ປະເທດລາວເປັນອັນດັບໜຶ່ງໃນ 10 ປະເທດທີ່ມີເສດຖະກິດຂະຫຍາຍຕົວສູງໃນໂລກ
ຕາມຂ່າວCRI: ວັນທີ 16 ຕຸລານີ້, ໃນພິທີໄຂກອງປະຊຸມພາກປະຊາຊົນອາຊີເອີຣົບຄັ້ງທີ 9 ທີ່ນະຄອນຫຼວງວຽງຈັນ, ທ່ານທອງລຸນ ສີສຸລິດ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດລາວກ່າວວ່າ, ສປປລາວໄດ້ປະສົບຜົນສຳເລັດໃນການພັດທະນາໃນລະດັບດີພໍສົມຄວນ, ອັດຕາການເຕີບໂຕຂອງເສດຖະກິດບັນລຸ 8,3% ,ແລະຖືກຈັດເຂົ້າເປັນອັນດັບໜຶ່ງໃນ 10 ປະເທດທີ່ມີເສດຖະກິດຂະຫຍາຍຕົວສູງໃນໂລກ, ຈຳນວນຄອບຄົວທຸກຍາກກໍ່ຫຼຸດລົງເຫຼືອ 19%.
ປະຈຸບັນ, ລວມຍອດຜະລິດຕະພັນພາຍໃນ(GDP)ຕໍ່ຫົວຄົນໄດ້ບັນລຸປະມານ 1300ກວ່າໂດລາ/ຄົນ/ປີ.(ເຊິ່ງທຽບໃສ່ປີ 1976, ພຽງແຕ່ 75-80ໂດລາເທົ່ານັ້ນ). ນີ້ແມ່ນຍ້ອນພັກປະຊາຊົນປະຕິວັດລາວມີຄວາມມຸ້ງໝັ້ນທາງການເມືອງໃນການເອົາປະເທດລາວຫຼຸດພົ້ນອອກຈາກຄວາມທຸກຍາກ ແລະສະພາວະດ້ອຍພັດທະນາໃນປີ 2020.
