່ໄດ້ນອກຈາກຜ່ານການປຶກສາຫາລື ແລະ ເຈລະຈາກັນ. ສະນັ້ນ, ຍີ່ປຸ່ນຄວນປະຖິ້ມຄວາມຮັບຮູ້ທີ່ປັ້ນແຕ່ງຂຶ້ນທີ່ວ່າ "ບໍ່ມີບັນຫາຜືນແຜ່ນດິນ".
ຖະແຫຼງການຊີ້ອອກວ່າ, ປີນີ້ພໍດີແມ່ນການພົວພັນທາງການທູດລະຫວ່າງຍີ່ປຸ່ນຈີນ ຫັນເປັນປົກກະຕິຄົບຮອບ 40 ປີ, ກ່ອນໜ້ານີ້ໄດ້ວາງແຜນດຳເນີນຫຼາຍກິດຈະກຳມິດຕະພາບ. ແຕ່ປັດຈຸບັນ ມິດຕະພາບລະຫວ່າງສອງປະເທດໄດ້ກາຍເປັນຄວາມຂັດແຍ່ງກັນ, ສາເຫດກໍແມ່ນຍ້ອນທ່ານຊີນຕາໂຣ ອີຊີຮາຣາ, ເຈົ້າຄອງນະຄອນຫຼວງໂຕກຽວປະກາດ "ຊື້ເອົາເກາະຕ້ຽວອີ" ແລະ ລັດຖະບານຍີ່ປຸ່ນກໍຖືໂອກາດປະກາດເຂັມທິດທີ່ວ່າ "ຫັນເກາະຕ້ຽວອີເປັນຂອງລັດ". ຕໍ່ການກະທຳຂອງທ່ານຊິນຕາໂຣ ອີຊີຮາຣາ, ສຽງຕຳນິຕິຕຽນພາຍໃນປະເທດຍີ່ປຸ່ນແມ່ນອ່ອນໂພດ.
ກ່ຽວກັບບັນຫາປະຫວັດສາດ, ຖະແຫຼງການຂຽນວ່າ, ເກາະຕ້ຽວອີຖືກກຳນົດ "ເປັນດິນແດນສ່ວນໜຶ່ງຂອງຍີ່ປຸ່ນ" ໃນໄລຍະທ້າຍສົງຄາມເຈຍອູ. ໃນສົນທິສັນຍາໝາກ່ວນ, ເກາະໄຕ້ຫວັນ ແລະ ໝູ່ເກາະເຜິງຫູ ກໍກາຍເປັນເມືອງຂຶ້ນຂອງຍີ່ປຸ່ນ.
ຖະແຫຼງການຂຽນວ່າ, ສິ່ງສຳຄັນທີ່ສຸດແມ່ນຍີ່ປຸ່ນຄວນຮັບຮູ້ ແລະ ສຳຫຼວດຕົນເອງຄືນກ່ຽວກັບບັນຫາຂອງຕົນໃນປະຫວັດສາດ, ນັ້ນກໍຄື: ຮຸກຮານປະເທດໃກ້ຄຽງໃນສະໄໝມໍ່, ບັນຫານີ້ຄວນບັນລະຍາຍອອກມາຢ່າງຈິງອົກຈິງໃຈ. ຄວນເຄົາລົບ "ຖະແຫຼງການຮ່ວມຍີ່ປຸ່ນ ຈີນ" ທີ່ປະກາດໃນປີ 1972, ແລະ "ສົນທິສັນຍາສັນຕິພາບມິດຕະພາບຍີ່ປຸ່ນຈີນ" ທີ່ເຊັ່ນກັນໃນປີ 1978 ແລະເອກະສານອື່ນໆ, ສະແດງອອກເຖິງທ່າທີທີ່ຫວັງຢາກປອງດອງກັນ ແລະ ຮັດແໜ້ນໄມຕິຈິດມິດຕະພາບ ແລະ ຮ່ວມມືກັບປະເທດໃກ້ຄຽງ.
ໃນຖະແຫຼງການສະບັບນີ້ ມີປະຊາຊົນຍີ່ປຸ່ນພັນກວ່າຄົນລົງນາມສະໜັບສະໜູນ, ໃນນັ້ນລວມທັງບຸກຄົນທີ່ມີຊື່ສຽງ, ເປັນຕົ້ນແມ່ນທ່ານເກນຊາບູໂຣ ໂອໂອເອ, ຜູ້ໄດ້ຮັບລາງວັນໂນແບວສາຂາວັນນະຄະດີ.
