ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນແມນຈຸດສູມຂອງປະຊາຊົນທົວໂລກ
ແຕ່ມື້ນີ້ຫາວັນທີ 14 ພະຈິກນີ້, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18ຂອງພັກຄອມມູນິດຈີນໄດ້ໄຂຂຶ້ນຢູ່ນະຄນຫຼວງປັກກິ່ງຂອງຈີນ,ຍ້ອນວ່າກອງປະຊຸມຄັ້ງນີ້ເປັນກອງປະຊຸມທີ່ມີຄວາມໝາຍສຳຄັນຫຼາຍຂອງພັກຄອມມູນິດຈີນໃນໄລຍະສຳຄັນທີ່ສ້າງສາສັງຄົມອິ່ມໜຳສຳລານຢ່າງຮອບດ້ານ, ແລະລົງເລິກການປະຕິຮູບແລະໄຂປະຕູສູ່ພາຍນອກ, ເລັ່ງລັດຫັນປ່ຽນຮູບການພັດທະນາເສດຖະກິດ, ສະນັ້ນ, ປະຊາຄົມໂລກກໍ່ໄດ້ໃຫ້ຄວາມສົນໃຈຫຼາຍຕໍ່ກອງປະຊຸມຄັ້ງນີ້. ໃນເວລາໃຫ້ສຳພາດຕໍ່ນັກຂ່າວCRI, ທ່ານສົມດີ ບຸນຄຸ້ມ, ເອກອັກຄະລັດຖະທູດລາວປະຈຳຈີນກ່າວວ່າ, ກອງປະຊຸມໃຫຍ່ຄັ້ງທີ18ຂອງພັກຄອມມູນິດຈີນບໍ່ພຽງແຕ່ມີຄວາມໝາຍເລິກເຊິ່ງຍາວໄກຕໍ່ປະຊາຊົນຈີນເທົ່ານັ້ນ, ຍັງມີຜົນສະທ້ອນອັນສຳຄັນຕໍ່ປະຊາຄົມໂລກ. ທ່ານກ່າວວ່າ, "ກອງປະຊຸມໃຫຍ່ຄັ້ງທີ 18 ຂອງພັກຄອມມູນິດຈີນຄັ້ງນີ້ຈະເປັນການສືບຕໍ່ການປ່ຽນແປງຢູ່ໃນ ສປ ຈີນ, ສືບຕໍ່ນະໂຍບາຍທີ່ວ່າ ເປີດປະຕູສູ່ພາຍນອກ ແລະ ສ້າງສັງຄົມນິຍົມຕາມສີສັນຂອງຈີນ, ພັດທະນາຈີນໃຫ້ມີຜົນສຳເລັດ ແລະ ເພີ່ມພູນຄູນສ້າງໃນການພັດທະນາດ້ານຕ່າງໆ ບໍ່ວ່າທາງດ້ານການເມືອງ, ເສດຖະກິດ-ສັງຄົມອັນຈະເປັນການ ຍົກລະດັບຊີວິດການເປັນຢູ່ຂອງປະຊາຊົນຈີນໃຫ້ໄດ້ຮັບການປັບປຸງ ແລະ ປົວແປງຂຶ້ນເລື້ອຍໆ。ກອງປະຊຸມຄັ້ງທີ 18 ຂອງພັກຄອມມູນິດຈີນນີ້ມີຄວາມໝາຍສຳຄັນຫລາຍໃນຊີວິດການເມືອງຂອງປະຊາຊົນຈີນ, ໄດ້ເປັນຈຸດສົນໃຈບໍ່ພຽງແຕ່ປະຊາຊົນຈີນ, ກໍ່ຍັງເກືອບວ່າເປັນຈຸດໃຈກາງທີ່ກວ້າງຂວາງໃນທົ່ວໂລກ. ປະຊາຄົມໂລກນີ້ຕ່າງກໍ່ໃຫ້ຄວາມສົນໃຈທີ່ສຸດ，ເພາະວ່າກອງປະຊຸມໃຫຍ່ດັ່ງກ່າວມີຄວາມໝາຍທີ່ຈະກຳນົດທິດທາງໃນການພັດທະນາເສດຖະກິດສັງຄົມຂອງຈີນໃນຕໍ່ໄປ.
ກອງປະຊຸມໃຫຍ່ຄັ້ງທີ18ຂອງພັກຄອມມູນິດຈີນໄດ້ທົບທວນຄືນວຽກງານດ້ານຕ່າງໆຂອງພັກກອມມູນິດຈີນໃນໄລຍະ 5 ປີທີ່ຜ່ານມາເຊັ່ນ: ການກໍ່ສ້າງພັກ, ການພັດທະນາເສດຖະກິດສັງຄົມ, ຊີວິດການເປັນຢູ່ຂອງປະຊາຊົນແລະອື່ນໆ,ແລະຈະດຳເນີນການເລືອກຕັ້ງຜູ້ນຳຊຸດໃໝ່ຂອງພັກຄອມມູນິດຈີນ, ກຳນົດທິດທາງແລະນະໂຍບາຍພັດທະນາຂອງຈີນໃນອະນາຄົດ, ສະນັ້ນ, ວາລະປະຊຸມຕ່າງໆໄດ້ດຶງດູດຄວາມສົນໃຈຈາກພາຍໃນແລະຕ່າງປະເທດ, ເມື່ອເວົ້າເຖິງເນື້ອໃນທີ່ສົນໃຈກ່ຽວກັບກອງປະຊຸມຄັ້ງນີ້, ທ່ານສົມດີ ບຸນຄຸ້ມກ່າວວ່າ,"ຂ້າພະເຈົ້າແມ່ນມີຄວາມສົນໃຈຢ່າງຕັ້ງໜ້າ ແລະ ຢາກຮູ້ກ່ຽວກັບບົດລາຍງານການເມືອງຂອງພັກໃນການປະຕິບັດແຜນພັດທະນາເສດຖະກິດສັງຄົມຄັ້ງທີ່ຜ່ານມາ ແລະ ແນວທາງນະໂຍບາຍໃນການສືບຕໍ່ນຳພາປະເທດຈີນນີ້ກ້າວໄປສູ່ອະນາຄົດບົນເສັ້ນທາງປ່ຽນແປງໃໝ່ ແລະ ໝາຍຄວາມວ່າ, ສືບຕໍ່ເຮັດໃຫ້ຜົນສຳເລັດໃນການເປີດກວ້າງຈີນສູ່ພາຍນອກ ແລະ ການສ້າງສາພັດທະນາປະເທດຈີນຕາມສີສັນຂອງຈີນເອງ"
ທ່ານສົມດີ ບຸນຄຸ້ມແມ່ນເລີ່ມເຮັດວຽກຢູ່ນະຄອນຫຼວງປັກກິ່ງແຕ່ປີ2010, ທ່ານເວົ້າວ່າ,ໃນເວລາ2ປີປາຍຜ່ານມາ, ທ່ານໄດ້ເຫັນການພັດທະນາຢ່າງວ່ອງໄວຂອງຈີນ, ການສ້າງສາຕົວເມືອງແລະຊົນນະບົດ, ການປັບປຸງຊີວິດການເປັນຢູ່ຂອງປະຊາຊົນ, ການພັດທະນາດ້ານເສດຖະກິດ, ແລະການຍົກສູງຖານະບົດບາດໃນເວທີສາກົນ,ແລະອື່ນໆ, ລ້ວນແຕ່ໄດ້ສ້າງຄວາມປະທັບໃຈອັນເລິກເຊິ່ງໃຫ້ແກ່ທ່ານ. ທ່ານຕີລາຄາສູງຕໍ່ຫຼັກໝັ້ນຂອງຈີນທີ່ຮັກຫອມສັນຕິພາບ, ແລະຄວາມພະຍາຍາມເພື່ອຊຸກຍູ້ສັນຕິພາບແລະການພັດທະນາຂອງພາກພື້ນກໍ່ຄືຂອງໂລກ. ທ່ານກ່າວວ່າ, ຂ້າພະເຈົ້າໄດ້ເຫັນໄດ້ສຳຜັດດ້ວຍຕົນເອງ, ເຫັນໄດ້ວ່າແນວທາງນະໂຍບາຍຂອງພັກແລະລັດຂອງສປຈີນມີລັກສະນະເຮັດທຸກສິ່ງທຸກຢ່າງເພື່ອສັນຕິພາບ, ແລະເສີມຂະຫຍາຍການພົວພັນກັບທຸກປະເທດໃນໂລກ, ບົນສິດຜົນປະໂຫຍດ ຂອງປະຊາຄົມໂລກ, ການນຳຂອງຈີນຂັ້ນສູງກໍ່ຄືຂັ້ນຕ່າງໆ, ໄດ້ມີການເຄື່ອນໄຫວຢ່າງຫ້າວຫັນໃນເວທີສາກົນ, ເພື່ອສົ່ງເສີມການຮ່ວມມືຂອງຈີນກັບປະຊາຄົມໂລກໃຫ້ໄດ້ຮັບການພັດທະນາ, ເພື່ອສິດຜົນປະໂຫຍດຂອງປະຊາຄົມໂລກ.
ພ້ອມກັນນັ້ນ,ທ່ານສົມດີ ບຸນຄຸ້ມ,ໃນຖານະເປັນເອກອັກຄະລັດຖະທູດລາວປະຈຳຈີນ ກໍ່ໄດ້ນຳພາສະຖານທູດລາວປະຈຳຈີນ ທຳຄວາມພະຍາຍາມຢ່າງຫຼວງຫຼາຍ ໃນການຊຸກຍູ້ການຮ່ວມມືແລະການແລກປ່ຽນລະຫວ່າງສອງປະເທດລາວຈີນໃນຂົງເຂດຕ່າງໆ, ເຊັ່ນ:ການເມືອງ, ເສດຖະກິດແລະວັດທະນະທຳເປັນຕົ້ນ, ອອກແຮງປະສານງານໃນການຢ້ຽມຢາມໄມຕີຈິດລະຫວ່າງສອງປະເທດ, ເພີ່ມທະວີຄວາມເຂົ້າໃຈແລະຄວາມໄວ້ເນື້ອເຊື່ອໃຈກັນ, ເສີມຂະຫຍາຍມິດຕະພາບອັນເປັນມູນເຊື້ອແລະການພົວພັນຄູ່ຮ່ວມມືຍຸດທະສາດຮອບດ້ານໃຫ້ກ້າວສູ່ລວງເລິກເລື້ອຍໆ. ທ່ານກ່າວວ່າ,"ສະຖານທູດພວກເຮົາໄດ້ຮັບໜ້າທີ່ຊຸກຍູ້, ປະສານ ແລະ ອຳນວຍຄວາມສະດວກ ໃຫ້ມີການແລກປ່ຽນຄະນະຜູ້ແທນແຕ່ສູນກາງລົງຮອດຂັ້ນທອງຖິ່ນ，ຜົນຂອງການແລກປ່ຽນການຢ້ຽມຢາມໄດ້ເຮັດໃຫ້ມີຜົນສຳເລັດໃນການເສີມຂະຫຍາຍສາຍພົວພັນຂອງສອງປະເທດນີ້ , ອັນສຳຄັນນີ້ແມ່ນໃນໄລຍະຜ່ານມານີ້, ລັດຖະບານຈີນກໍ່ຄືປະຊາຊົນຈີນອ້າຍນ້ອງໄດ້ໃຫ້ການຊ່ວຍເຫຼືອອັນລ້ຳຄ່າ, ໃນການສ້າງໂຄງລ່າງໃນການພັດທະນາ, ເສດຖະກິດສັງຄົມໃຫ້ແກ່ລາວພວກເຮົາ, ເຊີ່ງທັງໝົດນີ້ເປັນການກະຕຸກຊຸກຍູ້,ເລື່ອງສ້າງພື້ນຖານໂຄງລ່າງທາງດ້ານເສດຖະກິດສັງຄົມໃຫ້ແກ່ພວກເຮົາໃນການສືບຕໍ່ພັດທະນາເສດຖະກິດສັງຄົມໃນຕໍ່ໄປ.
ສຸດທ້າຍ, ທ່ານສົມດີ ບຸນຄຸ້ມໄດ້ຜ່ານຄື້ນວິທະຍຸ CRI ສົ່ງຄວາມອວຍພອນຢ່າງຈິງໃຈໄປຍັງກອງປະຊຸມໃຫຍ່ຄັ້ງທີ18ຂອງພັກຄອມມູນິດຈີນ.ຂ້າພະເຈົ້າຂໍຜ່ານວິທະຍຸສາກົນແຫ່ງປະເທດຈີນCRI. ສະແດງຄວາມອວຍພອນອັນປະເສີດມາຍັງກອງປະຊຸມໃຫຍ່ຄັ້ງທີ18ຂອງພັກຄອມມູນິດຈີນ ຈົ່ງໄດ້ຮັບຜົນສຳເລັດເປັນຢ່າງດີ, ແລະມີຜົນສຳເລັດຢ່າງໃຫຍ່ຫຼວງ. ຂໍຂອບໃຈ.
