ສື່ມວນຊົນທ້ອງຖິ່ນທີ່ສຳຄັນຂອງຝະລັ່ງກ່າວວ່າ, ຄວາມຂັດແຂ່ງກັນກ່ຽວກັບບັນຫາເກາະຕ້ຽວອີເຮັດໃຫ້ຍີ່ປຸ່ນຕົກຢູ່ໃນຄວາມໂດດດ່ຽວ
ຕາມຂ່າວສານຈີນປາຣີ: ພາຍຫຼັງລົງພິມບົດຄວາມທີ່ລົງນາມຂອງທ່ານຂົງຊວນ ເອກອັກຄະລັດຖະທູດຈີນປະຈຳຝະລັ່ງກ່ຽວກັບຫຼັກໝັ້ນຂອງຈີນໃນບັນຫາເກາະຕ້ຽວອີ, ຫວ່າງມໍ່ໆນີ້, ໜັງສືພິມໂລກ ເຊິ່ງເປັນໜັງສືພິມທ້ອງຖິ່ນທີ່ສຳຄັນຂອງຝະລັ່ງໄດ້ພິມບົດວິເຄາະຂອງນັກຂ່າວໜັງສືພິມນີ້ປະຈຳຍີ່ປຸ່ນຂຽນວ່າ, ຄວາມຂັດແຍ່ງກັນກ່ຽວກັບບັນຫາເກາະຕ້ຽວອີໄດ້ກາຍເປັນວີແວວທີ່ການຕ່າງປະເທດຂອງຍີ່ປຸ່ນອ່ອນແອ, ຫຼັກໝັ້ນຂອງຍີ່ປຸ່ນຖືວ່າຕົກຢູ່ໃນຄວາມໂດດດ່ຽວແລະຖືກປະເທດ
ພັນທະມິດປະຖິ້ມເລີຍ.
ໜັງສືພິມດັ່ງກ່າວສະບັບວັນທີ1 ພະຈິກໄດ້ພິມບົດນີ້ທີ່ມີຫົວຂໍ້ວ່າ "ການຕ່າງປະເທດຂອງຍີ່ປຸນອ່ອນແອລົງ", ໄດ້ຍົກເອົາຄວາມເປັນຈິງຕ່າງໆມາສະແດງໃຫ້ເຫັນເຖິງສະພາບອັບຈົນທາງການຕ່າງປະເທດຂອງຍີ່ປຸນໃນປັດຈຸບັນ, ແລະວິເຄາະຄວາມຜິດພາດດ້ານນະໂຍບາຍຂອງຍີ່ປຸ່ນໃນບັນຫາເກາະຕ້ຽວອີຈາກທຸກດ້ານເຊັ່ນເສດຖະກິດການເມືອງພາຍໃນ, ບັນຫາປະຫວັດສາດເປັນຕົ້ນ, ແລະຊີ້ອອກໂດຍຜ່ານຄຳເວົ້າຂອງຜູ່ຊ່ຽວຊານຍີ່ປຸ່ນວ່າ: "ຜູ່ຫຼິ້ນການເມືອງແລະຫາງສຽງມີຄວາມເຫັນທີ່ຕໍ່ຕ້ານຈີນ, ແຕ່ການຕ່າງປະເທດທີ່ຖືກຫາງສຽງຊີ້ນຳນັ້ນມັກບໍ່ຖືກກັບຜົນປະໂຫຍດແຫ່ງຊາດ."
ບົດຄວາມນີ້ຂຽນວ່າ, ເຖິງວ່າອາເມລິກາປະກາດວ່າເກາະຕ້ຽວອີເໝາະໃຊ້ໃນ"ສົນທິສັນຍາການຮັກສາຄວາມປອດໄພລະຫວ່າງອາເມລິກາກັບຍີ່ປຸ່ນ", ແຕ່ປະຕິດເສດບໍ່ແຊກແຊງຄວາມຂັດແຍ່ງກັນ.ແລະອາເມລິກາໄດ້ຕົກລົງປະລະການຊ້ອມຣົບຂຶ້ນເກາະທີ່ຈະຈັດຂຶ້ນຢູ່ໂອກິນາວາໃນຕົ້ນເດືອນພະຈິກນີ້. ຫວ່າງມໍ່ໆນີ້, ທ່ານໂຄອິຊິໂລ ເຈນບະ ລັດຖະມົນຕີວ່າການກະຊວງການຕ່າງປະເທດຍີ່ປຸ່ນຢ້ຽມຢາມເຢຍລະມັນ, ຝະລັ່ງແລະອັງກິດ, ເພື່ອຂໍການສະໜັບສະໜູນຈາກປະເທດເອີລົບໃນບັນຫາເກາະຕ້ຽວອີ. ແຕ່ໜັງສືພິມນີ້ເຫັນວ່າ, ຍີ່ປຸນພຽງແຕ່ໄດ້ຮັບຄຳຕອບທີ່ມີມາລະຍາດຂອງຝ່າຍເອີລົບທີ່ຫວັງໃຫ້ແກ້ໄຂຄວາມຂັດແຍ່ງກັນໂດຍສັນຕິ.
ບົດຄວາມນີ້ວິເຄາະວ່າ, ໃນຊຸມປີ70ແລະ80ສະຕະວັດແລ້ວນີ້, ຍີ່ປຸນເຄີຍມີຄວາມຈະເລີນຮຸ່ງເຮືອງທາງດ້ານເສດຖະກິດ, ແຕ່ປັດຈຸບັນ, ເສດຖະກິດຂອງຍີ່ປຸ່ນຊຸດໂຊມລົງ, ຖານະທີ່ເປັນອົງກອນເສດຖະກິດອັນດັບທີ່ສອງໃນໂລກໄດ້ຖືກຈີນເຂົ້າແທນ. ການເມືອງພາຍໃນແລະການຕ່າງປະເທດຂອງຍີ່ປຸ່ນລ້ວນແຕ່ຂາດທິດທາງອັນຈະແຈ້ງ, ການຢຸດສະງັກທາງດ້ານເສດຖະກິດພຽງແຕ່ເປັນໜຶ່ງໃນປັດໄຈທີ່ເຮັດໃຫ້ຍີ່ປຸ່ນເສຍບົດບາດໃນສາກົນ, ການຂາດກຳລັງນຳທາງດ້ານການເມືອງກໍ່ແມ່ນສາເຫດສຳຄັນ, ການເປັນປໍລະປັກກັນກັບຈີນກໍ່ແມ່ນການສະແດງໃນດ້ານນີ້.
