ກິນໄສ້ກອກ-ແຮມ ຫລາຍ ໆ ສ່ຽງເປັນພະຍາດມະເຮັງ
ໃຜມັກຮັບປະທານອາຫານປະເພດໄສ້ກອກ, ແຮມຄວນເອົາໃຈໃສ່ຕື່ມທ່ານຮູ້ບໍວ່າ ໃນຊີ້ນສັດແປຮູເຫລົ່ານີ້ມີສານຊະນິດໜຶ່ງທີ່ເອີ້ນວ່າ " ໂຊດຽມໄນໄຕທ໌ " ປະສົມຢູ່ ຊຶ່ງສານຊະນິດນີ້ມີອັນຕະລາຍຕໍ່ສຸກຂະພາບແນ່ນອນ ຫາກຮັບປະທານຫລາຍເກີນໄປ ໄສ້ກອກທີ່ວາງຂາຍຢູ່ຕາມຕະຫຼາດ ແລະ ພົບວ່າມີຫລາຍຍີ່ຫໍ້ທີ່ໃຊ້ວັດຖຸເຈືອປົນອາຫານແຕ່ບໍ່ລະບຸວ່າ ເປັນສານຊະນິດໃດ ປະສົມອາຫານໃນປະລິມານເທົ່າໃດ ແລະ ຄວນບໍລິໂພກຊໍ່າໃດຈຶ່ງບໍ່ເປັນອັນຕະລາຍ.
ສຳລັບວັດຖຸເຈືອປົນອາຫານທີ່ລະບຸໄວ້ນັ້ນຄື: ສານໂຊດຽມໄນໄຕທ໌ ທີ່ປະສົມຢູ່ໃນຜະລິດຕະພັນຈຳພວກໄສ້ກອກ ແຮມ ແໜມ ຫລື ໄສ້ກອກສົ້ມ ສານນີ້ເປັນຜະລິດສີຂາວ ຄ້າຍນ້ຳຕານຊາຍ ໃຊ້ສຳລັບປະສົມອາຫານປະເພດຊີ້ນສັດ ເພື່ອຄົງສະພາບສີແລະກິ່ນຂອງໄສ້ກອກ ຊຶ່ງມີກິ່ນສະເພາະໄວ້ໄດ້ດົນ ແຕ່ຫາກໄດ້ຮັບສານຊະນິດນີ້ໃນປະລິມານຫລາຍເກີນໄປກໍມີອັນຕະລາຍເຊັ່ນກັນ ເພາະເມື່ອສານຊະນິດນີ້ໄປເຮັດປະຕິກິລິຢາກັບສານເຄມີໃນຊີ້ນສັດ ອາດກໍ່ໃຫ້ເກີດພະຍາດຊະນິດຮຸນແຮງ ແລະພະຍາດຊຳເຮື້ອເຊັ່ນ: ພະຍາດມະເຮັງ. ໃນຫລາຍໆປະເທດບໍ່ໄດ້ຫ້າມການໃຊ້ສານໄນໄຕທ໌ໃນອາຫານ ພຽງແຕ່ຕ້ອງໃຊ້ໃນປະລິມານທີ່ລະບຸໄວ້ຕາມກົດຫມາຍ ຫລາຍຄົນອາດຈະເລີ່ມຢ້ານແລ້ວວ່າ ເຮົາຈະຍັງສາມາດກິນໄສ້ກອກໄດ້ຫລືບໍ່ ເຮົາສາມາດຮັບປະທານອາຫານຈຳພວກນີ້ໄດ້ ແຕ່ຢ່າກິນຕໍ່ເນື່ອງທຸກມື້ ເພາະຫາກບໍ່ໄດ້ຮັບປະທານອາຫານປະເພດນີ້ເລື້ອຍ ໆ ການສະສົມຂອງໄນໄຕທ໌ກໍຈະບໍ່ເປັນອັນຕະລາຍຕໍ່ຮ່າງກາຍໄດ້.
