ແຮງບັນດານໃຈ... ຈາກຜູ້ຊາຍເຄິ່ງທ່ອນ " ເຜີງ ສຸ່ຍ ຫລິນ "
(GMT+08:00) 2013-01-16 14:50:13 cri
ໃນຍາມທີ່ທໍ້ຖອຍ... ກຳລັງໃຈເປັນສິ່ງທີ່ສຳຄັນທີ່ສຸດທີ່ຈະເຮັດໃຫ້ເຮົາມີແຮງຕໍ່ສູ້ກັບອຸປະສັກແລະກ້າວຍ່າງຕໍ່ໄປ... ແຕ່ວ່າກຳລັງໃຈຈາກຄົນອື່ນໆ ນັ້ນ ມັນບໍ່ໄດ້ມາຫາເຮົາທຸກຄັ້ງທີ່ເຮົາມີບັນຫາແລະໃນຍາມທີ່ເຮົາຕ້ອງການ ເພາະສະນັ້ນການສ້າງກຳລັງໃຈຈາກຕົວເຮົາເອງນັ້ນ ເປັນຈຸດເລີ່ມຕົ້ນໃນການທີ່ຈະກ້າວຂ້າມຜ່ານບັນຫາຕ່າງໆໄດ້, ເຖິງແມ່ນວ່າອຸປະສັກທີ່ປະສົບພົບພໍ້ມັນຈະຍິ່ງໃຫຍ່ຂະໜາດໃດ ແຕ່ຖ້າຫາກເຮົາມີແຮງແລະກຳລັງໃຈຈາກໃຈດວງນ້ອຍໆຂອງເຮົາເທົ່ານັ້ນກໍພຽງພໍທີ່ຈະສ້າງກຳລັງໃຈໃຫ້ເຮົາຍ່າງຕໍ່ໄປໄດ້. ໃນມື້ນີ້ກໍມີບົດຄວາມດີ ໆ ມາແບ່ງປັນ, ຊຶ່ງເປັນເລື່ອງລາວທີ່ຖືກສົ່ງຕໍ່ຜ່ານໂລກອິນເຕີເນັດຢ່າງຫຼວງຫລາຍ, ບອກໄດ້ເລີຍວ່າ ຖ້າໃຜໄດ້ອ່ານແລ້ວ ຈະເກີດ " ແຮງບັນດານໃຈ " ໃນການໃຊ້ຊີວິດຢ່າງແນ່ນອນ...ໃນເຟັສບຸກ "ຊູເດດ ປະຊາຊົນ ຄົນຄິດບວກ" ໄດ້ໂພສເລື່ອງລາວກ່ຽວກັບຊາຍຈີນຄົນໜຶ່ງທີ່ປະສົບອຸປັດຕິເຫດຖືກລົດທັບຈົນຕົວຂາດເປັນສອງທ່ອນ ແຕ່ລາວກໍສາມາດຍິ້ມໄດ້ ແລະໃຊ້ຊີວິດຢູ່ເທິງໂລກນີ້ຢ່າງມີຄວາມສຸກແຖມຍັງປ່ຽນວິກິດຮ້າຍແຮງ ໃຫ້ເປັນໂອກາດທີ່ຍິ່ງໃຫຍ່ໄດ້ສຳເລັດ... ຊຶ່ງເລື່ອງລາວມີຢູ່ວ່າ...ເລື່ອງຂອງຊາຍຄົນນີ້ມີຢູ່ວ່າ ລາວໄດ້ຮັບອຸບັດເຫດຈາກການຖືກລົດບັນທຸກທັບໂຕຂາດສອງທ່ອນ ບາດເຈັບສາຫັດ ຮ່າງກາຍຖືກຕັດຖິ້ມເຄິ່ງໂຕ ໂດຍທີ່ລາວໄດ້ຮັບການຜ່າຕັດຫຼາຍຄັ້ງຫຼາຍຄາວ ອະໄວຍະວະແລະລະບົບຕ່າງ ໆ ທີ່ສຳຄັນ ຖືກຕັດຖິ້ມແລະຕໍ່ຕື່ມ ເສີມແຕ່ງຫລວງຫລາຍ ຈົນນັບບໍ່ຖ້ວນທ່ານຜູ້ຟັງເຊື່ອບໍ່ວ່າ ຄວາມສູງຂອງລາວຕອນນີ້ ວັດແທກຄວາມສູງຈາກແອວຂຶ້ນໄປສູງພຽງແຕ່85 ຊັງຕີແມັດ, ຕົວລາວໄດ້ສ້າງຄວາມຕົກຕະລຶງໃຫ້ກັບທີມແພດເປັນຢ່າງໜ້າເຫຼືອເຊື່ອ ເມື່ອລາວລອດຕາຍຢ່າງປະຕິຫານ ແລະມີສຸຂະພາບກັບຄືນສົມບູນ ເຄື່ອນໄຫວໄປມາເທິງລົດລໍ້ເຂັນແບບເຄິ່ງໂຕລາວຊື່ວ່າ: ເຜີງສຸ່ຍຫລິນ , ນອກຈາກປະຕິຫານ ຈາກການລອດຕາຍຈາກອຸບັດເຫດມາໄດ້ແລ້ວ ລວມເຖິງການຜ່າຕັດອີກນັບເທື່ອບໍ່ຖ້ວນ ຍັງບໍ່ລວມກາຍະພາບບຳບັດອີກເປັນຫຼາຍປີ ........ທ່ານເຊື່ອຫລືບໍ່ວ່າ ຜູ້ຊາຍຄົນນີ້ໄດ້ພິກວິກິດຂອງຊີວິດ ຢ່າງບໍ່ໜ້າເຊື່ອ ໂດຍການເປີດຊຸບເປີມາເກັດ ຂາຍສິນຄ້າລາຄາຖືກ! ໂດຍທີ່ລາວໄດ້ສ້າງໂອກາດຈາກຮ່າງກາຍທີ່ເຫລືອຢູ່ພຽງເຄິ່ງດ່ຽວ ຕັ້ງເປັນຊື່ຊຸບເປີມາກເກັດຊື່ວ່າ "Half man - Half Price Store" ຮ້ານ ເຄິ່ງຄົນ ເຄິ່ງລາຄາເຊື່ອບໍ່ວ່າກີິດຈະການຂອງລາວໄດ້ມີຊື່ສຽງຈາກວິກິດການຂອງລາວເອງ ລູກຄ້າເຂົ້າມາອຸດໜຸນຢ່ງຄັບຄາໜາແໜ້ນ, ສາມາດສ້າງຄວາມຈະເລີນຮຸ່ງ-ເຮືອງເປັນຢ່າງດີໃນປັດຈຸບັນ, ລາວສາມາດພິກວິກິດໃຫ້ເປັນໂອກາດໄດ້ຢ່າງໜ້າຊົມຢ່າງບໍ່ໜ້າເຊື່ອເລີຍແມ່ນບໍ່?ທ່ານຜູ້ຟັງທີ່ເຄົາລົບ ວິກິດແລະບັນຫາທີ່ເກິດຂື້ນກັບທ່ານໃນຂະນະນີ້ ຫາກທ່ານຄຶດວ່າ ທ່ານຕົກຕ່ຳທີ່ສຸດໆ, ທ່ານທຸກຍາກ-ລຳບາກທີ່ສຸດ, ຢາກໃຫ້ກຳລັງໃຈທ່ານດ້ວຍການຂໍຮ້ອງໃຫ້ທ່ານເບິງໄປທີ່ "ເຜີງສຸ່ຍຫລິນ" , ເພາະວ່າຄົງບໍ່ມີໃຜທີ່ມີອຸປະສັກຫຼາຍກວ່າລາວອີກແລ້ວ, ແມ່ນຢູ່ວ່າຮ້ານຂອງລາວໄດ້ຂາຍເຄື່ອງດີ, ແຕ່ມີໃຜຢາກຕົວຂາດເຄິ່ງຫຼືບໍ່, ທ່ອນລຸມບໍ່ເຫລືອແລ້ວ ທ່ານລອງຄິດເບິ່ງວ່າ ຄວາມສຳຄັນຂອງສ່ວນລຸມມັນສຳຄັນປານໃດ, ຜູ້ຊາຍຄົນໜຶ່ງຈະໃຊ້ຊີວິດຢ່າງໃດ.......ຄິດເບິ່ງແລ້ວມັນລຳບາກຫຼາຍອີຫຼີ........................................ ເຜີງສຸ່ຍຫລິນ ໄດ້ເຄີຍກ່າວໄວ້ວ່າ " ກຳລັງໃຈທີ່ດີທີ່ສຸດ ຕ້ອງມາຈາກຕົວເຮົາເອງ ເພາະມັນສາມາດສ້າງໄດ້ທັນທີແລະຕະຫລອດເວລາ "
