ນັກທຸລະກິດໜຸ່ມລາວກຽມໂຕຕ້ອນຮັບລາວເຂົ້າເປັນສະມາຊິກອົງການການຄ້າໂລກ(ສຽງ)
ເສັ້ນທາງກ້າວເຂົ້າສູ່ການເປັນສະມາຊິກອົງການການຄ້າໂລກຂອງ ສປປ ລາວ ຖືວ່ານັບມື້ນັບໃກ້ເຕັມທີແລ້ວ, ວັນທີ 26 ຕຸລານີ້, ສປປລາວຈະໄດ້ເຂົ້າເປັນສະມາຊິກອົງການການຄ້າໂລກຢ່າງເປັນທາງການ. ປະຈຸບັນ, ຂະແໜງການຕ່າງໆ, ແລະວິສາຫະກິດລາວຕ່າງໆໄດ້ກຽມພ້ອມເປັນແນວໃດແລ້ວ, ຂໍເຊີນທ່ານຕິດຕາມນັກຂ່າວCRI ໄປຊອກຫາຄຳຕອບຈາກ ນາງວາລີ ເວດສະພົງ ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ປະທານສະມາຄົມນັກທຸລະກິດໜຸ່ມແຫ່ງຊາດລາວ.
ຫວ່າງກ່ອນນີ້ບໍ່ດົນ, ໃນເວລາໃຫ້ສຳພາດຕໍ່ນັກຂ່າວCRI, ນາງວາລີ ເວດສະພົງກ່າວວ່າ, ການເຂົ້າເປັນສະມາຊິກWTOນັ້ນຈະເປັນກາລະໂອກາດທີ່ດີທັງຈະສ້າງສິ່ງທ້າທາຍຫຼາຍດ້ານສຳລັບນັກທຸລະກິດລາວເຊິ່ງລວມທັງນັກທຸລະກິດໜຸ່ມ. ນາງວາລີກ່າວວ່າ:
ໃນນາມສະມາຄົມນັກທຸລະກິດໜຸ່ມລາວ ພາວະທີໂລກມີການເຊື່ອມໂຍງເສດຖະ ກິດເຂົ້າຫາກັນນີ້, ເຫັນວ່າ: ມີສິ່ງທ້າທາຍ ແລະ ກາລະໂອກາດໄປພ້ອມໆກັນ ສິ່ງທີ່ທ້າທາຍກໍ່ຄືການກຽມໂຕຂອງນັກທຸລະກິດໜຸ່ມລາວນີ້ ຕ້ອງໄດ້ຍົກລະດັບລະບົບການບໍລິຫານແບບມືອາຊີບ ຊອກຫາວິທີຕິດຕໍ່ພົວພັນກັບຕ່າງປະເທດ, ພວກເຮົາຍັງມີຈຸດດ້ອຍຫຼາຍໆຢ່າງ ບໍ່ວ່າຈະເປັນກຳລັງທຶນ, ກຳລັງຄົນ ດັ່ງນັ້ນ, ບັນດານັກທຸລະກິດໜຸ່ມລາວ ຕ້ອງໄດ້ມີການຊ່ວຍເຫຼືອເຊິ່ງກັນ ແລະ ກັນ, ມີການແລກປ່ຽນທັດສະນະຄະຕິຕໍ່ກັນຂອງບັນດານັກທຸລະກິດໜຸ່ມ.
ເພື່ອເພີ່ມຄວາມສາມາດແລະຄວາມຮູ້ຂອງວົງການຕ່າງໆໃນສັງຄົມລາວເຊິ່ງລວມທັງນັກທຸລະກິດ, ລັດຖະບານໄດ້ໃຊ້ຮູບການຕ່າງໆ, ຕົວຢ່າງວ່າ, ງານສຳມະນາ,ຊຸດອົບຮົມແລະອື່ນໆ, ເພື່ອເຮັດໃຫ້ປະຊາຊົນມີຄວາມພ້ອມໃນການຕ້ອນຮັບການເຂົ້າເປັນສະມາຊິກອົງການການຄ້າໂລກ. ໃນນັ້ນ, ສະມາຄົມນັກທຸລະກິດໜຸ່ມກໍ່ມີຄວາມເປັນເຈົ້າການໃນການຊອກຮູ້ກ່ຽວກັບກະຕິກາແລະຄວາມຮູ້ທີ່ກ່ຽວຂ້ອງກັບອົງການການຄ້າໂລກ, ນາງວາລີກ່າວວ່າ:
ລັດຖະບານໄດ້ໃຫ້ນະໂຍບາຍຕໍ່ທຸລະກິດຂອງພວກເຮົາເປັນລັກສະນະລວມ , ຕົວເຮົາເອງກໍ່ຕ້ອງໄດ້ມີການຮັບມືໄປໃນໂຕ. ທ່ານຍັງໄດ້ສະແດງຄວາມຍ້ອງຍໍ ຊົມເຊີຍທັງພາກລັດຖະບານ ໂດຍສະເພາະໃນພາກສ່ວນທີ່ກ່ຽວຂ້ອງ ທີ່ໄດ້ມີຄວາມພະຍາຍາມມາຫຼາຍປີ ໃນການເຈລະຈາການເຂົ້າເປັນສະ ມາຊິກຂອງອົງການການຄ້າໂລກ ນີ້ກໍ່ເປັນຜົນງານອັນຍິ່ງໃຫຍ່ຂອງເພິ່ນ, ໃນນາມຕາງ ໜ້ານັກທຸລະກິດໜຸ່ມລາວທົ່ວປະເທດ, ຂ້າພະເຈົ້າ ຂໍສະໜັບສະໜູນໃນການ ເຂົ້າເປັນສະ ມາຊິກຂອງອົງການການຄ້າໂລກຢ່າງສຸດຂີດ.
ການເຂົ້າເປັນສະມາຊິກຂອງອົງການການຄ້າໂລກຈະເປັນທັງໂອກາດພັດທະນາແລະສິ່ງທ້າທາຍສຳລັບການດຳເນີນທຸລະກິດຂອງນັກທຸລະກິດລາວ.ກ່ຽວກັບເລື່ອງນີ້, ໃນຖານະເປັນກຳລັງແກ່ນກາງແລະສ່ວນປະກອບອັນສຳຄັນໃນການພັດທະນາເສດຖະກິດຂອງລາວ, ນັກທຸລະກິດໜຸ່ມໄດ້ມີການກຽມຕົວຢ່າງພຽບພ້ອມ.ນາງວາລີກ່າວວ່າ,ການທີ່ລາວເຂົ້າເປັນສະມາຊິກຂອງອົງການການຄ້າໂລກນັ້ນໝາຍຄວາມວ່າ: ໃນພາວະປະຈຸບັນພວກເຮົາບໍ່ສາມາດຢູ່ໂດດດ່ຽວໄດ້ ໃນການພັດທະນາປະເທດ, ເສດຖະກິດ-ສັງຄົມ ລວມເຖິງວັດທະນາທຳການເມືອງຕ່າງໆ ດັ່ງນັ້ນ, ລາວຈຳເປັນຕ້ອງໄດ້ເຂົ້າ ແນ່ນອນເມື່ອນັກລົງທຶນເຂົ້າມາ ສິ່ງທີ່ເຂົາຮຽກຮ້ອງ ນອກຈາກເລື່ອງອື່ນໆແລ້ວ ທີ່ສຳຄັນກໍຄືເລື່ອງສຸຂະພາບ ເຊິ່ງທຸລະກິດ ເວດສະພົງ ຄຣີນິກ ເປັນທຸລະກິດໜື່ງທີ່ຂ້າພະເຈົ້າກຽມຮອງຮັບໂອກາດນີ້ ພວກເຮົາໄດ້ພະຍາຍາມເຮັດໃຫ້ໄດ້ມາດຕະຖານ ແລະ ໃຫ້ເປັນລະດັບສາກົນ.
ຄວາມມຸ້ງຫວັງຂອງການເຂົ້າເປັນສະມາຊິກອົງການການຄ້າໂລກຂອງ ສປປ ລາວ ປະສົມຜົນສຳເລັດເມື່ອໃດ, ຈະກາຍເປັນປັດໃຈອັນສຳຄັນໃນການພັດທະນາເສດຖະກິດຂອງປະເທດຕາມແນວທາງນະໂຍບາຍຂອງພັກແລະລັດຖະບານໃນການນຳເອົາປະເທດລາວຫຼຸດພົ້ນອອກຈາກປະເທດດ້ອຍພັດທະນາໃນປີ 2020.
