ລັດຖະມົນຕີວ່າການກະຊວງຖະແຫຼງຂ່າວວັດທະນະທຳແລະທ່ອງທ່ຽວປະກອບຄຳເຫັນຕໍ່ກອງປະຊຸມສະພາປະຊາຄົມວັດທະນາທຳ-ສັງຄົມອາຊຽນຄັ້ງທີ 8
ເມື່ອບໍ່ດົນມານີ້, ທ່ານ ສຈ. ດຣ ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວ-ວັດທະນະທຳແລະທ່ອງທ່ຽວໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມສະພາປະຊາຄົມວັດທະນາທຳ-ສັງຄົມອາຊຽນຄັ້ງທີ 8 ເຊິ່ງຈັດຂື້ນຢູ່ທີ່ນະຄອນຫຼວງພະນົມເປັນຣາຊະອານາຈັກກຳປູເຈຍແຕ່ວັນທີ25-26ຕຸລານີ້.
ກອງປະຊຸມໄດ້ຮັບກຽດເຂົ້າຮ່ວມແລະເປີດພິທີຢ່າງເປັນທາງການ ໂດຍພະນະທ່ານສົມເດັດຮຸນເຊັນ ນາຍົກລັດຖະມົນຕີກຳປູເຈຍ, ມີບັນດາລັດຖະມົນຕີຮັບຜິດຊອບວຽກງານປະຊາຄົມວັດທະນະທຳສັງຄົມອາຊຽນຂອງບັນດາປະເທດສະມາຊິກ,ແລະຮອງເລຂາທິການອາຊຽນພ້ອມດ້ວຍເຈົ້າໜ້າທີ່ອາວຸໂສອາຊຽນເຂົ້າຮ່ວມ.
ໂອກາດນີ້ ຄະນະຜູ້ແທນກອງປະຊຸມໄດ້ເຂົ້າຮ່ວມພິທີໄວ້ອາໄລແລະສະແດງຄວາມເສົ້າສະຫຼົດໃຈເຖິງດວງວິນຍານຂອງສົມເດັດພະໂນໂລດົມ ສີຫານຸ ພະບິດາຂອງເຈົ້າຊີວິດອົງປັດຈຸບັນແຫ່ງລາຊະອານາຈັກກຳປູເຈຍຢູ່ທີ່ພະຣາດຊະວັງ.
ໃນກອງປະຊຸມສະພາປະຊາຄົມວັດທະນາທໍາ-ສັງຄົມອາຊຽນຄັ້ງທີ 8 ຄັ້ງນີ້, ທ່ານສຈ. ດຣ ບໍ່ແສງຄຳ ວົງດາລາໄດ້ແຈ້ງຕໍ່ກອງປະຊຸມຮັບຊາບຊຶ່ງມີບາງຕອນສຳຄັນວ່າ: ລາວ ໄດ້ປະສົບຜົນສຳເລັດໃນການເປັນເຈົ້າພາບຈັດຕັ້ງກອງປະຊຸມແມ່ຍິງອາຊຽນຄັ້ງທີ1ທີ່ນະຄອນຫຼວງວຽງຈັນຢ່າງໜ້າເພິ່ງພໍໃຈ ແລະໄດ້ມີຖະແຫຼງການຜົນຂອງກອງປະຊຸມດັ່ງກ່າວສະເໜີຜ່ານກອງປະຊຸມປະຊາຄົມວັດທະນາທຳ-ສັງຄົມຄັ້ງນີ້ເພື່ອພິຈາລະນາແລະ ສະເໜີໃຫ້ຜູ້ນຳອາຊຽນຮັບຮອງເອົາຢູ່ທີ່ກອງປະຊຸມສຸດຍອດອາຊຽນທີ່ຈະຈັດຂື້ນໃນມໍ່ໆນີ້.
ໃນຂະນະດຽວກັນນີ້,ລາວກຳລັງກະກຽມແລະມີຄວາມພ້ອມທຸກດ້ານໃນການເປັນເຈົ້າພາບງານມະຫາກຳກິລາມະຫາວິທະຍາໄລອາຊຽນໃນວັນທີ 12 ທັນວາ 2012 ນີ້.
