ສິ່ງທີ່ຄວນ ແລະ ບໍ່ຄວນເຮັດໃນປະເທດກຳປູເຈຍ
ຄວນໃຫ້ຄວາມເຄົາລົບຕໍ່ຜູ້ທີ່ມີອາຍຸສູງກວ່າ, ຄວນໃຫ້ເຈົ້າຂອງເຮືອນເລີ່ມກິນອາຫານກ່ອນ, ຫຼັງຈາກນັ້ນຜູ້ມາຢາມຈຶ່ງຮັບປະທານອາອານຕໍ່ໄປໄດ້, ຄວນໃຫ້ຜູ້ອາວຸໂສທີ່ສຸດຢູ່ໃນພາເຂົ້າແລ້ວຈຶ່ງເລີ່ມກິນ, ບໍ່ຄວນຢືນຕີນໃສ່ບຸກຄົນອື່ນ, ຕົວຢ່າງ: ເວລານັ່ງຄວນພັບຕີນເຂົ້າໄວ້ໃຫ້ເບິ່ງແລ້ວສຸພາບຮຽບຮ້ອຍ.
ບໍ່ຄວນຍ່າງຂ້າມຂາຄົນອື່ນ, ຢູ່ກຳປູເຈຍໃນເວລາທັກທາຍຜູ້ຊາຍສາມາດຈັບມືກັນໄດ້ເພື່ອສະແດງຄວາມຮັກແພງແລະມິດຕະພາບທີ່ດີ. ເມື່ອຍ່າງຜ່ານຄົນທີ່ກຳລັງລົມກັນຢູ່ຄວນກົ້ມຫົວເລັກນ້ອຍ (ຖິາຢ່າງຜ່ານຊື່ໆຖືວ່າບໍ່ມີມາລະຍາດ) ເມື່ອຂີ່ລົດຖີບຫຼືລົດຈັກ ເວລາຜ່ານວັດຄວນຜ່ອນຄວາມໄວລົງແລະເວລາເຂົ້າວັດຄວນປົດໝວກທຸກຄັ້ງແມ່ຍິງບໍ່ຄວນແຕ່ງໜ້າຫຼາຍເກີນໄປແລະບໍ່ຄວນແຕ່ງກາຍບໍ່ສຸພາບເຂົ້າວັດ, ເມື່ອພົບເຫັນພະສົງສາມະເນາຄວນປົດໝວກທຸກຄັ້ງ ພ້ອມກົ້ມໜ້າໜ້ອຍໜຶ່ງໃນເວລາຍ່າງຜ່ານ.
ບໍ່ຄວນວິພາກວິຈານການເມືອງ, ຫ້າມບໍ່ໃຫ້ຖ່າຍຮູບສັນຍາລັກທາງການທະຫາ,ຫ້າມຈັບຕ້ອງຫົວຂອງຜູ້ອື່ນ, ເພາະຄົນກຳປູເຈຍຖືວ່າຫົວເປັນສ່ວນສຳຄັນທີ່ສຸດຂອງຮ່າງກ່າຍ, ຕ້ອງປົດເກີບທຸກຄັ້ງເມືອເຂົ້າເຮືອນຂອງຄົນອື່ນ, ນຸ່ງຖືປົກປິດແລະສຸພາບຮຽບຮ້ອຍ, ແມ່ຍິງບໍ່ຄວນໃສ່ກະໂປ່ງຫຼືໂສ້ງຫຼືສະເກິດສັ້ນແລະບໍ່ຄວນເປີດບ່າໄຫຼ່, ສ່ວນຜູ້ຊາຍຄວນໃສ່ເສື້ອມີປົກແລະໂສ້ງຂາຍາວ. ຄວນມີມາລະຍາດຕໍ່ເພດກົງກັນຂ້າມແລະບໍ່ຄວນຈັບມືຄົນກຳປູເຈຍໃນເວລາຖ່າຍຮູບນຳກັນ ເພາະອາດຈະເຮັດໃຫ້ເຂົ້າໃຈຜິດ.
ເມື່ອເຂົ້າບໍລິເວນວັດຄວນປິດໂທລະສັບ, ເຄື່ອງຫຼີ້ນ mp3 ຫຼືເຄື່ອງສຽງທຸກຢ່າງ, ບໍ່ຄວນໃຊ້ສຽງດັງໃນເຂດວັດ. ບໍ່ຄວນຫໍຂອງຂວັນດ້ວຍເຈ້ຍສີຂາວ, ເພາະຖືວ່າເປັນສີຂອງການໄຫວ້ຄວາມທຸກ, ຄວນໃຊ້ເຈ້ຍທີ່ມີສີສົດໃສ. ຖ້າຈະເອົາຂອງຂວັນຫຼືນາມບັດໃຫ້ຜູ້ອື່ນຄວນຢືນໃຫ້ດ້ວຍສອງມືຫຼືຖ້າມືດຽວແມ່ນຄວນຈັບຢືນໃຫ້ດ້ວຍມືຂວາ ຖືວ່າເປັນມາລະຍາດທີ່ດີແລະໃຫ້ກຽດເຊິ່ງກັນແລະກັນ. ການຮັບຂອງຂວັນຈາກຄົນອື່ນຄວນຮັບດ້ວຍສອງມືແລະຖ້າໄດ້ຮັບຂອງຂັວນແລ້ວບໍ່ຄວນເປີດຫໍ່ຂອງຂວັນທັນທີ.
