ອາຊຽນປະກາດວ່າຈະສ້າງຕັ້ງປະຊາຄົມກ່ອນທ້າຍປີ2015
(GMT+08:00) 2012-11-19 12:51:48 cri
ຕາມຂ່າວສານຊິນຮວາ: ວັນທີ18ພະຈິກນີ້, ທ່ານຄາວ ກິມ ຮຸນ, ເລຂາທິການແຫ່ງລັດກະຊວງການຕ່າງປະເທດແລະການຮ່ວມມືສາກົນກຳປູເຈຍກ່າວຢູ່ນະຄອນຫຼວງພະນົມເປັນວ່າ: ຜູ້ນຳອາຊຽນໄດ້ຕົກລົງກຳນົດວັນທີ31ທັນວາປີ2015ເປັນເວລາກຳນົດຫຼ້າສຸດຂອງການສ້າງຕັ້ງປະຊາຄົມອາຊຽນ.
ທ່ານຄາວ ກິມ ຮຸນກ່າວໃນກອງປະຊຸມຂ່າວພາຍຫຼັງກອງປະຊຸມສຸດຍອດອາຊຽນຄັ້ງທີ21ວ່າ, ໃນກອງປະຊຸມຄົບຄະນະທີ່ຈັດຂຶ້ນໃນມື້ດຽວກັນ, ຜູ້ນຳຂອງ10ປະເທດອາຊຽນຕົກລົງວ່າຈະສ້າງຕັ້ງປະຊາຄົມອາຊຽນກ່ອນທ້າຍປີ2015, ຮອດເວລານັ້ນ, ມະເລເຊຍເຊິ່ງເປັນປະເທດປະທານໝູນວຽນອາຊຽນໃນປີ2015ຈະຈັດກິດຈະກຳສະເຫຼີມສະຫຼອງຢ່າງຍິ່ງໃຫຍ່.
ທ່ານຄາວ ກິມ ຮຸນກ່າວວ່າ, ໃນກອງປະຊຸມຄະນະກຳມະການທີ່ປຶກສາດ້ານເສດຖະກິດອາຊຽນທີ່ໄດ້ຈັດຂຶ້ນໃນຕອນບ່າຍວັນທີ18ພະຈິກນີ້, ຜູ້ເຂົ້າຮ່ວມກອງປະຊຸມໄດ້ປຶກສາຫາລືກ່ຽວກັບການເພິ່ມຜົນສະທ້ອນຂອງອາຊຽນແນວໃດພາຍໃຕ້ເບື້ອງຫຼັງດ້ານເສດຖະກິດທົ່ວໂລກໃນປະຈຸບັນນີ້. ໃນກອງປະຊຸມຍ່ອຍຫຼັງຈາກນັ້ນ, ຜູ້ນຳຂອງບັນດາປະເທດອາຊຽນໄດ້ແລກປ່ຽນຄວາມເຫັນກ່ຽວກັບບັນຫາທະເລຈີນໃຕ້, ສະຖານະການຕາເວັນອອກກາງ, ບັນຫານິວເຄຼຍແຫຼມເກົາຫຼີແລະອື່ນໆ.
ນອກນີ້, ກອງປະຊຸມຍັງໄດ້ຮັບຮອງເອົາທ່ານເລເລື່ອງມິງ, ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມຂຶ້ນເປັນເລຂາທິການໃຫຍ່ອາຊຽນຄົນໃໝ່, ປ່ຽນແທນທ່ານສຸຣິນ ພິດສຸວັນ, ເລຂາທິກາຍໃຫຍ່ອາຊຽນຄົນປະຈຸບັນທີ່ຈະໝົດໜ້າທີ່ໃນທ້າຍເດືອນທັນວາປີນີ້.