ຕາມຂ່າວCRI: ຕອນບ່າຍວັນທີ 12 ພະຈິກນີ້, ສູນຖະແຫຼງຂ່າວຂອງກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນໄດ້ຈັດງານຖະແຫຼງຂ່າວຄັ້ງທີ 4 ຢູ່ປັກກິ່ງ. ເຈົ້າໜ້າທີ່ທີ່ກ່ຽວຂ້ອງຫຼາຍພາກສ່ວນໄດ້ຕອບຄຳຖາມຂອງນັກຂ່າວຈີນແລະຕ່າງປະເທດກ່ຽວກັບຫົວຂໍ້ໃນຂົງເຂດຊີວິດການເປັນຢູ່ຂອງປະຊາຊົນ, ໃນເວລາສະແດງໃຫ້ເຫັນເຖິງຄວາມກ້າວໜ້າໃນຂົງເຂດຊີວິດການເປັນຢູ່ຂອງປະຊາຊົນຈີນໃນ 10 ປີມານີ້ແລ້ວ, ຍັງໄດ້ປະເຊີນກັບບັນຫາທີ່ເກີດຂຶ້ນຢູ່ໃນປະຈຸບັນໂດຍກົງ.
ໃນດ້ານການປະຕິຮູບລະບົບປິ່ນປົວແລະຮັກສາສຸຂະພາບແມ່ນບັນຫາທີ່ຝ່າຍຕ່າງໆໃຫ້ຄວາມສົນໃຈຫຼາຍທີ່ສຸດ, ທ່ານຈູ່ຈື່ຊິນ, ຮອງຫົວໜ້າຄະນະກຳມະການແລະພັດທະນາການປະຕິຮູບແຫ່ງລັດຈີນກ່າວວ່າ, ກ່ອນນີ້ 10 ປີ, ຈຳນວນຄົນທີ່ມີປະກັນສັງຄົມບໍ່ຮອດ 100 ລ້ານຄົນ. ເດືອນເມສາປີ 2009, ລັດຖະບານຈີນເລີ່ມປະຕິບັດການປະຕິຮູບລະບຽບການດ້ານການປິ່ນປົວແລະຮັກສາສຸຂະພາບຮອບໃໝ່, ປະຈຸບັນ, ຈຳນວນປະຊາກອນຂອງຈີນທີ່ມີປະກັນສັງຄົມຫຼາຍກວ່າ 1 ຕື້ 300 ລ້ານຄົນ, ກວມປະຊາກອນ 95% ຂຶ້ນໄປຂອງຈີນ. ແຕ່ວ່າ, ຍັງມີປະຊາຊົນຈຳນວນໜຶ່ງເຫັນວ່າຜົນການປະຕິຮູບລະບຽບການປິ່ນປົວບໍ່ຈະແຈ້ງ, ທ່ານຈູ່ຈື່ຊິນໄດ້ຊີ້ແຈງເຖິງສາເຫດຂອງມັນວ່າ:
"ອັນທີໜຶ່ງແມ່ນຕົວເມືອງ, ໂດຍສະເພາະແມ່ນເວລາໄປຫາທ່ານໝໍຢູ່ໂຮງໝໍໃຫຍ່ຂອງຕົວເມືອງຍັງຍາກຢູ່ແລະມີລາຄາແພງສົມຄວນ. ອັນທີສອງແມ່ນລະດັບປະກັນໄພສັງຄົມຍັງຕ່ຳຫຼາຍ, ບໍ່ສາມາດຕອບສະໜອງຄວາມຕ້ອງການຮັກສາສຸຂະພາບຂອງປະຊາຊົນທີ່ນັບມື້ນັບຫຼາຍຂຶ້ນ. ຄວາມກ້າວໜ້າຂອງການປະຕິຮູບການປິ່ນປົວຕ້ອງອອກແຮງແກ້ໄຂບັນຫາເຫຼົ່ານີ້, ພະຍາຍາມເຮັດໃຫ້ປະຊາຊົນ 90% ສາມາດໄປຫາທ່ານໝໍປິ່ນປົວຢູ່ຕົວເມືອງໄດ້."
1 2