ສະຖານທູດລາວປະຈຳສປຈີນສະເຫລີມສະຫລອງວັນຊາດຄົບຮອບ 37 ປີ
(ພະນັກງານສະຖານທູດລາວປະຈຳຈີນຖ່າຍຮູບຮ່ວມກັບນັກສຶກສາລາວທີ່ຮຽນຢູ່ຈີນໃນໂອກາດວັນຊາດລາວຄົບຮອບ 37 ປີ)
ໃນຕອນຄໍ່າຂອງວັນທີ 1 ທັນວາ 2012 ນີ້, ສະຖານທູດລາວ ທີ່ ປັກກິ່ງ ຮ່ວມກັນກັບສະມາຄົມນັກສຶກສາລາວ ໄດ້ຈັດງານສະເຫຼີມສະຫຼອງວັນຊາດທີ 2 ທັນວາ ຄົບຮອບ 37 ປີຂຶ້ນ,ໂດຍມີ ພະນັກງານສະຖານທູດ, ຊ່ຽວຊານລາວ ແລະ ນັກສຶກສາລາວ ທີ່ກໍາລັງຮຽນຢູ່ປັກກິ່ງ ແລະ ເມືອງໃກ້ຄຽງ ເຂົ້າຮ່ວມທັງໝົດ 130 ຄົນ.
ໃນໂອກາດ ນີ້, ທ່ານ ສົມດີ ບຸນຄຸ້ມ, ເອກອັກຄະລັດຖະທູດລາວ ປະຈຳ ສປ ຈີນ ໄດ້ບັນຍາຍເອກະສານການເມືອງຈຳນວນໜຶ່ງ ຊຶ່ງໃນນັ້ນມີເອກະສານມູນເຊື້ອວັນ ຊາດ 37 ປີ, ແລະເອກະສານຜົນສຳເລັດການເປັນເຈົ້າພາບຈັດກອງປະຊຸມອາເຊັມ 9 ໃນຕົ້ນເດືອນພະຈິກຜ່ານມາໃຫ້ແກ່ນັກສຶກສາຮັບຮູ້ທັງເປັນການຊຸກຍູ້ໃຫ້ເອົາໃຈໃສ່ໃນການສຶກ ສາຮໍ່າຮຽນເພື່ອນຳເອົາ ຄວາມຮູ້ຄວາມສາມາດໄປພັດທະນາປະເທດຊາດໃນອານາຄົດ.
ນອກຈາກນັ້ນ, ຍັງໄດ້ມີການແຂ່ງຂັນກິລາ ເຊັ່ນ: ກິລາຕີດອກປີກໄກ່, ແລະກິລາເປຕັງ.ພ້ອມນັ້ນ,ຍັງມີການສະແດງສິນລະປະຂອງນັກສຶກສາອັນເປັນການເຮັດໃຫ້ການສະ ເຫຼີມສະຫຼອງວັນຊາດຄົບຮອບ 37 ປີ ມີເນື້ອໃນ ແລະ ມີບັນຍາກາດມ່ວນຊື່ນ.
