ຂໍ້ມູນທົ່ວໄປປະເທດຍີ່ປຸ່ນ
ຕັ້ງຢູ່ດ້ານຝັ່ງຕະເວັນອອກຂອງທະວີບອາຊີ ຫລືທາງຕອນ ເໜືອຂອງມະຫາສະມຸດປາ.ຊິຟິກໝູ່ເກາະຍີ່ປຸ່ນທອດຕົວເປັນຮູບໂຄ້ງເໝືອນສ້ຽວດວງພະຈັນ, ໂດຍມີຄວາມຍາວທັງໝົດ 3, 800 ກິໂລແມັດ.
ລັກສະນະພູມສັນຖານຂອງປະເທດ ເປັນປະເທດໝູ່ເກາະປະກອບດ້ວຍເກາະໃຫຍ່ນ້ອຍປະມານ 3, 900 ເກາະ, ໂດຍມີເກາະໃຫຍ່ທີ່ສຳຄັນ 4 ເກາະ ຄື 1) ເກາະຮອກໄກໂດ (83, 517 ກິໂລຕາແມັດ.) 2) ເກາະຮອນຊູ (231, 012 ກິໂລຕາແມັດ) 3) ເກາະຊິໂກກຸ (18, 800 ກິໂລຕາແມັດ) 4) ເກາະກິວຊູ (44, 379 ກິໂລຕາແມັດ.).
ລັກສະນະພູມິປະເທດໂດຍທົ່ວໄປເປັນພູເຂົາກວມເອົາ 71 ສ່ວນຮ້ອຍ ,ພື້ນທີ່ທັງໝົດຂອງຍີ່ປຸ່ນເປັນພູເຂົາ, 25 ສ່ວນຮ້ອຍເປັນທົ່ງພຽງ, ຊຶ່ງໃຊ້ເປັນພື້ນທີ່ທາງການກະສິກຳໄດ້ພຽງ 11 ສ່ວນຮ້ອຍເທົ່ານັ້ນ, ຍີ່ປຸ່ນມີພູເຂົາໄຟຫລາຍປະມານ 1 ໃນ 10 ຂອງຈຳນວນພູເຂົາໄຟໃນໂລກ. ໂດຍມີພູເຂົາຟູຈິເປັນພູເຂົາທີ່ສູງທີ່ສຸດໃນປະເທດ (3, 776 ແມັດ) ແລະເປັນພູເຂົາໄຟທີ່ສະຫງົບຢູ່ແຕ່ຍັງບໍ່ມອດ ແລະຈາກການທີ່ຍີ່ປຸ່ນຢູ່ໃນເຂດທີ່ມີພູເຂົາໄຟຫລາຍເຮັດໃຫ້ມີແຜ່ນດິນໄຫວເກີດຂຶ້ນເປັນຈຳນວນຫຼາຍປະມານ 500 ຄັ້ງຕໍ່ປີ.
ນະຄອນຫຼວງຂອງປະເທດຍີ່ປຸ່ນມີຊື່ວ່າ: ນະຄອນຫຼວງໂຕກຽວ, ປະເທດຍີ່ປຸ່ນມີເນື້ອທີ່ປະມານ 377, 944 ກິໂລຕາແມັດປະກອບດ້ວຍພື້ນທີ່ດິນ 374, 920 ກິໂລຕາແມັດ. ມີປະຊາກອນປະມານ 127, 799, 000 ຄົນ (2011), ຊຶ່ງນັບເປັນປະເທດທີ່ມີປະຊາກອນຫລາຍທີ່ສຸດເປັນອັນດັບທີ່ 10 ຂອງໂລກ, ຄວາມຫນາແຫນ້ນຂອງປະຊາກອນປະມານ 337 ຄົນ/ກິໂລຕາແມັດ.
ພູມອາກາດ ມີ 4 ລະດູຫລັກທີ່ມີຄວາມແຕກຕ່າງກັນຢ່າງຊັດເຈນຄື: ລະດູໃບໄມ້ປົ່ງ ອາກາດອົບອຸ່ນ, ລະດູຮ້ອນອາກາດຮ້ອນຊຸ່ມໂດຍມີໄລຍະລະດູຝົນສັ້ນໆ ປະມານ 1 ເດືອນ ໃນໄລຍະຕົ້ນລະດູ, ລະດູໃບໄມ້ຫຼົ່ນອາກາດອົບອຸ່ນ ໂດຍມີພາຍຸໄຕ້ຝຸ່ນຫລາຍໃນໄລຍະເດືອນກັນຍາ, ລະດູໜາວອາກາດໜາວມີຫິມະຕົກຫລາຍທາງພາກເໜືອຂອງປະເທດແລະແຄມທະເລຍີ່ປຸ່ນສ່ວນທາງໃຕ້ແລະແຄມຝັ່ງມະຫາສະມຸດປາຊິຟິກອາກາດຈະອົບອຸ່ນກວ່າ.
