ກອງປະຊຸມສຸດຍອດອາຊີ-ເອີຣົບ ໄດ້ອັດລົງດ້ວຍຜົນສຳເລັດຢ່າງຈົບງາມ
（ກອງປະຊຸມສຸດຍອດອາຊີ-ເອີຣົບ ໄດ້ອັດລົງດ້ວຍຜົນສຳເລັດຢ່າງຈົບງາມ）
ກອງປະຊຸມສຸດຍອດອາເຊັມຄັ້ງທີ 9 ໄດ້ອັດລົງດ້ວຍຜົນສຳເລັດອັນຈົບງາມ ໃນວັນທີ 6 ພະຈິກ 2012 ພາຍຫລັງທີ່ໄດ້ດຳເນີນມາເປັນເວລາ 2 ວັນ ເຊິ່ງກອງປະຊຸມດັ່ງກ່າວ ໄດ້ປຶກສາຫາລື ແລະ ຮັບຮອງຫລາຍບັນຫາ.
ໃນພິທີປິດ, ທ່ານ ທອງສິງ ທຳມະວົງ ນາຍົກລັດຖະມົນຕີລາວໄດ້ກ່າວວ່າ: ກອງປະຊຸມມີຄວາມເຫັນຄິດວ່າ: ການປຶກສາຫາລືບົນຈິດໃຈ ແລະ ບັນຍາກາດແຫ່ງໄມຕີຈິດມິດຕະພາບ ກົງໄປກົງມາ ແລະ ເປີດອົກເປີດໃຈຂອງຜູ້ແທນເຮັດໃຫ້ເຂົ້າໃຈກັນຫລາຍຂຶ້ນ ແລະ ເປັນເອກະສັນກັນໃນຫລາຍບັນຫາທີ່ສຳຄັນ ບໍ່ວ່າການພົວພັນເຖິງຈະແມ່ນການພົວພັນລະຫວ່າງທະວີບຂອງພວກເຮົາກໍ່ຄືບັນຫາສິ່ງທ້າທາຍທີ່ໂລກກຳລັງປະເຊີນໜ້າໃນປັດຈຸບັນ ໄດ້ແລກປ່ຽນບົດຮຽນ ແລະ ປະສົບການ ໄດ້ສະເໜີແນວຄວາມຄິດຂໍ້ລິເລີ່ມທີ່ສ້າງສັນໂດຍວິໄສທັດທີ່ແນ່ໃສ່ໃຫ້ອາເຊັມເຕີບໃຫຍ່ຂະຫຍາຍຕົວຢ່າງມີຄຸນນະພາບ ແລະ ມີປະສິດທິຜົນ ເພື່ອຜົນປະໂຫຍດ ຂອງອາເຊັມ, ການປຶກສາຫາລືທີ່ອຸດົມຮັ່ງມີນີ້ຊີ້ບອກເຖິງຄວາມຮັບຜິດຊອບສູງ ແລະ ຄຳໝັ້ນໝາຍຂອງພວກເຮົາ ເພື່ອຮັບປະກັນໃຫ້ການເປັນຄູ່ຮ່ວມລະຫວ່າງອາຊີ-ເອີຣົບ ສາມາດບັນລຸເປົ້າໝາຍອັນສູງສົ່ງຂອງພວກເຮົາຄື: ເຮັດໃຫ້ອາເຊັມມີບົດບາດສຳຄັນສູງຂຶ້ນຕໍ່ສັນຕິພາບ ແລະ ການພັດທະນາຢູ່ສອງທະວີບຂອງພວກເຮົາ ກໍຄືຢູ່ໃນໂລກ, ຂີດໝາຍສຳຄັນຂອງກອງປະຊຸມສຸດຍອດອາຊີ-ເອີຣົບ ຄັ້ງທີ 9 ນີ້ ແມ່ນພວກເຮົາໄດ້ຮັບຮອງເອົາຖະແຫ່ງການວຽງຈັນ ວ່າດ້ວຍການຮັດແໜ້ນຄູ່ຮ່ວມມືເພື່ອສັນຕິພາບ ແລະ ການພັດທະນາ ເຊິ່ງໃນນັ້ນບັນດາຜູ້ນຳໄດ້ຢືນຢັນຕໍ່ບັນຫາດັ່ງກ່າວ ເພື່ອຮັບປະກັນໃຫ້ປະຊາຊົນພວກເຮົາໄດ້ດຳລົງຊີວິດດ້ວຍສັນຕິພາບ ສະຖຽນລະພາບອັນແທ້ຈິງ ທັງໝັ້ນຄົງ ຍາວນານ ນັບຖືສິດຂອງປະຊາຊົນອາເຊັມພວກເຮົາ ໃນການເລືອກລະບອບການເມືອງ ກໍຄືສະແດງເຈດຕະນາລົມອັນແຮງກ້າໃນການຮັດແໜ້ນການເປັນຄູ່ຮ່ວມມື ເພື່ອການພັດທະນາທີ່ຍືນຍົງ ແລະ ຄວາມພະຍາຍາມຮ່ວມກັນ ເພື່ອແກ້ໄຂບັນຫາສິ່ງທ້າທາຍທາງດ້ານເສດຖະກິດ-ສັງຄົມ ທີ່ສຳຄັນຂອງໂລກ.
ພວກເຮົາຍັງໄດ້ຮັບຮອງເອົາຖະແຫ່ງການຂອງປະທານກອງປະຊຸມສຸດຍອດອາເຊັມ ຄັ້ງທີ 9 ເຊິ່ງໄດ້ສັງລວມເອົາຄວາມເຫັນທີ່ເປັນເອກະພາບກັນ ໃນຫລາຍບັນຫາມາປຶກສາຫາລືກັນໃນຕະຫລອດສອງວັນທີ່ຜ່ານມາ ການປຶກສາຫາລືດ້ານເສດຖະກິດ ເປັນບັນຫາທີ່ບັນດາຜູ້ນຳໃຫ້ຄວາມສົນໃຈຫລາຍ ໄດ້ເຫັນດີນຳກັນວ່າເສດຖະກິດໂລກທີ່ຈະໄດ້ສືບຕໍ່ຂະຫຍາຍການຮ່ວມມືທາງດ້ານເສດຖະກິດການເງີນ ການຄ້າລະຫວ່າງສອງທະວີບ ປະກອບສ່ວນເຮັດໃຫ້ເສດຖະກິດມີການຂະຫຍາຍຕົວຢ່າງສົມສ່ວນແຂງແຮງ ແລະ ຍືນຍົງ ກ້າວໄປສູ່ການຮັດແໜ້ນ ທັງກ້າວໄປສູ່ການຮັດແຄບຄວາມແຕກໂຕນລະດັບການພັດທະນາ ແລະ ເຊື່ອມໂຍງກັນ ເພື່ອຮັບປະກັນໃຫ້ແກ່ຜົນປະໂຫຍດພື້ນຖານແຫ່ງສະຖ່ຽນລະພາບ ແລະ ມີການພັດທະນາ, ພວກເຮົາຍັງໄດ້ຮັບຮອງເອົາບັນດາຂໍ້ລິເລີ່ມ ໃໝ່ ເພື່ອສົ່ງເສີມ ແລະ ຂະຫຍາຍສາຍພົວພັນທາງດ້ານວັດທະນາທຳ-ສັງຄົມ ສາທາລະນະສຸກ, ສິ່ງແວດລ້ອມ ແລະ ອື່ນໆ ເຊິ່ງທັງໝົດນີ້ລ້ວນແຕ່ສົ່ງເສີມໃຫ້ປະຊາຊົນສອງທະວີບອາຊີ-ເອີຣົບ ໄດ້ໄປມາຫາສູ່ກັນຫລາຍຍິ່ງຂຶ້ນ ເພີ່ມທະວີໄມຕີຈິດຕໍ່ກັນ ແລະ ຮັດແໜ້ນຄວາມສາມັກຄີຄວາມເຂົ້າໃຈເຊິ່ງກັນ ແລະ ກັນ.
ສຳລັບກອງປະຊຸມສຸດຍອດອາເຊັມ ຄັ້ງທີ 10 ສະຫະພາບເອີຣົບ ເປັນເຈົ້າພາບ ເຊິ່ງຈະໄດ້ຈັດຂຶ້ນທີ່ນະຄອນ ບຸກແຊນ ປະເທດແບນຊິກ ອີກ 2 ປີຂ້າງໜ້າ.
