ທ່ານຈູມມາລີ ໄຊຍະສອນສົ່ງສານຊົມເຊີຍເຖິງເລຂາທິການໃຫຍຄະນະບໍລິຫານງານສູນກາງພັກກອມມູນິດຈີນ
ວັນທີ 15 ພະຈິກນີ້, ສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ໄດ້ສົ່ງສານສະແດງ ຄວາມຊົມເຊີຍເຖິງສະຫາຍ ສີ ຈິນຜິງ ເລຂາທິການໃຫຍ່ຄະນະບໍລິຫານງານສູນ ກາງພັກກອມມູນິດຈີນທີ່ໄດ້ຮັບການເລືອກຕັ້ງໃໝ່. ເຊິ່ງມີເນື້ອໃນດັ່ງນີ້:
ເນື່ອງໃນໂອກາດທີ່ສະຫາຍໄດ້ຮັບເລືອກຕັ້ງໃຫ້ດຳລົງຕຳແຫນ່ງເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ, ໃນນາມຄະນະບໍລິ ຫານງານສູນກາງພັກປະຊາຊົນປະຕິວັດລາວ ແລະ ໃນນາມສ່ວນຕົວ,ຂ້າພະເຈົ້າ ຂໍສົ່ງຄວາມຊົມເຊີຍອັນອົບອຸ່ນ ແລະພອນໄຊອັນປະເສີດມາຍັງສະຫາຍ.ການທີ່ສະຫາຍໄດ້ຮັບເລືອກຕັ້ງໃຫ້ດຳລົງຕຳແຫນ່ງສູງສຸດຂອງພັກກອມມູນິດຈີນໃນ ກອງປະຊຸມໃຫຍ່ຄັ້ງທີ່ 18 ນີ້ ເປັນການສະແດງໃຫ້ເຫັນເຖິງຄວາມໄວ້ວາງໃຈ ອັນເຕັມປ່ຽມຂອງທົ່ວພັກ ແລະ ທົ່ວປວງຊົນຈີນ ທີ່ມີຕໍ່ສະຫາຍ ໃນຖານະເປັນຜູ້ນຳ ທີ່ມີປະສົບການອັນອຸດົມຮັ່ງມີໃນການນຳພາປະຊາຊົນຈີນອ້າຍນ້ອງໃນຕະຫລອດໄລຍະຜ່ານມາ.
ຂ້າພະເຈົ້າມີຄວາມເຊື່ອຫມັ້ນວ່າ : ພາຍໃຕ້ການນຳພາອັນສະຫລາດສ່ອງໃສ ແລະ ເດັດດ່ຽວຫນຽວແຫນ້ນຂອງພັກກອມມູນິດຈີນ ໂດຍມີສະຫາຍເປັນຜູ້ນຳນັ້ນ, ປະຊາຊົນຈີນອ້າຍນ້ອງຈະສືບຕໍ່ຍາດໄດ້ໄຊຊະນະ ແລະ ຜົນສຳເລັດອັນໃຫຍ່ໃນ ການບັນລຸເປົ້າຫມາຍທີ່ກອງປະຊຸມໃຫຍ່ ຄັ້ງທີ 18 ຂອງພັກກອມມູນິດຈີນວາງ ອອກ, ປະຕິບັດຕາມທິດສະດີເຕີ້ງສຽວຜິງ ແລະ ແນວຄິດສາມຕົວແທນ, ຜັນຂະ ຫຍາຍທັດສະນະການພັດທະນາແບບວິທະຍາສາດ, ສືບຕໍ່ພາລະກິດປະຕິຮູບແລະ ເປີດປະຕູສູ່ໂລກພາຍນອກ, ກໍ່ສ້າງສັງຄົມນິຍົມທີ່ທັນສະໄຫມ,ຢຶດຫມັ້ນເສັ້ນທາງ ສັງຄົມນິຍົມທີ່ມີສີສັນສະເພາະຂອງຈີນ, ແນໃສ່ສົ່ງເສີມສັງຄົມແບບກົມກຽວ, ສ້າງສັງຄົມອີ່ມຫນຳສຳລານຢູ່ດີກິນດີຮອບດ້ານ, ປະກອບສ່ວນຢ່າງຕັ້ງຫນ້າເຂົ້າໃນພາ ລະກິດປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດ ທະນາຢູ່ໃນພາກພື້ນ ແລະ ໃນໂລກ. ຂໍອວຍພອນໃຫ້ສາຍພົວພັນມິດຕະພາບອັນ ເປັນມູນເຊື້ອ ແລະການເປັນຄູ່ຮ່ວມມືຍຸດທະສາດຮອບ ດ້ານຍາວນານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຈີນບົນຈິດໃຈແຫ່ງຄວາມ ຫມັ້ນຄົງຍາວນານ,ຕາມທິດເປັນບ້ານໃກ້ເຮືອນຄຽງທີ່ດີ,ເພື່ອນມິດທີ່ດີ,ສະຫາຍ ທີ່ດີແລະ ຄູ່ຮ່ວມມືທີ່ດີຈົ່ງແຕກດອກອອກຜົນຍິ່ງໆຂຶ້ນ.
ຂໍອວຍພອນໃຫ້ສະຫາຍຈົ່ງມີພະລານາໄມສົມບູນມີຄວາມຜາສຸກແລະໄດ້ຮັບຜົນສຳເລັດໃນພາລະກິດອັນມີກຽດ ແລະສູງສົ່ງຂອງສະຫາຍ.
