ຄໍາຂວັນວັນສິ່ງແວດລ້ອມໂລກ
ດັ່ງທີ່ພວກເຮົາຮູ້ນໍາກັນແລ້ວວ່າ ຕົ້ນອາທິດທີ່ຜ່ານມາແມ່ນວັນສິ່ງແວດລ້ອມໂລກກໍ່ຄືວັນທີ 5 ມີຖຸນາ ຄໍາຂວັນສໍາລັບວັນສິ່ງແວດລ້ອມໂລກປີນີ້ແມ່ນ " ພວກເຮົາທຸກຄົນຕ້ອງມີສ່ວນຮ່ວມໃນການພັດທະນາເສດທະກິດສີຂຽວ " ຊື່ງເປັນ " ການພັດທະນາແບບຍືນຍົງ " ໝາຍຄວາມວ່າ: ເປັນການພັດທະນາທີ່ຕິດພັນກັບການປົກປັກຮັກສາສິ່ງແວດລ້ອມ ຕິດພັນກັບການຄຸ້ມຄອງ ແລະ ນໍາໃຊ້ຊັບພະຍາກອນທໍາມະຊາດໃຫ້ເກີດປະໂຫຍດສູງສຸດ ແກ່ເສດຖະກິດ-ສັງຄົມ ແລະ ສົ່ງຜົນກະທົບໜ້ອຍທີ່ສຸດຕໍ່ສິ່ງແວດລ້ອມ.
ເຊິ່ງແມ່ນໜ້າທີ່ຂອງໝົດທຸກຄົນຢູ່ໃນສັງຄົມ ຄວນມີສ່ວນຮ່ວມຊ່ວຍກັນ ຄົນເຮົາທຸກຄົນລ້ວນແຕ່ມີຊີວິດຕິດພັນກັບທໍາມະຊາດ ສິ່ງແວດລ້ອມ ຊັບພະຍາກອນທໍາມະຊາດ ແມ່ນປະກອບມີສິ່ງທີ່ມີຊີວິດ ແລະ ສິ່ງທີ່ບໍ່ມີຊີວິດເຊັ່ນ: ດິນ, ນໍ້າ, ພືດພັນ, ຕົ້ນໄມ້, ສັດນໍ້າ, ສັດປ່າ, ຈຸລິນຊີ, ອາກາດ, ແຮ່ທາດ ແລະ ຊັບພະຍາກອນອື່ນໆທີ່ເກີດຂື້ນຕາມທໍາມະຊາດ. ໃນນີ້ ຊັບພະຍາກອນປ່າໄມ້ແມ່ນມີຄວາມສໍາຄັນຫຼາຍຕໍ່ລະບົບນິເວດທໍາມະຊາດ ນອກຈາກເປັນແຫຼ່ງອາຫານຕົ້ນຕໍສໍາລັບມະນຸດ ແລະ ທຸກສິ່ງທີ່ມີຊີວິດເປັນແຫຼ່ງພະລັງງານແລ້ວ.
ຍັງເປັນບ່ອນຮັກສາແຫຼ່ງນໍ້າຮັກສາຄຸນນະພາບຂອງດິນ ປ້ອງກັນໄພພິບັດທາງທໍາມະຊາດ ປ້ອງກັນການເຊາະເຈື່ອນຂອງດິນ ຕ້ານໄພນໍ້າຖ້ວມ, ຕ້ານໄພແຫ້ງແລ້ງ, ຕ້ານການເປັນທະເລຊາຍ, ຫຼຸດຜ່ອນຄວາມຮຸນແຮງຂອງລົມພາຍຸ, ຜະລິດທາດອົກຊີແຊນ ແລະ ດູດຊັບເອົາອາຍກາກບອນ, ເພື່ອຫຼຸດຜ່ອນສະພາວະໂລກຮ້ອນເຮັດໃຫ້ອາກາດຊຸ່ມຊື່ນ ເປັນບ່ອນຢູ່ອາໄສຂອງທຸກສິ່ງທີ່ມີຊີວິດ ແລະ ເປັນພື້ນຖານໃຫ້ແກ່ການພັດທະນາເສດຖະກິດ-ສັງຄົມ.
ແຕ່ວ່າຊັບພະຍາກອນທໍາມະຊາດຂອງໂລກກໍາລັງຢູ່ໃນສະພາບທີ່ຖືກຂົ່ມຂູ່ຢ່າງໜັກໜ່ວງຈາກການທໍາລາຍຂອງມະນຸດດ້ວຍຫຼາຍຮູບການເຊັ່ນ: ການຂຸດຄົ້ນປ່າໄມ້ແບບຊະຊາຍເກີນຂອບເຂດຟຸມເຟືອຍ ແລະ ບໍ່ຍືນຍົງນໍາໄປສູ່ການປ່ຽນແປງໂຄງສ້າງລະບົບນິເວດທໍາມະຊາດຂອງໂລກ. ເຮັດໃຫ້ທໍາມະຊາດສູນເສຍຄວາມສົມດູນ ຊີວະນາໝພັນ ຫຼຸດໜ້ອຍຖອຍລົງ ບາງຊະນິດພັນພຶດ ແລະ ສັດທີ່ມີຄ່າ ແລະ ຫາຍາກ ໄດ້ສູນພັນໄປ ທີ່ອາໃສຂອງສັດປ່າກໍຖືກທໍາລາຍ ແຫຼ່ງນໍ້າທໍາມະຊາດບົກແຫ້ງ ດິນເຊື່ອມໂຊມ ດິນຟ້າອາກາດມີການປ່ຽນແປງ ກໍ່ສົ່ງຜົນເຮັດໃຫ້ອຸນຫະພູມຂອງໂລກຮ້ອນຂື້ນ ເກີດມີໄພພິບັດທາງທໍາມະຊາດເຊັ່ນ: ມີລົມພາຍຸທີ່ຂື້ນ ມີລັກສະນະແຜ່ລາມ ແລະ ບໍ່ສາມາດຄາດຄະເນລ່ວງໜ້າໄດ້ ພາໃຫ້ເກີດໄພນໍ້າຖ້ວມກະທັນຫັນ ແລະ ໄພແຫ້ງແລ້ງຢ່າງຮຸນແຮງ ເມື່ອມີໄພທໍາມະຊາດຄືແນວນັ້ນກໍໃຫ້ເກີດພະຍາດລະບາດອື່ນໆຕາມມາ ສົ່ງຜົນກະທົບຢ່າງໜັກໜ່ວງຕໍ່ຜົນຜະລິດ ຕໍ່ການຮັບປະກັນດ້ານສະບຽງອາຫານ ເຂົ້າຍາກໜາກແພງ.
