ທ່ານ ດຣ ທອງຄຳ ອ່ອນມະນີສອນ ແມ່ນນັກຂຽນຄົນທຳອິດຂອງລາວທີ່ໄດ້ຮັບລາງວັນ " ຊີໄຣ "
ລາງວັນ ຊີໄຣ ມີຊື່ເຕັມວ່າລາງວັນວັນນະກຳສ້າງສັນຍອດຢ້ຽມແຫ່ງອາຊຽນ(Southeast Asian Writers Award) ເລີ່ມກໍ່ຕັ້ງເມື່ອປີ ຄສ 1979, ເປັນລາງວັນປະຈຳປີມອບໃຫ້ນັກກະວີແລະນັກຂຽນໃນ 10 ປະເທດອາຊຽນ ໃນປັດຈຸບັນ.
ໂດຍຜົນງານຂຽນທີ່ໄດ້ຮັບລາງວັນເປັນຜົນງານທີ່ໄດ້ຮັບການຍ້ອງຍໍຢ່າງກວ້າງຂວາງແລະມີຜົນງານການຂຽນຫຼາຍຮູບແບບທີ່ໄດ້ລາງວັນເຊັ່ນ: ກະວີນິພົນ, ເລື່ອງສັ້ນ, ນະວະນິຍາຍ, ລະຄອນເວທີ, ຄະຕິຊົນວິທະຍາ ລວມທັງຜົນງານການຂຽນທາງດ້ານສາລະຄະດີ ແລະຜົນງານການຂຽນທາງສາສະໜາອີກດ້ວຍ.
ພິທີການມອບລາງວັນຈະຈັດຂື້ນຢູ່ທີນະຄອນຫຼວງບາງກອງ, ປະເທດໄທນັບແຕ່ໄດ້ມີການກໍ່ຕັ້ງລາງວັນຊີໄຣຂື້ນ, ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ປະກອບມີ 5 ປະເທດ: ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ ແລະໄທ, ຕໍ່ມາປີ 1984 ບຼູໄນເຂົ້າເປັນສະມາຊິກ, ຫວຽດນາມເຂົ້າເປັນສະມາຊິກປີ 1995 , ລາວແລະມຽນມາເຂົ້າເປັນສະມາຊິກໃນປີ 1997 ແລະກຳປູເຈຍເຂົ້າເປັນສະມາຊິກໃນປີ 1999.
ທ່ານ ດຣ ທອງຄໍາ ອ່ອນມະນີສອນເປັນນັກກະວີທີມີສາຍຕາແຫຼມຄົມຂຽນ ບົດກະວີໄດ້ເລິກເຊິ່ງ ກິນໃຈຜູ້ອ່ານ ໃຊ້ສັບພາສາລ່ຽນໄຫຼ ມ່ວນອອນຊອນ ມີຄວາມສຳນານໃນວາດຂຽນແບບສຳຜັດ ພະຍັນຊະນະໄດ້ຢ່າງກົມກືນ, ຍ້ອນແນວນັ້ນຈຶ່ງເຮັດໃຫ້ທ່ານເປັນນັກກະວີທີ່ໂດດເດັ່ນທ່ານໜຶ່ງໃນວົງການກະວີລາວ, ເມື່ອມີການປະກວດຍາມໃດທ່ານ ດຣ ທອງຄຳ ອ່ອນມະນີສອນ ໄດ້ສົ່ງບົດເຂົ້າຮ່ວມແລ້ວຈະໄດ້ຮັບລາງວັນທີ 1 ທຸກເທື່ອ.
ທ່ານ ດຣ ທອງຄໍາ ອ່ອນມະນີສອນ ມີຜົນງານບົດກະວີລົງພິມໃນໜ້າໜັງສືພິມແລະວາລະສານຕ່າງໆ ເປັນຈຳນວນຫຼວງຫຼາຍ ແລະຍັງມີຜົນງານພິມເປັນເຫຼັ້ມຮ່ວມກັບນັກກະວີທ່ານອື່ນ ແລະຜົນງານດ້ານການຄົ້ນຄວ້າຮຽບຮຽງ ແລະຂຽນເປັນປື້ມຢ່າງຫຼວງຫຼາຍເຊັ່ນ: " ອຸທິຍານກະວີ " 1984, " ໄປຕາມທາງຂອງພັກ " 1984, " ຫອມກິ່ນຈຳປາ " 1987 (ຮ່ວມກັບນັກກະວີທ່ານອື່ນໆ), " ວັດຈະນານຸກົມລາວ " 1992, "ຮັກຈາກໃຈ "1995, "40 ປີມະຫາໄຊ"1995, " ບັນທຶກໃນຄຸກຂອງປະທານໂຮ່ຈິມິນ " 1995 (ແປເປັນກອນລາວ), " ສຸພາສິດສອນໃຈ "ເຫຼັ້ມ 1 ປີ 1995, ເຫຼັ້ມ 2 ປີ 1996, " ພູມປັນຍາສຽວສະຫວາດ " 1997, " ນິທານສຸພາສິດ 39 ເລື່ອງ " 1997, " ພາສາລາວ ສັບແລະຄວາມໝາຍ " 1997, " ເພື່ອຮັກເພື່ອນາງ " 1998, " ມໍລະດົກລຳສີພັນດອນ -ລຳໂສມ" 1998, " ປະທີບໃຈ " 1999, " ເສັ້ນທາງສາຍທໍາ " 2000, " ຊີໄຣລ້ຳລຶກ " 2000, " ຄົມເດັດ ເຜັດເຄັມ " 2004, ບົດບາດນາງ ສຸມຸນທາ-ໄຟປັນຍາສິນໄຊ ເຂົ້າພິມໃນປີ 2011.
ທ່ານ ດຣ ທອງໍາຄໍາ ອ່ອນມະນີສອນ ແມ່ນນັກຂຽນຄົນທຳອິດຂອງລາວທີ່ໄດ້ຮັບລາງວັນ " ຊີໄຣ " ລາງວັນວັນນະກຳສ້າງສັນຍອດຢ້ຽມແຫ່ງອາຊຽນໃນປີ 1998 ຈາກບົດກະວີ " ນ້ຳຕາແມ່ " ຢູ່ໃນຊຸດ" ເພື່ອຮັກເພື່ອນາງ "
ປີ 2008 ທ່ານ ດຣ ທອງຄໍາ ອ່ອນມະນີສອນ ໄດ້ຮັບລາງວັນແມ່ນ້ຳຂອງ, ລາງວັນວັນະກຳສ້າງສັນດີເດັ່ນຂອງສາມຊາດອິນດູຈີນ(ລາວ-ຫວຽດນາມແລະກຳປູເຈຍ), ແລະໃນປີ 2010 ໄດ້ຮັບນາມມະຍົດເປັນສິນລະປິນແຫ່ງຊາດສາຂາວັນນະກຳ.
ນ້ຳຕາແມ່
(ລາງວັນທີ່ໄດ້ຮັບລາງວັນຊີໄຣປະຈຳປີ 1998)
ແມ່ນີ້ສຸດທີ່ກັ້ນເກື່ອນນ້ຳ ຕາໂສກລົງອົກ ລູກເອີຍ!
ມັນຫາກນອງຫຼາມໄຫຼ ຫຼັ່ງລົງລິນແກ້ມ
ແນມຄືນຫຼັງຫຼຽວເມືອໜ້າ ຄະນິງຫາເຫັນອາດີດ
ຄືມີດຄົມ ຄວັດຄ້ວານ ຂັດໄວ້ລະຫວ່າງຊວງ ນີ້ເດ
ດວງໃຈແມ່ມອບໃຫ້ ອາໄລລູກບຸດຕີ
ມີທຸກແສນທີ່ຖົມ ທັບມາບໍ່ຍອມຢ້ານ
ທຸກເມື່ອຊອມຖະໜອມນ້ອຍ ຄອຍອອຍອ້ອຍອິ່ນ
ອິນທະຫວາລູກຫຼ້າ ໃຫ່ຍມາລືມແມ່ໄດ້
ນາງສັງປີ້ນປ່ຽນໃຈ.
