ກອງກຳປັ່ນລາດຕະເວນທາງທະເລຂອງຈີນຈະສືບຕໍ່ລາດຕະເວນຢູ່ນ່ານທະເລເກາະຕ້ຽວອີເພື່ອປົກປັກຮັກສາສິດອະທິປະໄຕ
ວັນທີ3ຕຸລານີ້ ທ່ານຮົງເຫຼີຍ,ໂຄສົກກະຊວງການຕ່າງປະເທດຈີນກ່າວວ່າ, ກອງກຳປັ່ນລາດຕະເວນທາງທະເລຂອງຈີນຈະສືບຕໍ່ລາດຕະເວນຢູ່ນ່ານທະເລເກາະຕ້ຽວອີເພື່ອປົກປັກຮັກສາສິດອະທິປະໄຕ.
ວັນທີ3ຕຸລານີ້,ບຸກຄົນຝ່າຍຂວາຂອງຍິ່ປຸ່ນເຂົ້າສູ່ນ່ານທະເລເກາະຕ້ຽວອີອີກຄັ້ງໜຶ່ງ, ກອງກຳປັ່ນລາດຕະເວນທາງທະເລຂອງຈີນກໍໄປລາດຕະເວນຢູ່ນ່ານທະເລເກາະຕ້ຽວອີອີກຄັ້ງໜຶ່ງເພື່ອປົກປັກຮັກສາສິດອະທິປະໄຕ.ຕໍ່ເລື່ອງນີ້,ທ່ານຮົງເຫຼີຍກ່າວວ່າ,ຈີນເດັດດ່ຽວຄັດຄ້ານບຸກຄົນຝ່າຍຂວາຂອງຍິ່ປຸ່ນເຂົ້າສູ່ນ່ານທະເລເກາະຕ້ຽວອີຢ່າງຜິດກົດໝາຍ. ພາຍໃຕ້ສະພາບປັດຈຸບັນ ໂດຍສະເພາະແມ່ນໃນເວລາຈີນແລະຍິ່ປຸ່ນກຳລັງເລັ່ງລັດປຶກສາຫາລືແລະເຈລະຈາກັນກ່ຽວກັບບັນຫາເກາະຕ້ຽວອີທີ່ມີຄວາມຂັດແຍ່ງກັນ,ບຸກຄົນຝ່າຍຂວາຂອງຍິ່ປຸ່ນທ້າທາຍເກາະຜິດຢູ່ນ່ານທະເລເກາະຕ້ຽວອີເທື່ອແລ້ວເທື່ອອີກ ເຂົາເຈົ້າມີຈຸດປະສົງຫຍັງ? ເປັນຫຍັງລັດຖະບານຍິ່ປຸ່ນປ່ອຍໄປຕາມໃຈເທື່ອແລ້ວເທື່ອອີກ? ໃນຫຼາຍປີມໍ່ໆມານີ້,ແມ່ນອິດທິກຳລັງຝ່າຍຂວາຂອງຍິ່ປຸ່ນເຈດຕະນາຢາກເອົາບັນຫາເກາະຕ້ຽວອີເປັນຂໍ້ອ້າງ,ກໍ່ເຫດການເລື້ອຍໆ, ເຮັດໃຫ້ຈີນແລະຍິ່ປຸ່ນມີຄວາມຂັດແຍ່ງກັນແລະມີການພົວພົນທີ່ເຄັ່ງຕຶງຂຶ້ນ. ເມື່ອຫວນຄືນປະຫວັດສາດ,ອິດທິກຳລັງຝ່າຍຂວາຂອງຍິ່ປຸ່ນເຄີຍຊຸກຍູ້ໃຫ້ລັດເຂົ້າສູ່ເສັ້ນທາງລັດທິຂຸນເສິກແລະເຮັດໃຫ້ຍິ່ປຸ່ນກາຍເປັນປະເທດກໍ່ສົງຄາມ,ໄດ້ສ້າງໄພພິບັດອັນໜັກໜ່ວງໃຫ້ແກ່ປະເທດແລະປະຊາຊົນໃນອາຊີ. ຄວາມຂັດແຍ່ງກັນກ່ຽວກັບເກາະຕ້ຽວອີກໍແມ່ນບັນຫາທີ່ຕົກຄ້າງໄວ້ໃນສົງຄາມບັ້ນນັ້ນ. ສິ່ງທີ່ຕ້ອງກ່າວເນັ້ນແມ່ນ,ປະຫວັດສາດແມ່ນໂຄ່ນລົ້ມບໍ່ໄດ້,ປະຕິເສດບໍ່ໄດ້,ແລະລືມບໍ່ໄດ້.ປະຊາຊົນຂອງຈີນກໍຄືຂອງບັນດາປະເທດໃນອາຊີ ຕະຫຼອດຮອດຂອງທົ່ວໂລກ,ລ້ວນແຕ່ຕ້ອງຮັກສາຄວາມລະມັດລະວັງໃນລະດັບສູງຕໍ່ຄວາມທະເຍີທະຍານຂອງອິດທິກຳລັງຝ່າຍຂວາຂອງຍິ່ປຸ່ນ.
