ກະຊວງປ້ອງກັນປະເທດຈີນກ່າວວ່າ ທະຫານເຮືອຈີນບໍ່ໄດ້ໃຊ້ຣາດາຄວບຄຸມກຳລັງໄຟຕິດຕາມຈັບເປົ້າໝາຍກຳປັ່ນຮົບຂອງຍີ່ປຸ່ນ
ໂດຍແນໃສ່ສື່ມວນຊົນຍີ່ປຸ່ນທີ່ແຈ້ງຂ່າວວ່າ ກຳປັ່ນຂອງກອງທັບເຮືອຈີນໃຊ້ຣາດາຄວບຄຸມກຳລັງໄຟຕິດຕາມຈັບເປົ້າໝາຍກຳປັ່ນແລະຍົນຮົບຂອງກອງປ້ອງກັນຕົວຂອງຍີ່ປຸ່ນ, ຕອນຄ່ຳວັນທີ 7 ກຸມພານີ້, ກົມຖະແຫຼງຂ່າວຂອງກະຊວງປ້ອງກັນປະເທດຈີນ ກ່າວວ່າ, ຄຳເວົ້າຂອງຍີ່ປຸ່ນທີ່ວ່າກຳປັ່ນຂອງກອງທັບເຮືອຈີນໃຊ້ຣາດາຄວບຄຸມກຳລັງໄຟຕິດຕາມຈັບເປົ້າໝາຍກຳປັ່ນແລະຍົນຮົບຂອງຍີ່ປຸ່ນນັ້ນ ແມ່ນບໍ່ຖືກຕ້ອງຕາມຄວາມເປັນຈິງ.
ກົມຖະແຫຼງຂ່າວຂອງກະຊວງປ້ອງກັນປະເທດຈີນ ກ່າວວ່າ, ເວລາ 16 ໂມງຂອງວັນທີ 19 ມັງກອນຜ່ານມານີ້, ກຳປັ່ນປ້ອງກັນລຳໜຶ່ງຂອງກອງທັບເຮືອຈີນໄດ້ດຳເນີນການຝຶກຊ້ອມຕາມປົກກະຕິຢູ່ເຂດທະເລທີ່ກ່ຽວຂ້ອງຂອງທະເລຈີນຕາເວັນອອກ, ໃນໄລຍະນັ້ນໄດ້ພົບເຫັນຍົນເຮຣິກົບແຕເທິງກຳປັ່ນຂອງກອງປ້ອງກັນຕົວຂອງຍີ່ປຸ່ນລຳໜຶ່ງບິນເຂົ້າໃກ້ກຳປັ່ນຂອງຈີນ, ຣາດາເທິງກຳປັ່ນຂອງຈີນໄດ້ສັງເກດຕິດຕາມການເຄື່ອນໄຫວຕາມປົກກະຕິ, ແຕ່ບໍ່ໄດ້ໃຊ້ຣາດາຄວບຄຸມກຳລັງໄຟ. ເວລາ 9 ໂມງຂອງວັນທີ 30 ມັງກອນຜ່ານມານີ້, ກຳປັ່ນຂອງກອງທັບເຮືອຈີນດຳເນີນການຝຶກຊ້ອມຕາມປົກກະຕິຢູ່ເຂດທະເລທີ່ກ່ຽວຂ້ອງຂອງທະເລຈີນຕາເວັນອອກ, ໃນໄລຍະນັ້ນໄດ້ພົບເຫັນກຳປັ່ນຂັບໄລ່ຂອງຍີ່ປຸ່ນຕິດຕາມກຳປັ່ນຂອງຈີນຢູ່ບໍລິເວນໃກ້ໆ, ຣາດາເທິງກຳປັ່ນຂອງຈີນໄດ້ສັງເກດຕິດຕາມການເຄື່ອນໄຫວຕາມປົກກະຕິ, ແຕ່ບໍ່ໄດ້ໃຊ້ຣາດາຄວບຄຸມກຳລັງໄຟເຊັ່ນດຽວກັນ.
ກົມຖະແຫຼງຂ່າວກະຊວງປ້ອງກັນປະເທດຈີນ ກ່າວເນັ້ນວ່າ, ສິ່ງທີ່ຕ້ອງສະແດງໃຫ້ເຫັນນັ້ນແມ່ນ ໃນຫຼາຍປີຜ່ານມານີ້, ຍົນແລະກຳປັ່ນຂອງຍີ່ປຸ່ນໄດ້ເຂົ້າໃກ້ຕິດຕາມຍົນແລະກຳປັ່ນຂອງຈີນເລື້ອຍໆ, ນີ້ຈຶ່ງແມ່ນສາເຫດທີ່ກໍ່ໃຫ້ເກີດບັນຫາທາງດ້ານຄວາມປອດໄພທາງທະເລແລະທາງອາກາດລະຫວ່າງຈີນກັບຍີ່ປຸ່ນ, ຈີນໄດ້ກ່າວປະທ້ວງຍີ່ປຸ່ນຫຼາຍເທື່ອແລ້ວ. ໃນໄລຍະມໍ່ໆມານີ້, ຍີ່ປຸ່ນພັດໄດ້ຫວ່ານຖ້ອຍຄວາມທີ່ຜິດກັບຄວາມເປັນຈິງເລື້ອຍໆ ເພື່ອຢາກບິດເບືອນແລະເສກສັນປັ້ນແຕ່ງການຝຶກຊ້ອມເພື່ອກຽມພ້ອມສູ້ຮົບຂອງກອງທະຫານຈີນທີ່ດຳເນີນໄປຕາມປົກກະຕິ. ໃນເທື່ອນີ້ກໍ່ເຊັ່ນດຽວກັນ, ຍີ່ປຸ່ນບໍ່ໄດ້ກວດສອບຄວາມຈິງກັບຝ່າຍຈີນກ່ອນ ກໍເປີດເຜີຍສະພາບອັນຈອມປອມຕໍ່ສື່ມວນຊົນແຕ່ຝ່າຍດຽວ, ເວົ້າໂຍກອັນທີ່ວ່າ "ໄພຂົ່ມຂູ່ຈາກຈີນ", ເຈດຕະນາສ້າງບັນຍາກາດໃຫ້ເຄັ່ງຕຶງຂຶ້ນຕາມລຳພັງໃຈ, ສ້າງຄວາມເຂົ້າໃຈຜິດໃຫ້ແກ່ຫາງສຽງສາກົນ, ທ່າອ່ຽງຄືດັ່ງກ່າວຂອງຍີ່ປຸ່ນເປັນເລື່ອງທີ່ຄວນໄດ້ເພີ່ມສະຕິລະວັງຕົວໃຫ້ສູງຂຶ້ນ ແລະ ຄວນໄດ້ມີການຄົ້ນຄິດພິຈາລະນາຢ່າງຮອບຄອບ. ຈີນຫວັງໃຫ້ຍີ່ປຸ່ນໃຊ້ມາດຕະການຕົວຈິງທີ່ບັງເກີດຜົນ, ຢຸດຕິການກະທຳທີ່ສ້າງບັນຍາກາດຢູ່ທະເລຈີນຕາເວັນອອກໃຫ້ເຄັ່ງຕຶງຂຶ້ນ ແລະບໍ່ຄວນຫວ່ານຖ້ອຍຄວາມໂດຍບໍ່ມີຄວາມຮັບຜິດຊອບອີກ.
