ທ່ານຢາງເຈສືພົບປະທ່ານໂຕມີອີຊີ ມູຣາຢາມະ
ວັນທີ 30 ມັງກອນນີ້, ຢູ່ທີ່ປັກກິ່ງ, ທ່ານຫົງເຫຼີຍ, ໂຄສົກກະຊວງການຕ່າງປະເທດຈີນກ່າວວ່າ, ວັນທີ 29 ມັງກອນນີ້, ທ່ານຢາງເຈສື, ລັດຖະມົນຕີວ່າການກະຊວງການຕ່າງປະເທດຈີນ ໄດ້ພົບປະທ່ານໂຕມີອີຊີ ມູຣາຢາມະ, ອະດີດນາຍົກລັດຖະມົນຕີຍີ່ປຸ່ນ ແລະທ່ານຄາໂຕ ໂຄອີຊິ, ປະທານສະມາຄົມມິດຕະພາບຍີ່ປຸ່ນ-ຈີນ ທີ່ພວມຢ້ຽມຢາມຈີນ.
ທ່ານຢາງເຈສື ໄດ້ກ່າວຕີລາຄາຢ່າງຕັ້ງໜ້າຕໍ່ທ່ານໂຕມີອີຊີ ມູຣາຢາມະ, ອະດີດນາຍົກລັດຖະມົນຕີຍີ່ປຸ່ນ ແລະ ສະມາຄົມມິດຕະພາບຍີ່ປຸ່ນ-ຈີນ ໄດ້ປະກອບສ່ວນຕໍ່ການສ້າງສາຄືນໃໝ່ແລະພັດທະນາການພົວພັນລະຫວ່າງຈີນກັບຍີ່ປຸ່ນ ໃນໄລຍະດົນນານມານີ້, ພ້ອມທັງກ່າວເນັ້ນວ່າ ຈີນແລະຍີ່ປຸ່ນເດີນໄປຕາມເສັ້ນທາງສັນຕິພາບແລະການຮ່ວມມືມິດຕະພາບ ແມ່ນສອດຄ່ອງກັບຜົນປະໂຫຍດ ພື້ນຖານຂອງສອງປະເທດແລະປະຊາຊົນສອງຊາດ. ປັດຈຸບັນ, ການພົວພັນລະຫວ່າງຈີນກັບຍີ່ປຸ່ນກຳລັງຢູ່ໃນໄລຍະທີ່ສຳຄັນ, ສອງຝ່າຍຄວນໃຊ້ທ່າທີຮັບຜິດຊອບຕໍ່ປະຫວັດສາດ ແກ້ໄຂບັນຫາເກາະຕ້ຽວອີຢ່າງເໝາະສົມ ບົນພື້ນຖານເອກະສານການເມືອງ 4 ສະບັບລະຫວ່າງຈີນກັບຍີ່ປຸ່ນ, ຊຸກຍູ້ໃຫ້ການພົວພັນລະຫວ່າງສອງປະເທດໄດ້ຮັບການປັບປຸງແລະຂະຫຍາຍຕົວ.
ຝ່າຍຍີ່ປຸ່ນກ່າວວ່າ, ການພົວພັນລະຫວ່າງຍີ່ປຸ່ນກັບຈີນຂະຫຍາຍຕົວມາເປັນເວລາ 40 ປີ ເຊິ່ງນັບແຕ່ການພົວພັນທາງການທູດລະຫວ່າງສອງປະເທດຫັນເປັນປົກກະຕິເປັນຕົ້ນມາ, ໄດ້ສ້າງພື້ນຖານອັນໜັກແໜ້ນ, ບໍ່ວ່າອິດທິກຳລັງໃດໆກໍບໍ່ສາມາດທຳລາຍໄດ້. ສອງຝ່າຍຕ້ອງປົກປ້ອງສະພາບການລວມຢ່າງຈິງຈັງ, ຮ່ວມກັນທຳຄວາມພະຍາຍາມເພື່ອຊຸກຍູ້ໃຫ້ການພົວພັນລະຫວ່າງສອງປະເທດໄດ້ຮັບການປັບປຸງແລະຂະຫຍາຍຕົວ. ສະມາຄົມມິດຕະພາບຍີ່ປຸ່ນ-ຈີນໃນຖານະເປັນຄະນະມິດຕະພາບຝ່າຍພົນລະເຮືອນ ຈະສືບທອດມູນເຊື້ອ, ເສີມຂະຫຍາຍທ່າແຮງ, ຕັ້ງໜ້າຊຸກຍູ້ໄມຕີຈິດມິດຕະພາບທາງພົນລະເຮືອນ, ສ້າງເງື່ອນໄຂເອື້ອອຳນວຍໃຫ້ແກ່ການຂະຫຍາຍຕົວການພົວພັນລະຫວ່າງສອງປະເທດ.
