ກອງປະຊຸມລັດຖະມົນຕີອາຊຽນຮັບຜິດຊອບວຽກງານແມ່ຍິງຄັ້ງທີ 1 ໄຂຂື້ນຢ່າງເປັນ ທາງການ
ຕາມຂ່າວ CRI: ຕອນເຊົ້າວັນທີ 19 ຕຸລານີ້, ທີ່ນະຄອນຫຼວງວຽງຈັນ, ກອງປະຊຸມ ລັດຖະມົນຕີອາຊຽນທີ່ຮັບຜິດຊອບວຽກງານແມ່ຍິງຄັ້ງທີ 1 ໄດ້ໄຂຂື້ນຢ່າງເປັນທາງການ ພາຍໄຕ້ຫົວຂໍ້ທີ່ວ່າ: "ການສົ່ງເສີມບົດບາດຍິງ-ຊາຍ ແລະການເປັນຄູ່ຮ່ວມຂອງແມ່ຍິງ ອາຊຽນເພື່ອສິ່ງແວດລ້ອມແບບຍືນຍົງ", ໂດຍການເປັນປະທານຂອງທ່ານນາງສີໄສ ລືເດດມູນສອນ, ປະທານສູນກາງສະຫະພັນແມ່ຍິງລາວ, ທ່ານສົມສະຫວາດ ເລັ່ງສະຫວັດ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ບັນດາລັດຖະມົນຕີອາຊຽນທີ່ຮັບຜິດຊອບວຽກງານແມ່ຍິງ, ແລະບັນດາແຂກຖືກເຊີນເຂົ້າຮ່ວມຢ່າງພ້ອມພຽງ.
ໃນພິທີໄຂກອງປະຊຸມ, ທ່ານສົມສະຫວາດ ເລັ່ງສະຫວັດໄດ້ຕາງໜ້າລັດຖະບານລາວກ່າວຄໍາຕ້ອນຮັບແລະສະແດງຄຳເຫັນ, ທ່ານກ່າວ່າ: ຂ້າພະເຈົ້າຕີລາຄາສູງແລະສະແດງຄວາມສັນລະເສີນຕໍ່ຄຸນງາມຄວາມດີແລະການປະກອບສ່ວນຂອງແມ່ຍິງເຂົ້າໃນການພັດທະນາຂອງແຕ່ລະປະເທດ ກໍ່ຄືໃນຄວາມກ້າວໜ້າຂອງແມ່ຍິງເອງຢ່າງສຸດອົກສຸດໃຈ. ເຊື່ອວ່າ, ຜົນສຳເລັດຂອງກອງປະຊຸມຄັ້ງນີ້ຈະເປັນການປະກອບສ່ວນຢ່າງສຳຄັນເຂົ້າໃນການສ້າງປະຊາຄົມສັງຄົມ-ວັດທະນະທຳອາຊຽນແລະການປົກປົກຮັກສາສິ່ງແວດລ້ອມແບບຍືນຍົງຂອງອາຊຽນບວກສາມ.
ກອງປະຊຸມຄັ້ງນີ້ໄດ້ດຳເນີນເປັນເວລາ 1 ວັນ, ຊຶ່ງຈະໄດ້ຮັບຟັງການລາຍງານ ຜົນຂອງກອງປະຊຸມຄະນະກໍາມະການແມ່ຍິງອາຊຽນຄັງທີ 11 ທີ່ຈັດຂື້ນໃນວັນທີ 16-17 ຕຸລານີ້, ແລະກອງປະຊຸມຄະນະກໍາມະການແມ່ຍິງອາຊຽນບວກສາມຄື: ສປ ຈີນ, ສ. ເກົາຫຼີ ແລະຍີ່ປຸ່ນທີ່ຫາກໍ່ສາເລັດໃນວັນທີ 18. ນອກນັ້ນ, ກອງປະຊຸມຍັງຈະໄດ້ຄົ້ນຄວ້າ ແລະຮັບຮອງເອົາຖະແຫຼງການວຽງຈັນກ່ຽວກັບ: "ການສົ່ງເສີມບົດບາດຍິງຊາຍແລະການເປັນຄູ່ຮ່ວມຂອງແມ່ຍິງອາຊຽນເພື່ອສິງແວດລ້ອມແບບຍືນຍົງ" ເພື່ອເປັນບ່ອນອີງໃຫ້ແກ່ ຄະນະກໍາມະການແມ່ຍິງອາຊຽນ ໄດ້ນໍາໄປຜັນຂະຫຍາຍເຂົ້າໃນວຽກງານຕົວຈິງຂອງ ແຕ່ລະປະເທດ ເພື່ອສືບຕໍ່ປະກອບສ່ວນເຂົ້າໃນການປົກປັກຮັກສາ ແລະແກ້ໄຂບັນຫາສິ່ງ ແວດລ້ອມທີ່ເຫັນວ່າເປັນສິ່ງທ້າທາຍທີ່ຈະຕ້ອງໄດ້ພ້ອມກັນຊອກວິທີແກ້ໄຂ.
