ກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນຈະຊຸກຍູ້ການພັດທະນາຂອງຈີນກໍ່ຄືຂອງໂລກ
ປະເທດຈີນແລະລາວເປັນປະເທດບ້ານໃກ້ເຮືອນຄຽງທີ່ມີມິດຕະພາບມູນເຊື້ອຍາວນານ, ໃນຫລາຍປີມໍ່ໆມານີ້, ການຢ້ຽມຢາມຢ່າງເປັນປົກກະຕິລະຫວ່າງຂັ້ນສູງຂອງສອງປະເທດໄດ້ມີຂື້ນເລື້ອຍໆ, ການຮ່ວມມືໃນຂົງເຂດຕ່າງໆລະຫວ່າງສອງປະເທດກໍ່ໄດ້ລົງເລິກຢ່າງບໍ່ຢຸດຢັ້ງ, ນີ້ໄດ້ສະແດງໃຫ້ເຫັນເຖິງການພົວພັນຢ່າງໃກ້ຊິດລະຫວ່າງສອງປະເທດທີ່ເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີແລະຄູ່ຮ່ວມມືທີ່ດີ, ແລະການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໄດ້ຂະຫຍາຍຕົວ. ພ້ອມກັນນັ້ນ, ສອງປະເທດກໍ່ໄດ້ສະໜັບສະໜູນແລະຊ່ວຍເຫລືອເຊິ່ງກັນແລະກັນໃນວຽກງານສາກົນແລະພາກພື້ນ, ເອົາໃຈໃສ່ການພັດທະນາຂອງຝ່າຍກົງກັນຂ້າມໃນດ້ານການເມືອງ,ເສດຖະກິດ, ວັດທະນະທໍາການສຶກສາ, ຊີວິດການເປັນຢູ່ຂອງປະຊາຊົນເປັນຕົ້ນ.ວັນທີ 8 ພະຈິກນີ້, ພັກກອມມູນິດຈີນໄດ້ໄຂກອງປະຊຸມຜູ້ແທນທົ່ວປະເທດຄັ້ງທີ18ຢ່າງເປັນທາງການ, ວົງການຕ່າງໆຂອງລາວກໍ່ໄດ້ໃຫ້ຄວາມເອົາໃຈໃສ່ຢ່າງກວ້າງຂວາງ, ໃນໂອກາດນີ້, ທ່ານສີຄູນ ບຸນວິໄລ, ເລຂາທິການສະພາຄົມມິດຕະພາບລາວ-ຈີນ, ຮອງຫົວໜ້າຄະນະກໍາມະການຮ່ວມມືລາວ-ຈີນໄດ້ໃຫ້ການສໍາພາດຕໍ່ນັກຂ່າວCRI, ແບ່ງປັນຄວາມເຂົ້າໃຈຕໍ່ປະເທດຈີນແລະຄວາມເຫັນກ່ຽວກັບກອງປະຊຸມໃຫຍ່ຄັ້ງທີ18ຂອງພັກກອມມູນິດຈີນ.
ຍ້ອນເຮັດວຽກກ່ຽວກັບຈີນ, ໃນຫລາຍປີທີ່ຜ່ານມາ, ທ່ານສີຄູນໄດ້ຕິດຕາມການພັດທະນາແລະການປ່ຽນແປງຂອງຈີນມາໂດຍຕະຫລອດ, ທ່ານເຫັນວ່າ, ຈີນແມ່ນປະເທດທີ່ກ້າວເດີນໄປໜ້າຢ່າງບໍ່ຢຸດຢັ້ງ, ມີອິດທິພົນຫຼາຍໃນເວທີສາກົນແລະພາກພື້ນ, ການພັດທະນາແບບກ້າວກະໂດດທາງດ້ານການເມືອງ, ການຕ່າງປະເທດ, ວິທະຍາສາດເຕັກໂນໂລຊີ, ແລະເສດຖະກິດສັງຄົມໄດ້ເຮັດໃຫ້ຊີວິດການເປັນຢູ່ຂອງປະຊາຊົນຈີນໄດ້ຮັບການປັບປຸງດີຂຶ້ນເປັນເທື່ອລະກ້າວ. ທັງໝົດເຫລົ່ານີ້ແມ່ນຍ້ອນການນໍາພາທີ່ຖືກຕ້ອງຂອງພັກກອມມູນິດຈີນແລະໄປຕາມເສັ້ນທາງພັດທະນາທີ່ສອດຄ່ອງກັບສະພາບແຫ່ງຊາດຈີນ.
"ສາເຫດຫລັກກໍແມ່ນຍ້ອນການນໍາພາຂອງພັກ, ໂດຍສະເພາະແມ່ນການນໍາລຸ້ນທີ2 ດ້ວຍສະຫາຍເຕີ້ງສຽງຜິງໄດ້ວາງອອກນະໂຍບາຍປະຕິຮູບແລະເປີດປະຕູສູ່ໂລກພາຍນອກ, ຈາກນັ້ນມາ, ປະຊາຊົນຈີນຍາດໄດ້ຜົນສໍາເລັດອັນໃຫຍ່ຫລວງໃນພາລະກິດສ້າງສາສັງຄົມນິຍົມຕາມສີສັນພິເສດຂອງຈີນ, ເສດຖະກິດແຫ່ງຊາດໄດ້ຂະຫຍາຍຕົວຢ່າງໄວວາ,ກ້າວກະໂດດແລະຕໍ່ເນື່ອງ,ຈາກປະເທດອ່ອນແອກາຍເປັນປະເທດເຂັ້ມແຂງດ້ວຍຈັງຫວະການຂະຫຍາຍຕົວຢາງວ່ອງໄວ.
ຄຽງຄູ່ກັບບາດກ້າວຂະຫຍາຍຕົວຂອງຈີນນັບມື້ນັບໄວຂື້ນ, ຊີວິດການເປັນຢູ່ທາງດ້ານວັດຖຸແລະວັດທະນະທໍາຂອງປະຊາຊົນຈີນກໍ່ໄດ້ຮັບການຍົກສູງຂຶ້ນຢ່າງໃຫຍ່ຫລວງ, ສະພາບແວດລ້ອມດ້ານການເມືອງກໍ່ນັບມືນັບໝັ້ນຄົງ, ປະຈຸບັນ, ຈີນໄດ້ສ້າງສາຍພົວພັນທາງການທູດກັບ 170 ກວ່າປະເທດໃນໂລກ, ໄດ້ຕັ້ງໜ້າຊຸກຍູ້ສະຕິພາບ,ສະຖຽນລະພາບແລະຄວາມໝັ້ນຄົງໃນໂລກແລະພາກພື້ນ. ໃນການຮ່ວມມືພາກພື້ນ, ຈີນໄດ້ຍຶດໝັ້ນແລະສະໜັບສະໜູນປະຊາຄົມອາຊຽນມີບົດບາດນໍາພາໃນການຮ່ວມມືພາກພື້ນ, ເພີ່ມທະວີການຮ່ວມມືແລະໄປມາຫາສູ່ກັນກັບປະເທດອາຊຽນ. ໃນນັ້ນ, ການແລກປ່ຽນລະຫວ່າງຈີນກັບລາວກໍ່ໄດ້ມີຜົນສໍາເລັດຢ່າງຫລວງຫລາຍ.
"ອັນພົ້ນເດັ່ນລະຫວ່າງການຮ່ວມມືຂອງ2ຊາດລາວ-ຈີນທີ່ນຳຜົນປະໂຫຍດຕົວຈິງມາສູ່2ຊາດພວກເຮົາແມ່ນການຢ້ຽມຢາມຂອງການນຳຂັ້ນສູງຂອງພັກ ແລະ ລັດ 2ປະເທດ ເພື່ອເປັນການແລກປ່ຽນບົດຮຽນ ແລະ ຊ່ວຍເຫລືອກັນທາງດ້ານການສ້າງພັກພະນັກງານ ແລະ ພັດທະນາເສດຖະກິດຂອງຕົນແລະຈີນໄດ້ໃຫ້ການຊ່ວຍເຫລືອຢ່າງຫລວງຫລາຍໃຫ້ແກ່ລາວ. ຄືດັ່ງບັນດາທ່ານໄດ້ເຫັນວ່າມີຫລາຍຮ້ອຍໂຄງການທີ່ໄດ້ຮັບຄວາມສຳເລັດຈາກ ສປ ຈີນ ໄດ້ຖືກປະຕິບັດຢູ່ ສປປ ລາວ ອັນເດັ່ນກວ່າໝູ່ກໍ່ແມ່ນຫໍປະຊຸມແຫ່ງຊາດ ເຊິ່ງເປັນມູນຄ່າຫລາຍສົມຄວນ ທີ່ຮັບໃຊ້ກອງປະຊຸມສຸດຍອດອາຊີ-ເອີຣົບທີ່ຫາກໍ່ຈົບໄປຫວ່າງວັນທີ 6 ພະຈິກນັ້ນ, ນັ້ນກໍ່ແມ່ນຜົນງານສະແດງໃຫ້ເຫັນເຖິງການຊ່ວຍເຫລືອ ແລະ ຮ່ວມມືລະຫວ່າງ 2ຊາດພວກເຮົາ."
ໃນຖານະເປັນເພື່ອນມິດທີ່ດີຂອງຈີນ, ແລະເຮັດວຽກກ່ຽວກັບຊຸກຍູ້ຂະຫຍາຍການພົວພັນລະຫວ່າງສອງປະເທດ, ທ່ານສີຄູນໄດ້ໃຫ້ຄວາມສຳຄັນຫລາຍຕໍ່ກອງປະຊຸມໃຫຍ່ຄັ້ງທີ18ຂອງພັກກອມມູນິດຈີນ, ເຊິ່ງເປັນເຫດການສໍາຄັນຂອງຊີວິດການເມືອງຂອງປະຊາຊົນຈີນ. ກ່ອນໄຂກອງປະຊຸມຂຶ້ນ, ທ່ານກໍໄດ້ຕິດຕາມວຽກງານກະກຽມຕ່າງໆ, ເມື່ອກອງປະຊຸມໄຂຂຶ້ນຢ່າງເປັນທາງການ, ທ່ານໄດ້ຕິດຕາມກອງປະຊຸມໂດຍຜ່ານໂທລະພາບຢູ່ໃນຫ້ອງການ, ທັງເຮັດວຽກທັງຊອກຮູ້ຄວາມຄືບໜ້າຂອງກອງປະຊຸມ, ໂດຍສະເພາະແມ່ນບັນຫາທີ່ທ່ານສົນໃຈ.
"ກອງປະຊຸມໃຫຍ່ຄັ້ງທີ 18 ຂອງພັກຄອມມູນິດຈີນ, ສິ່ງສຳຄັນໃນກອງປະຊຸມນັ້ນ ຂ້າພະເຈົ້າສົນໃຈອັນທີ 1ແມ່ນການຄຸ້ມຄອງບຸກຄະລາກອນການນຳຂັ້ນສູງຂອງພັກຄອມມູນິດຈີນ，ຕາມທີ່ຂ້າພະເຈົ້າໄດ້ຕິດຕາມ ສ່ວນຫລາຍກໍ່ມີແຕ່ຄົນລຸ້ນໜຸ່ມ ເຊິ່ງມີຄວາມຮູ້ຄວາມສາມາດ, ເປັນແກ່ນສານໃນການເຕົ້າໂຮມຄວາມສາມັກຄີ ເພື່ຶອນຳພາພາລະກິດ ເພື່ອຮັກສາສັງຄົມນິຍົມຂອງຈີນໄປສູ່ຈຸດທີ່ໝາຍ, ຈຸດທີ2, ຂ້າພະເຈົ້າກໍ່ເຫັນວ່າ ຢູ່ໃນບົດລາຍງານການເມືອງຂອງເລຂາທິການໃຫຍ່ຫູຈິ່ນທ່າວຫັ້ນ ແມ່ນເວົ້າເຖິງການເພີ່ມທະວີໃນການສ້າງພັກດ້ວຍຕົນເອງ ແລະ ປົກປັກຮັກສາລັກສະນະໃຫ້ທັນສະໄໝ ແລະ ປອດໃສຂາວສະອາດ. ພັກຄອມມູນິດຈີນສາມາດນຳພາປະເທດຊາດ ແລະ ສັງຄົມໄປສູ່ຈຸດທີ່ໝາຍໄດ້ ສຳຄັນກໍ່ແມ່ນຄວາມປອດໃສຂາວສະອາດ ແລະ ຄວາມເປັນແບບຢ່າງຂອງສະມາຊິກພັກ"
ໃນຕະຫຼອດ 91 ປີນັບຕັ້ງແຕ່ພັກກອມມູນິດຈີນສ້າງຕັ້ງຂຶ້ນໃນວັນທີ 1 ກໍລະກົດ 1921ມານີ້, ພັກກອມມູນິດຈີນໄດ້ຈັດກອງປະຊຸຸມຜູ້ແທນທົ່ວປະເທດ 17 ຄັ້ງແລ້ວ, ທ່ານສີຄູນເຫັນວ່າ, ກອງປະຊຸມທຸກຄັ້ງລ້ວນແຕ່ໄດ້ເອົາການປ່ຽນແປງຢ່າງເລິກເຊິ່ງມາໃຫ້ປະເທດຈີນ, ແລະໄດ້ມີຜົນສະທ້ອນອັນຕັ້ງໜ້າມາໃຫ້ປະຊາຄົມໂລກ. ກອງປະຊຸມໃຫຍ່ຄັ້ງທີ 18 ນີ້ກໍມີຄວາມໝາຍສໍາຄັນທາງປະຫວັດສາດເຊັ່ນກັນ,ທ່ານກ່າວວ່າ:
"ຂ້າພະເຈົ້າເຊື່ອໝັ້ນວ່າ ກອງປະຊຸມໃຫຍ່ຄັ້ງທີ 18 ຂອງພັກຄອມມູນິດຈີນຍ່ອມຈະສ້າງຜົນສຳເລັດອັນໃຫຍ່ຫລວງແລະສະຫງ່າຜ່າເຜີຍກວ່າເກົ່າໃນການພັດທະນາເສດຖະກິດຂອງຈີນແລະຂອງໂລກໄປສູ່ຄວາມວັດທະນາຢ່າງບໍ່ຢຸດຢັ້ງ. ເນື່ອງໃນໂອກາດກອງປະຊຸມຄັ້ງທີ18ຂອງພັກກອມມູນິດຈີນນີ້, ຂ້າພະເຈົ້າຂໍມີຄວາມອວຍພອນແລະປາຖະໜາຫວັງຢ່າງຍິ່ງວ່າ: ປະເທດຈີນແລະປະຊາຊົນຈີນອັນກວ້າງໃຫຍ່ໄພສານຈະປະສົບຜົນສໍາເລັດດ້ວຍມະຫາໄຊຊະນະທີ່ຍິ່ງໃຫຍ່ກວ່າເກົ່າ,ຂໍອວຍພອນໃຫ້ມິດຕະພາບລາວ-ຈີນຍາວນານແລະໝັ້ນຄົງຊົ່ວຟ້າດິນສະຫລາຍ,ອວຍພອນໃຫ້ກອງປະຊຸມໃຫຍ່ຄັ້ງທີ18ຂອງພັກກອມມູນິດຈີນປະສົບຜົນສໍາເລັດແລະມີໄຊຍິ່ງໃຫຍ່."
