ຜູ້ນຳພັກ-ລັດຈີນເຂົ້າຮ່ວມການພິຈາລະນາປຶກສາຫາລືຂອງກອງປະຊຸມສອງສະພາ
ຂ່າວສານຊິນຮວາລາຍງານວ່າ ຕອນເຊົ້າວັນທີ6ມີນານີ້, ຜູ້ນຳພັກ-ລັດຈີນຄື ທ່ານສີຈິ້ນຜິງ ທ່ານເວິ່ນເຈ່ຍປາວ ທ່ານລີເຄີ້ສຽງ ທ່ານອີເຈິ້ງເຊິ່ງ ທ່ານຫຼິວຢຸນຊ່ານ ທ່ານຫວາງສີຊ່ານ ທ່ານຈ່າງກ່າວລີ້ ໄດ້ເຂົ້າຮ່ວມການຄົ້ນຄວ້າພິຈາລະນາແລະປຶກສາຫາລືຂອງໜ່ວຍຫຼືຈຸຄະນະຜູ້ແທນຈຳນວນໜຶ່ງໃນກອງປະຊຸມຄັ້ງທຳອິດຂອງສະພາປະຊາຊົນແຫ່ງຊາດຈີນສະໄໝທີ12ແລະກອງປະຊຸມຄັ້ງທຳອິດຂອງສະພາປຶກສາການເມືອງປະຊາຊົນແຫ່ງຊາດຈີນສະໄໝທີ12.
ທ່ານສີຈິ້ນຜິງ(ຜູ້ຢູ່ກາງ)ເຂົ້າຮ່ວມການຄົ້ນຄວ້າພະຈາລະນາຂອງຄະນະຜູ້ແທນແຂວງຫຼຽວໜິງ
ທ່ານສີຈິ້ນຜິງ ເລຂາທິການໃຫຍ່ສູນກາງພັກ ປະທານຄະນະກຳມະການການທະຫານສູນກາງພັກກອມມູນິດຈີນ ໄດ້ເຂົ້າຮ່ວມການຄົ້ນຄວ້າພິຈາລະນາຂອງຄະນະຜູ້ແທນແຂວງຫຼຽວໜິງ,ທ່ານຊີ້ອອກວ່າ ຕ້ອງອອກແຮງປະຕິບັດຍຸດທະສາດພັດທະນາແຫຼ່ງອຸດສາຫະກຳເກົ່າເປັນຕົ້ນແມ່ນເຂດພາກຕາເວັນອອກສຽງເໜືອໃຫ້ຈະເລີນເຕີບໂຕ,ອອກແຮງເຮັດວຽກງານປະກັນແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ,ໃຫ້ປະຊາຊົນໄດ້ຮັບຜົນປະໂຫຍດຕົວຈິງທີ່ເຫັນເປັນປະຈັກຕາແລະສຳຜັດໄດ້.
ທ່ານເວິ່ນເຈ່ຍປາວເຂົ້າຮ່ວມການຄົ້ນຄວ້າພະຈາລະນາຂອງຄະນະຜູ້ແທນແຂວງຫຼຽວໜິງ
ທ່ານເວິ່ນເຈ່ຍປາວ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມຄົບຄະນະຂອງຄະນະຜູ້ແທນແຂວງເສສວນ ແລະໄດ້ຟັງຄຳຄິດຄຳເຫັນແລະຂໍ້ສະເໜີຂອງບັນດາຜູ້ແທນໃນການຄົ້ນຄວ້າພິຈາລະນາບົດລາຍງານວຽກງານລັດຖະບານ.ທ່ານເວິ່ນເຈ່ຍປາວກ່າວວ່າ ຂ້າພະເຈົ້າດຳລົງຕຳແໜ່ງນາຍົກລັດຖະມົນຕີມາເປັນເວລາ10ປີ,ອາຍຸການໃກ້ຈະຄົບວາລະແລ້ວ.ຂ້າພະເຈົ້າຈະອອກພັກຜ່ອນບຳນານໃນໄລຍະເວລາອັນໃກ້ໆນີ້,ຂ້າພະເຈົ້າມີຄວາມເຄົາລົບນັບຖືແລະຄວາມຂອບໃຈຢ່າງເລິກເຊິ່ງຕໍ່ປະຊາຊົນ, ຂ້າພະເຈົ້າຫວັງວ່າ ປະເທດເຮົາຈະມີອະນາຄົດທີ່ນັບມື້ນັບດີງາມກວ່າເກົ່າ,ຊີວິດການເປັນຢູ່ຂອງປະຊາຊົນຈະນັບມື້ນັບມີຄວາມສຸກຫຼາຍຍິ່ງຂຶ້ນ.
ທ່ານລີເຄີ້ສຽງ(ຜູ້ຢູ່ຊ້າຍ)ເຂົ້າຮ່ວມການຄົ້ນຄວ້າພະຈາລະນາຂອງຄະນະຜູ້ແທນແຂວງຫຼຽວໜິງ
ທ່ານລີເຄິ້ສຽງ ກຳມະການປະຈຳກົມການເມືອງສູນກາງພັກກອມມູນິດຈີນ ຮອງນາຍົກລັດຖະມົນຕີຈີນກ່າວໃນເວລາເຂົ້າຮ່ວມການຄົ້ນຄວ້າພິຈາລະນາຂອງຄະນະຜູ້ແທນແຂວງຫູນານວ່າ ເຂດພາກກາງມີບົດບາດທາງຍຸດທະສາດທີ່ສຳຄັນເປັນພິເສດໃນສະພາບການພັດທະນາເຂດແຄວ້ນຕ່າງໆຂອງຈີນ. ຄວນສຸມກຳລັງເຂົ້າໃນການຊຸກຍູ້ການຫັນປ່ຽນຮູບການພັດທະນາ, ມີການປະດິດສ້າງໃນດ້ານແນວຄິດ,ມີການກະທຳໃນການປະຕິບັດຕົວຈິງ. ຄວນຖືເອົາການພັດທະນາເສດຖະກິດປະສານສົມທົບກັບການອະນຸລັກສິ່ງແວດລ້ອມທຳມະຊາດໃຫ້ດີກວ່າເກົ່າ. ຄວນສຸມກຳລັງເຂົ້າໃນການແກ້ໄຂບັນຫາຈຸດສຸມທີ່ກ່ຽວພັນກັບຊີວິດການເປັນຢູ່ຂອງປະຊາຊົນ, ເພີ່ມຄວາມແຮງໃນການພັດທະນາເພື່ອຫຼຸດຜ່ອນຄວາມທຸກຍາກ, ຮັບປະກັນຊີວິດການເປັນຢູ່ລະດັບພື້ນຖານຂອງປະຊາຊົນຜູ້ທຸກຍາກ.
