ອິຕາລີ ແດນດິນຖິ່ນມົນຂັງ
Italia ອິຕາລີ ມີຊື່ຢ່າງເປັນທາງການວ່າ " ສາທາລະນະລັດອິຕາລີ " ຕັ້ງຢູ່ໃນທະວີບເອີລົບທາງຕອນໃຕ້. ນອກຈາກນີ້ ອິຕາລີຍັງມີແຫລ່ງປະຫວັດສາດແລະມີສະຖານທີ່ທີ່ຖືກຂຶ້ນທະບຽນໃຫ້ເປັນມໍລະດົກໂລກຫລາຍກວ່າປະເທດອື່ນໃນໂລກອີກດ້ວຍ, ຊຶ່ງມີທັງມໍລະດົກໂລກທາງວັດທະນະທຳ ແລະ ມໍລະດົກໂລກທາງທຳມະຊາດ ເວົ້າໄດ້ວ່າເປັນປະເທດທີ່ພຽບພ້ອມແທ້ໆ.
Roma (ໂລມ) ເປັນເມືອງຫລວງທີ່ຕັ້ງຢູ່ທາງຕອນກາງຂອງປະເທດ ແລະ ເປັນທີ່ຕັ້ງຂອງນະຄອນລັດວາຕິກັນ, ໂລມມີປະຫວັດສາດທີ່ຍາວນານກວ່າ 2, 800 ປີ ໂດຍມີບົດບາດຫລາຍທີ່ສຸດໃນອາລະຍະທຳຕະເວັນຕົກ ແລະ ເປັນອານາຈັກທີ່ໃຫຍ່ທີ່ສຸດໃນໂລກໃນອະດີດ, ໂດຍເປັນເມືອງຫລວງຂອງອານາຈັກຕ່າງໆຢ່າງຫລວງຫລາຍ, ມາຮອດປະຈຸບັນຈຶ່ງກາຍເປັນເມືອງຫລວງຂອງປະເທດອິຕາລີຕັ້ງແຕ່ປີ 1870 ເປັນຕົ້ນມາ, ນະຄອນໂລມເປັນເມືອງແຫ່ງສິລະປະຢ່າງແທ້ຈິງ ບໍ່ວ່າຈະຢູ່ຕາມມຸມໃດ ເປັນສິ່ງທີ່ຕ້ອງໄດ້ພົບເຫັນກັບງານປະຕິມາກຳແກະສະຫລັກຫີນອ່ອນທີ່ມີສີລະປະດ້ານວິຈິດສິນຫລວງຫລາຍຢູ່ຫລາຍແຫ່ງ, ນະຄອນໂລມຍັງມີສະຖານທີ່ທ່ອງທ່ຽວເຊີງປະຫວັດສາດ ແລະ ສິລະປະວັດທະນະທຳຢ່າງຫລວງຫລາຍ.
Basilica of Saint Peter (ມະຫາວິຫານເຊນປີເຕີ) ຕັ້ງຢູ່ໃນນະຄອນລັດວາຕິກັນໃຈກາງນະຄອນໂລມ ແລະ ເປັນມະຫາວິຫານຫລັກໜຶ່ງໃນສີ່ຂອງນະຄອນໂລມ ທີ່ອອກແບບໂດຍສິລະປະອັດສະລິຍະ ໄມເຄີນ ແອງເຈໂລ. ມະຫາວິຫານເຊນປີເຕີເປັນສິ່ງປຸກສ້າງທີ່ໃຫຍ່ແລະສຳຄັນທີ່ສຸດໃນນະຄອນລັດວາຕິກັນ ສ້າງສຳເລັດເມື່ອປີ ຄ. ສ.1626 ສາມາດບັນຈຸຄົນໄດ້ເຖິງ 60, 000 ຄົນ.
ອິຕາລີ ເພັດນ້ຳງາມແຫ່ງມໍລະດົກໂລກເລີ່ມຈາກການຮູ້ຈັກເມືອງປິຊາກັນກ່ອນ, ເມືອງທີ່ເປັນອີກໜຶ່ງໃນມໍລະດົກໂລກຂອງອິຕາລີທີ່ໄດ້ຮັບການຮັບຮອງໂດຍອົງການຍູເນດໂກໄປເມື່ອປີ ຄ.ສ.1987 ເຊິ່ງເປັນເມືອງທີ່ຍາງໄປທາງໃດກໍລ້ວນແລ້ວແຕ່ເປັນມໍລະດົກໂລກທັງນັ້ນ, ເປັນສິ່ງທີ່ໜ້າປະທັບໃຈອີ່ຫຼີ.
Tower of Pisa (ຫໍເອນເມືອງປິຊາ) ຕັ້ງຢູ່ທີ່ເມືອງປິຊາມີຮູບຊົງກະບອກ 8 ຊັ້ນ ສູງ 55 ແມັດ 87 ຊັງຕິແມັດ, ມີຄວາມງຽງປະມານ 4 ອົງສາ (3.97ອົງສາ) ສ້າງດ້ວຍຫີນອ່ອນສີຂາວເມື່ອປີ ຄ.ສ.1173 ແລ້ວສຳເລັດໃນປີຄ. ສ.1350 ລວມເວລາການກໍ່ສ້າງ 175 ປີ ແຕ່ການກໍ່ສ້າງໄດ້ຢຸດຊະງັກລົງເມື່ອສ້າງໄປເຖິງຊັ້ນສາມ ເນື່ອງຈາກພື້ນໃຕ້ດິນບໍລິເວນກໍ່ສ້າງນັ້ນອ່ອນຈຶ່ງເກີດການຊຸດຕົວຕໍ່ມາໃນປີຄ. ສ.1272 ໄດ້ດຳເນີນການສ້າງຕໍ່ ໂດຍສ້າງໃຫ້ເອນກັບໄປອີກດ້ານໜຶ່ງເພື່ອຄວາມສົມດຸນຫຼັງຈາກນັ້ນໄດ້ດຳເນີນການສ້າງຕໍ່ລວມເປັນ 7 ຊັ້ນ ແລ້ວສຳເລັດໃນປີຄ. ສ. 1319 ແຕ່ຍອດຫໍລະຄັງມາສ້າງສຳເລັດໃນພາຍຫລັງ, ຄວາມມຸ້ງມັ່ນໃນການກໍ່ສ້າງຈົນແລ້ວສຳເລັດ ບວກກັບປະຫວັດສາດທີ່ຍາວນານກໍສົມຄວນແລ້ວທີ່ຈະໄດ້ເປັນມໍລະດົກລ້ຳຄ່າຂອງໂລກ, ນອກຈາກນີ້ ເມືອງປິຊາຍັງມີສະຖານທີ່ທ່ອງທ່ຽວທີ່ເປັນມໍລະດົກໂລກອີກແຫ່ງໜຶ່ງ.
