10 ເມືອງທີ່ມີຄວາມສ່ຽງຕໍ່ມະຫາອຸທົກໄພຂອງໂລກ
ອົງການວ່າດ້ວຍຄວາມຮ່ວມມືທາງເສດຖະກິດແລະການພັດທະນາ ຫລື ໂອອີຊີດີ ກໍ່ຕັ້ງມາຕັ້ງແຕ່ປີ ຄ. ສ.1961 ແລະມີສຳນັກງານຕັ້ງຢູ່ທີ່ນະຄອນຫຼວງປາລີ ປະເທດຟຼັ່ງ ໄດ້ລະບຸໃນບົດລາຍງານວ່າມີເມືອງແຄມຟັງທະເລຫລາຍກວ່າ 130 ແຫ່ງທົ່ວໂລກທີ່ກຳລັງຕົກຢູ່ໃນຄວາມສ່ຽງທີ່ເພີ່ມຂຶ້ນເລື່ອຍໆ ຕໍ່ໄພຄຸກຄາມຈາກເຫດນ້ຳຖ້ວມ ເພາະຄື້ນ "ສະຕອມເຊີ" ໄພຄຸກຄາມຈາກພາຍຸ, ລວມເຖິງເລື່ອງທີ່ລະດັບນ້ຳທະເລທົ່ວໂລກເພີ່ມສູງຂຶ້ນ ແລະມີອຸນຫະພູມອຸ່ນຂຶ້ນກວ່າປົກກະຕິ ຊຶ່ງທາງໂອອີຊີດີລະບຸວ່ານະຄອນຫຼວງຫຼືເມືອງໃຫ່ຍຖ້າຂາດການວາງແຜນດ້ານການພັດທະນາທີ່ມີປະສິດທິພາບ ແລະຍັງມີການບໍລິຫານຈັດການໃນເຊີງໂຄງສ້າງບໍ່ຮັບປະກັນ ຊຶ່ງແນ່ນອນວ່າຈະຍິ່ງສົ່ງຜົນໃຫ້ປະຊາ ຊົນຕ້ອງຕົກຢູ່ໃນຄວາມສ່ຽງຈາກໄພຄຸກຄາມດັ່ງກ່າວຫລາຍຍິ່ງຂຶ້ນ, ສະນັ້ນອົງການວ່າດ້ວຍຄວາມຮ່ວມມືທາງເສດຖະກິດແລະການພັດທະນາ ຫລື ໂອອີຊີດີ ຈຶ່ງໄດ້ມີການສຳຫຼວດແລະສ້າງບົດລາຍງານນີ້ຂື້ນມາເພື່ອເປັນຖານຂໍ້ມູນການວາງແຜນຍຸດທະສາດການປ້ອງກັນແລະກຽມພ້ອມຮັບມືຕໍ່ເຫດການຕ່າງໆທີ່ອາດຈະເກີດຂື້ນ, ລາຍງານຂອງໂອອີຊີດີ ລະບຸວ່າ 10 ເມືອງໃຫຍ່ຂອງໂລກທີ່ສຸ່ມສ່ຽງຈະຖືກທຳລາຍ ຫລືສ່ຽງໄດ້ຮັບຜົນກະທົບຈາກການປ່ຽນແປງຂອງສະພາບອາກາດໂລກຫລາຍທີ່ສຸດຄື:
1. ເມືອງໄມອາມີ ລັດຟໍລິດາ ຂອງສະຫະລັດອາເມລິກາ
2. ນະຄອນກວ່າງໂຈວ ຂອງຈີນ
3. ນະຄອນຫຼວງນິວຢອກ ແລະເມືອງນວກ ຂອງສະຫະລັດອາເມລິກາ
4. ເມືອງກັນກັດຕາຂອງອິນເດຍ
5. ນະຄອນຊ່ຽງໄຮ້ຂອງຈີນ
6. ເມືອງມຸມໄບຂອງອິນເດຍ
7. ເມືອງທຽນຈິນຫລືທຽນສິນຂອງຈີນ
8. ນະຄອນຫຼວງໂຕກຽວຂອງຍີ່ປຸ່ນ
9. ເຂດປົກຄອງພິເສດຮ່ອງກົງຂອງຈີນ
10. ນະຄອນ ນະຄອນຫຼວງບາງກອກ
ອົງການວ່າດ້ວຍຄວາມຮ່ວມມືທາງເສດຖະກິດແລະການພັດທະນາ ຫລື "ໂອອີຊີດີ" ລະບຸວ່າ ນະຄອນຫຼວງບາງກອກຂອງໄທຕິດອັນດັບ 10 ຂອງໂລກ ແລະອັນດັບ 1 ໃນອາຊຽນ ໃນຖານະເມືອງໃຫຍ່ທີ່ມີຄວາມສ່ຽງຕໍ່ການປ່ຽນແປງຂອງສະພາບພູມິອາກາດໂລກ ແລະຖືເປັນເມືອງສຸ່ມສ່ຽງຕໍ່ໄພຄຸກຄາມຈາກລະດັບນ້ຳທະເລທີ່ເພີ່ມສູງຂຶ້ນ ການທຳລາຍລ້າງຂອງຄື້ນ "ສະຕອມເຊີ" ໂດຍຄາດວ່າມູນຄ່າຊັບສິນໃນນະຄອນຫຼວງບາງກອກທີ່ສຸ່ມສ່ຽງຕໍ່ຫາຍະນະດັ່ງກ່າວອາດສູງເຖິງ 1.1 ລ້ານລ້ານດອນລາສະຫລັດ ໃນປີ ຄ. ສ.2070 ຫລືອີກ 58 ປີນັບຈາກນີ້
ຜົນການສຶກສາຂອງອົງການລະຫວ່າງປະເທດຊຶ່ງມີສະມາຊິກ 34 ຊາດດັ່ງກ່າວລະບຸວ່າ ນະຄອນບາງກອກຂອງໄທຊຶ່ງມີປະຊາກອນອາໄສຢູ່ບໍ່ຕ່ຳກວ່າ 12 ລ້ານຄົນອາດຈະຕົກຢູ່ໃນອັນຕະລາຍຈາກໄພຄຸກຄາມຈາກການປ່ຽນແປງຂອງສະພາບພູມິອາກາດໂລກຫລາຍຂຶ້ນ ຊຶ່ງພາຍໃນປີ ຄ. ສ.2070.
ທ່ານ ໂຮເຊ ອັງເຄນ ກູນເລຍ ອະດີດນັກການທູດຊາວເມັກຊິໂກ ໄວອາຍຸ 62 ປີ ໃນຖານະເລຂາທິການໃຫຍ່ຂອງໂອອີຊີດີ ອອກມາເປີດເຜີຍວ່າ ເຫດການນ້ຳຖ້ວມຄັ້ງໃຫຍ່ໃນປະເທດໄທທີ່ເລີ່ມຕົ້ນຂຶ້ນຕັ້ງແຕ່ໄລຍະກາງປີທີ່ຜ່ານມາ ແລະສ້າງຄວາມເສຍຫາຍເປັນວົງເງີນຫລາຍກວ່າ 45, 000 ລ້ານດອນລາສະຫລັດນັ້ນ ຖືເປັນສັນຍານເບື້ອງຕົ້ນທີ່ບົ່ງຊີ້ວ່ານັບຈາກນີ້ເມືອງຫລວງຂອງໄທຈະຕ້ອງຜະເຊີນກັບໄພພິບັດທາງທຳມະຊາດທີ່ມີແນວໂນ້ມຮຸນແຮງຫລາຍຂຶ້ນ.
