ຢາສູບອາດຂ້າຊີວິດ 1 ຕື້ຄົນ ໃນສະຕະວັດທີ XXI
ໃນສະຕະວັດທີ XX, ພະຍາດຕ່າງໆທີ່ພົວພັນກັບຢາສູບໄດ້ຂ້າຊີວິດຂອງຜູ້ຄົນໄປ 100 ລ້ານຄົນໃນທົ່ວໂລກ ແລະ ຖ້າຫາກບໍ່ມີມາດຕະການທີ່ໄດ້ຜົນເພື່ອສະກັດກັ້ນແລ້ວ, ຕົວເລກໃນທຳນອງດຽວກັນນີ້ ອາດຂຶ້ນເປັນ 1 ຕື້ ຄົນ ໃນສະຕະວັດທີ XXI. ທີ່ກ່າວມານັ້ນ ເປັນຄຳກ່າວເຕືອນຂອງອົງການອະນາໄມໂລກ (WHO) ທີ່ນຳອອກມາເນື່ອງໃນໂອກາດວັນໂລກບໍ່ສູບຢາ ( 31 ພຶດສະພາ ) ປີນີ້.
ຜູ້ອຳນວຍການໃຫຍ່ WHO ກ່າວເມື່ອວັນທີ30ພຶດສະພາວ່າປະຈຸບັນນີ້ມີປະຊາກອນທົ່ວໂລກສູບຢາປະມານ 20%, ໂດຍສະເພາະແມ່ນຢູ່ໃນບາງພາກພື້ນເຊັ່ນ: ເອີຣົບ, ອາເມລິກາລາຕິນ ແລະ ບາງປະເທດໃນອາຊີ, ໃນຂະນະທີ່ເກນອາຍຸຂອງຜູ້ທີ່ສູບຢານັ້ນນັບມື້ນັບ " ຫັນສູ່ໄວຫນຸ່ມ ". ພາບຂອງໄວຫນຸ່ມ ອາຍຸແຕ່ 13 ຫາ 15 ປີ ທີ່ຄາບກອກຢານັ້ນບໍ່ແມ່ນເລື່ອງທີ່ຫາຍາກອີກແລ້ວ.
ໃນຂະນະດຽວກັນ, ຊ່ຽວຊານຂອງ WHO ຄາດວ່າເມື່ອຮອດປີ 2030, ຄວາມຊິນເຄີຍທີ່ອັນຕະລາຍດັງກ່າວຈະສັງເວີຍຊີວິດຜູ້ຄົນໄປ 8 ລ້ານຄົນຕໍ່ປີ, ຊຶ່ງຕົ້ນຕໍແມ່ນຢູ່ໃນບັນດາປະເທດທີ່ມີລາຍຮັບປານກາງແລະຕ່ຳ. ນອກຈາກນັ້ນແລ້ວ,ຢາສູບຍັງຖືວ່າເປັນຫນຶ່ງໃນສາເຫດເປັນ " ຕົວຊ່ວຍ " ໃຫ້ແກ່ພະຍາດທີ່ຕິດແປດຕ່າງໆ, ຊຶ່ງກວມເອົາ 63% ຂອງຈຳນວນຜູ້ເສຍຊີວິດໃນໂລກ.
