ສະພາຮັບຮອງໂຄງການການກໍ່ສ້າງທາງລົດໄຟລາວ ບໍ່ເຕັນ - ນະຄອນຫລວງວຽງຈັນ
ກອງປະຊຸມສະໄຫມວິສາມັນຂອງສະພາແຫ່ງຊາດ ຊຸດທີ VII ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 18 ຕຸລາ 2012 ທີ່ສະພາແຫ່ງຊາດ ພາຍໃຕ້ການເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ເຊິ່ງມີທ່ານຜູ້ນຳພັກ - ລັດ ບັນດາທ່ານສະມາຊິກສະພາແຫ່ງຊາດເຂົ້າຮ່ວມ. ກອງປະຊຸມສະໄຫມວິສາມັນຄັ້ງນີ້ ໄດ້ໄຂຂຶ້ນເພື່ອພິຈາລະນາ ແລະ ຕົກລົງບັນຫາສຳຄັນຂອງຊາດ ໂດຍສະເພາະສະມາຊິກສະພາແຫ່ງຊາດຈະໄດ້ສຸມໃສ່ຄົ້ນຄວ້າ ແລະພິຈາລະນາແຜນການພັດທະນາໂຄງການກໍ່ສ້າງເສັ້ນທາງລົດໄຟແຕ່ດ່ານບໍ່ເຕັນແຂວງຫລວງນ້ຳທາ ຫານະຄອນຫລວງວຽງຈັນ ເຊິ່ງລັດຖະບານໄດ້ສະເຫນີກອງປະຊຸມສະໄຫມວິສາມັນຂອງສະພາແຫ່ງຊາດ ຊຸດທີ VII ນີ້ ເພື່ອຄົ້ນຄວ້າພິຈາລະນາເພື່ອສືບຕໍ່ຈັດຕັ້ງຜັນຂະຫຍາຍຈິດໃຈເນື້ອໃນມະຕິ IX ຂອງພັກ ກ່ຽວກັບການພັດທະນາພື້ນຖານໂຄງລ່າງທາງດ້ານໂຍທາທິການ ແລະ ຂົນສົ່ງໃຫ້ສາມາດຕອບສະຫນອງຄວາມຮຽກຮ້ອງຕ້ອງການແຫ່ງການຂະຫຍາຍ ຕົວທາງດ້ານເສດຖະກິດ-ສັງຄົມທີ່ນັບມື້ເພີ່ມຂຶ້ນສູງໃນປະຈຸບັນກໍ່ຄືໃນໄລຍະຍາວເພື່ອແນໃສ່ຍົກສູງປະສິດທິຜົນຂອງການຜະລິດທຸລະກິດການເອື້ອອຳນວຍຄວາມສະດວກໃນການໄປມາຫາສູ່ຂອງປະຊາຊົນກໍ່ຄືການເຊື່ອມຈອດກັບບັນດາປະເທດໃກ້ຄຽງສ້າງປະຖົມປັດໄຈ ເພື່ອຫັນເປັນອຸດສາຫະກຳ ແລະ ທັນສະໄຫມຜ່ານການຄົ້ນຄວ້າ ແລະ ປະກອບຄຳຄິດຄຳເຫັນຢ່າງລະອຽດທີ່ຖ້ວນດ້ວຍຄວາມຮັບຜິດຊອບສູງຂອງບັນດາທ່ານສະມາຊິກສະພາແຫ່ງຊາດ. ໃນຕອນແລງຂອງວັນດຽວກັນກອງປະຊຸມສະໄຫມວິສາມັນຂອງສະພາແຫ່ງຊາດ ຊຸດທີ VII ພິຈາລະນາ ແລະ ຮັບຮອງເອົາໂຄງການກໍ່ສ້າງທາງລົດໄຟບໍ່ເຕັນແຂວງຫລວງນ້ຳທາ-ນະຄອນຫລວງວຽງຈັນ ເຊິ່ງມີຄວາມຍາວ 417,68 ກິໂລແມັດ ຄວາມໄວສູງສຸດ 160 ກິໂລແມັດຕໍ່ຊົ່ວໂມງ.
