ມຽນມາວາງຂອບການປະຕິຮູບເສດຖະກິດສັງຄົມ
ຂ່າວຈາກໜັງສືພິມ "ເຢັນໝິນຢື້ປ້າວ" ແລະ ໜັງສືພິມ "ຫວນສິວສືປ້າວ" ແຈ້ງວ່າ, "ເວທີປຶກສາຫາລືການຮ່ວມມືດ້ານການພັດທະນາຄັ້ງປະຖົມມະເລີກ" ເຊິ່ງແມ່ນທ່ານເທນເຊນ, ປະທານາທິບໍດີມຽນມາ ເປັນປະທານ ໄດ້ຈັດຂຶ້ນຢູ່ນະຄອນຫຼວງເນປີດໍຂອງມຽນມາ ແຕ່ວັນທີ 19 ຫາວັນທີ 20 ມັງກອນນີ້, ຜູ້ແທນຂອງອາເມລິກາ, ສະຫະພາບເອີລົບ ແລະ ອົງການຈັດຕັ້ງຂອງສະຫະປະຊາຊາດລວມ 400 ກວ່າຄົນໄດ້ເຂົ້າຮ່ວມ. ນີ້ແມ່ນທ່ານເທນເຊນ ຮຽກປະຊຸມທີ່ມີປະເທດທີ່ໃຫ້ການຊ່ວຍເຫຼືອແລະອົງການຈັດຕັ້ງສາກົນເຂົ້າຮ່ວມ ເປັນຄັ້ງທຳອິດນັບແຕ່ທ່ານຂຶ້ນກຳອຳນາດໃນມຽນມາແຕ່ເດືອນມີນາ 2011 ເປັນຕົ້ນມາ. ທ່ານເທນເຊນ ໄດ້ແນະນຳຂອບການປະຕິຮູບດ້ານເສດຖະກິດສັງຄົມທີ່ລັດຖະບານມຽນມາວາງອອກໃໝ່ນັ້ນ ໃຫ້ແກ່ຜູ້ແທນທີ່ຮ່ວມປະຊຸມ. ອີງຕາມຂອບການປະຕິຮູບນີ້, ມຽນມາຈະເພີ່ມທະວີການເປີດປະຕູສູ່ພາຍນອກຕື່ມອີກ, ເພື່ອດຶງດູດເອົາການລົງທຶນຈາກພາຍນອກໃຫ້ໄດ້ຫຼາຍກວ່າເກົ່າອີກ.
ທ່ານເທນເຊນ ຍັງກ່າວວ່າ, ໃນຂະນະທີ່ຊຸກຍູ້ການພັດທະນາເສດຖະກິດສັງຄົມ, ລັດຖະບານມຽນມາກໍສະແຫວງຫາສັນຕິພາບແລະສະຖຽນລະພາບແຫ່ງຊາດ. ທ່ານກ່າວວ່າ, ຈະເລີ່ມດຳເນີນການເຈລະຈາທາງການເມືອງກັບກອງປະວຸດອາວຸດຂອງຊົນເຜົ່າສ່ວນໜ້ອຍພາຍໃນປະເທດ 10 ຊົນເຜົ່າ ທີ່ໄດ້ບັນລຸການເຊັນສັນຍາຢຸດຍິງກັບລັດຖະບານແລ້ວນັ້ນ, ແລະກໍຍິນດີຕ້ອນຮັບກອງທະຫານອິດສະຫຼະຄາຊິນທີ່ຍັງບໍ່ທັນໄດ້ມີການເຊັນສັນຍາຢຸດຍິງກັບລັດຖະບານນັ້ນ ເຂົ້າຮ່ວມຂະບວນການເຈລະຈາທາງການເມືອງໂດຍໄວ.
ຜູ້ແທນຂອງອົງການຈັດຕັ້ງສາກົນ ແລະ ນັກການທູດຫຼາຍທ່ານສະແດງຄວາມຊົມເຊີຍຕໍ່ມຽນມາໃນການວາງມາດຕະການການປະຕິຮູບໃໝ່. ໜັງສືພິມ "ຟາຍເນນເຊວເທມສ໌" ຂອງອັງກິດ ເຫັນວ່າ, ປະເທດທີ່ໃຫ້ການຊ່ວຍເຫຼືອແລະອົງການຈັດຕັ້ງສາກົນໃຫ້ຄຳໝັ້ນສັນຍາວ່າຈະປະສານສົມທົບກັບນະໂຍບາຍການປະຕິຮູບຂອງມຽນມາ, ໃຫ້ຄຳປຶກສາ ແລະ ຊ່ວຍເຫຼືອມຽນມາຈັດຕັ້ງປະຕິ ບັດແຜນການກໍ່ສ້າງແລະສັນຕິພາບຂອງຊາດ.
