ກອງປະຊຸມພາກທຸລະກິດອາຊີ-ເອີຣົບເນັ້ນແກ້ໄຂ6ປະເດັນຫຼັກເພື່ອການພັດທະນາ
ຫວ່າງບໍ່ດົນມານີ້ ທ່ານ ດຣ. ນາມ ວິຍະເກດ, ລັດຖະມົນຕີວ່າການກະຊວງອຸດ ສາຫະກຳແລະການຄ້າ ໃຫ້ສຳພາດຕໍ່ສື່ມວນຊົນວ່າ: "ໃນກອງປະຊຸມສຸດຍອດອາຊີ-ເອີຣົບຄັ້ງທີ 9ທີ່ນະຄອນຫຼວງວຽງຈັນຈະໄດ້ຈັດກອງປະຊຸມປິ່ນອ້ອມຄື ກອງປະຊຸມພາກທຸລະກິດອາຊີ-ເອີຣົບ, ໂດຍຈະມີນັກທຸລະກິດຊັ້ນນຳ ທີ່ມີການແຂ່ງຂັນສູງໃນອາຊີ ແລະເອີຣົບເຂົ້າຮ່ວມ 250ຄົນລວມທັງນັກທຸລະກິດລາວ, ເພື່ອໃຫ້ພາກທຸລະກິດມີສ່ວນຮ່ວມນຳພາກລັດໃນການປຶກສາຫາລືທາງແກ້ໄຂບັນຫາຄວາມຫຍຸ້ງຍາກໃນການພັດທະນາເສດຖະກິດໃນ2ທະວີບອາຊີ-ເອີຣົບ, ເພື່ອຮ່ວມກັນສະໜັບສະໜູນພາກທຸລະກິດ, ດ້ານການຄ້າ, ການຮ່ວມມື ແລະ ການລົງທຶນໃຫ້ຫຼາຍຂຶ້ນ".
ກອງປະຊຸມປິ່ນອ້ອມພາກທຸລະກິດນີ້ ໄດ້ມີການກະກຽມ 6ເນື້ອໃນ ເພື່ອປຶກສາຫາລື,ເປັນຕົ້ນແມ່ນບັນຫາການເປີດກວ້າງການຮ່ວມມືກັບພາກທຸລະກິດ ຢູ່ໃນຂົງເຂດອາຊີ-ເອີຣົບເຊັ່ນ:ການແກ້ໄຂບັນຫາວິກິດການທາງດ້ານການເງິນ, ດ້ານເສດຖະກິດໃນ 2ປີຂ້າງໜ້າ;ການເຂົ້າຫາແຫຼ່ງທຶນເພື່ອສົ່ງເສີມແລະພັດທະນາພາກທຸລະກິດ, ການແກ້ໄຂການປ່ຽນແປງສະພາບແວດລ້ອມ ແລະ ບັນຫາການຄໍ້າປະກັນດ້ານສະບຽງອາຫານ,ການພັດທະນາພະລັງງານ ແລະ ການຄຸ້ມຄອງຊັນພະຍາກອນທຳມະຊາດແບບຍືນຍົງແລະການພັດທະນາຮ່ວມມືດ້ານການຕະຫຼາດລະຫວ່າງອາຊີ-ເອີຣົບເປັນຕົ້ນ.
ທ່ານ ດຣ. ນາມ ວິຍະເກດຍັງກ່າວຕື່ມວ່າ: "ແຕ່ລະປະເດັນແມ່ນຈະເປີດກອງປະຊຸມຍ່ອຍໃຫ້ນັກທຸລະກິດສະເໜີຄໍາຄິດຄຳເຫັນແລ້ວສະຫຼຸບເພື່ອໃຫ້ຮູ້ວ່າ ພາກທຸລະກິດຢາກໃຫ້ລັດແກ້ໄຂຄືແນວໃດເພື່ອຮ່ວມມືກັນພັດທະນາໃນອະນາຄົດ".
