ໃຊ້ເວລາກັບຄອບຄົວແບບໃດໃຫ້ມີຄຸນນະພາບ
(GMT+08:00) 2012-12-11 09:47:41 cri
ບາງຄອບຄົວທີ່ອາໄສຢູ່ໃນຕົວເມືອງ ມັກຈະມີບັນຫາຢ່າງໜຶ່ງທີ່ແກ້ບໍ່ຕົກ ນັ້ນຄື ບັນຫາເລື່ອງ " ເວລາ " ຫລາຍຄົນຈົ່ມວ່າເວລາໃນແຕ່ລະມື້ຊ່າງໜ້ອຍແທ້! ທີ່ຈິງແລ້ວມື້ໜື່ງກໍ່ມີຢູ່ 24 ຊົ່ວໂມງ ເວລາຂອງແຕ່ລະຄົນມີໃນໜື່ງງມື້ແມ່ນເທົ່າໆກັນໝົດຫັ້ນລະ! ຕ່າງແຕ່ວ່າຜູ້ໃດຈະບໍຫິຫານເວລາທີ່ເປັນຂອງໂຕເອງໃຫ້ເໝາະສົມ ບໍ່ວ່າຈະເຮັດວຽກໃນເຮືອນ, ໜ້າທີ່ການງານຕ່າງໆ ເບິ່ງແຍງລູກທີ່ກຳລັງໃຫຍ່ ແຕ່ແທ້ທີ່ຈິງແລ້ວເວລາບໍ່ແມ່ນບັນຫາ ຖ້າເຮົາຮູ້ຈັກການບໍລິຫານເວລາທີ່ມີໃຫ້ແກ່ຄອບຄົວຢ່າງມີຄຸນນະພາບ. ແລ້ວຈະໃຊ້ເວລາກັບຄອບຄົວແບບໃດໃຫ້ມີຄຸນນະພາບ? ມື້ນີ້ ມີຂໍ້ມູນດີໆ ມາຝາກທ່ານໃດສົນໃຈລອງນໍາໄປປະຕິບັດກັນເບິ່ງເນາະ. ພໍ່-ແມ່ຄວນຄິດວ່າ ການໃຫ້ເວລາທີ່ມີຄຸນນະພາບກັບລູກ ບໍ່ໄດ້ໝາຍເຖິງກິດຈະກຳທີ່ຕ້ອງໃຊ້ເງີນເຊັ່ນ: ພາລູກໄປເລາະຊື້ເຄື່ອງ ນັ້ນບໍ່ແມ່ນການໃຊ້ເວລາຮ່ວມກັນ ແຕ່ຄວນໃຊ້ເວລາຢູ່ກັບລູກແບບໂຕຕໍ່ໂຕ ຖ້າວ່າບໍ່ມີເວລາແທ້ກໍ່ຂັບລົດໄປສົ່ງ ຫລື ໄປຮັບລູກຢູ່ໂຮງຮຽນ ເປັນວິທີທີ່ພໍ່-ແມ່ຫລາຍຄົນໃຊ້ໄດ້ຜົນມາແລ້ວ ຫລື ໃຊ້ເວລາໃຫ້ໄດ້ຢູ່ຮ່ວມກັນມັນຈະຊ່ວຍໃຫ້ລູກຮູ້ສຶກວ່າມີຄວາມອົບອຸ່ນ ບາງເທື່ອລູກມີບັນຫາຫຍັງກໍ່ຈະກ້າເວົ້າກ້າລົມສູ່ພໍ່ແມ່ຟັງ ສາມາດແກ້ບັນຫາຊ່ວຍລູກໄດ້ ບໍ່ວ່າຈະເປັນເລື່ອງການຮຽນ ຫຼື ເລື່ອງອື່ນໆ ພໍ່-ແມ່ຄວນຄ່ອຍສໍ້ຄ່ອຍຖາມບັນຫາ ຫລື ຄວາມໃນໃຈຂອງລູກເພື່ອຈະໄດ້ມີສ່ວນຮ່ວມໃນຊີວິດສ່ວນຫນຶ່ງຂອງລູກ. ບໍ່ຄວນເບິ່ງໂທລະພາບ ຫລື ຫລິ້ນຄອມພິວເຕີກັບລູກ ເພາະກິດຈະກຳນີ້ຈະເຮັດໃຫ້ແຕ່ລະຄົນໃຫ້ຄວາມສົນໃຈໄປທີ່ຈໍສີ່ຫລ່ຽມ ແທນທີ່ຈະໃຫ້ຄວາມສົນໃຈເຊິ່ງກັນແລະກັນ ຄວນເຮັດກິດຈະກໍາຮ່ວມກັນເຊັ່ນ: ແຕ້ມຮູບ ຫລື ລະບາຍສີຮ່ວມກັນ. ຄວນຫາເວລາໃນການສອນໜັງສືໃຫ້ລູກ ເປັນວິທີໜຶ່ງໃນການສ້າງຄວາມໃກ້ຊິດກັບລູກ ພໍ່-ແມ່ຈະໄດ້ຮັບຮູ້ບັນຫາໃນການຮຽນຂອງລູກ ແລະ ຈະໄດ້ຫາວິທີແກ້ໄຂຮ່ວມກັນ ນອກຈາກຈະໄດ້ໃກ້ຊິດກັບລູກແລ້ວ ຍັງໄດ້ຊ່ວຍລູກແກ້ບັນຫາໃນການຮຽນນໍາອີກ. ຄວນໃຫ້ຄວາມສຳຄັນກັບການຮັບປະທານອາຫານຮ່ວມກັນ ເວລາຮັບປະທານອາຫານເປັນເວລາທີ່ດີທີ່ຈະເປີດໂອກາດໃຫ້ສະມາຊິກໄດ້ເວົ້າໄດ້ລົມກ່ຽວກັບຊີວິດຂອງຕົນ ພໍ່-ແມ່ ຄວນໃຫ້ຄວາມສຳຄັນກັບໄລຍະເວລານີ້ ພະຍາຍາມໃຫ້ລູກມາຮັບປະທານອາຫານພ້ອມໜ້າກັນ. ພໍ່-ແມ່ຄວນກຳນົດກິດຈະກຳທີ່ເຮັດໃນຊີວິດປະຈຳວັນຮ່ວມກັບລູກ ບາງກິດຈະກຳອາດໃຊ້ເວລາບໍ່ເທົ່າໃດ ແຕ່ກໍສາມາດເຮັດເປັນກິດຈະວັດໄດ້ເຊັ່ນ ການເຮັດວຽກງານເຮືອນນຳກັນ ຫລື ມອບໝາຍໃຫ້ລູກເຮັດວຽກເຮືອນທີ່ຖະຫນັດ ພໍ່-ແມ່ຄອຍຖ້າສອນ ຫລື ເບິ່ງຢູ່ຫ່າງໆ ນອກຈາກຈະເຮັດໃຫ້ໄດ້ໃຊ້ເວລາຢ່າງມີຄຸນນະພາບຮ່ວມກັນແລ້ວຍັງເປັນການປູກຝັງເລື່ອງຫນ້າທີ່ ແລະ ຄວາມຮັບຜິດຊອບໃຫ້ແກ່ລູກນໍາອີກ. ວາງແຜນເຮັດກິດຈະກຳນອກເຮືອນ ກິດຈະກຳນອກເຮືອນຈະຊ່ວຍໃຫ້ພໍ່-ແມ່ມີປະຕິສຳພັນກັບລູກ ແລະ ຊ່ວຍເພີ່ມຄວາມກະຕືລືລົ້ນຂອງລູກ ຊຶ່ງຈະນຳໄປສູ່ການສົນທະນາເວົ້າລົມລະຫວ່າງພໍ່-ແມ່-ລູກ ເຮັດກິດຈະກຳທີ່ລູກສົນໃຈຮ່ວມກັບລູກເຊັ່ນ: ຫລິ້ນກີລາ, ປູກຕົ້ນໄມ້ແລະອື່ໆ ຈະຊ່ວຍໃຫ້ຄອບຄົວໄດ້ໃຊ້ເວລາຮ່ວມກັນຢ່າງມີຄວາມສຸກ.
