ກຳປັ່ນກອງທັບເຮືອຈີນຈັບເປົ້າໝາຍກຳປັ່ນຮົບຂອງຍີ່ປຸ່ນ ອາເມລິກາສະແດງຄວາມເປັນຫ່ວງ
ຕາມຂ່າວ CRI: ສື່ມວນຊົນຍີ່ປຸ່ນແຈ້ງວ່າ, ວັນທີ 30 ມັງກອນນີ້, ກຳປັ່ນກອງທັບເຮືອຈີນເຄີຍໃຊ້ຣາດາຄວບຄຸມກຳລັງໄຟຕິດຕາມຈັບເປົ້າໝາຍກຳປັ່ນປ້ອງກັນຂອງກອງປ້ອງກັນຕົວເທິງທະເລຂອງຍີ່ປຸ່ນ, ຕໍ່ເລື່ອງນີ້, ລັດຖະບານຍີ່ປຸ່ນໄດ້ປະທ້ວງຕໍ່ຝ່າຍຈີນ. ອາເມລິກາ ທີ່ໄດ້ໄກ່ເກ່ຍຄວາມຂັດແຍ່ງກັນໃນເກາະຕ້ຽວອີລະຫວ່າງຈີນກັບຍີ່ປຸ່ນມາໂດຍຕະຫຼອດນັ້ນ ກໍສະແດງຄວາມເປັນຫ່ວງຕໍ່ເລື່ອງນີ້, ແລະມີປະຕິກິລິຍາແບບລະມັດລະວັງ.
ວັນທີ 5 ກຸມພານີ້, ນາງວິກໂຕເຣຍ ນູເລນດ໌, ໂຄສົກກະຊວງການຕ່າງປະເທດອາເມລິກາ ກ່າວວ່າ: "ນີ້ອາດຈະເຮັດໃຫ້ສະຖານະການທີ່ເຄັ່ງຕຶງແລ້ວນັ້ນຮ້າຍແຮງຂຶ້ນຕື່ມ, ເຮັດໃຫ້ມີຄວາມສ່ຽງເພີ່ມຂຶ້ນໃນການວິນິດໄສສະພາບການ, ເປັນການສົ່ງຜົນກະທົບເຖິງສັນຕິພາບ, ສະຖຽນລະພາບ ແລະ ເສດຖະກິດຂອງພາກພື້ນ. ຂະນະດຽວກັນ, ທ່າທີຂອງອາເມລິກາທີ່ມີຕໍ່ເກາະຕ້ຽວອີກໍບໍ່ຫ່ອນຈະປ່ຽນແປງ". ນາງຍັງເຜີຍໃຫ້ຮູ້ວ່າ, ວັນທີ 5 ກຸມພານີ້, ທ່ານຈອນ ຟໍເບັສ, ລັດຖະມົນຕີວ່າການກະຊວງການຕ່າງປະເທດອາເມລິກາ ໄດ້ໂທລະສັບລົມກັບທ່ານຢາງເຈສື, ລັດຖະມົນຕີວ່າການກະຊວງການຕ່າງປະເທດຈີນ ກ່ຽວກັບບັນຫາຄວາມປອດໄພຂອງພາກພື້ນ, ແຕ່ນາງປະຕິເສດເປີດເຜີຍວ່າໄດ້ເວົ້າເຖິງເຫດການດັ່ງກ່າວຫຼືບໍ່.
