ຜູ້ນຳພັກ-ລັດຈີນເຂົ້າຮ່ວມການພິຈາລະນາປຶກສາຫາລືບັນຫາໃນກອງປະຊຸມຄັ້ງທຳອິດຂອງສະພາປະຊາຊົນແຫ່ງຊາດສະໄໝທີ12
ທ່ານລີເຄີ້ສຽງ(ຜູ້ຢູ່ກາງ)ເຂົ້າຮ່ວມການພິຈາລະນາປຶກສາຫາລືຂອງຄະນະຜູ້ແທນແຂວງກຸ້ຍໂຈ່າວ
ຂ່າວສານຊິນຮວາລາຍງານວ່າ: ໃນຕອນເຊົ້າວັນທີ 7 ມີນານີ້, ຜູ້ນຳພັກ-ລັດ ຈີນຄືທ່ານລີເຄີ້ສຽງ ທ່ານຈ່າງເຕີຈ່ຽງ ທ່ານອີເຈີ້ງເຊິ່ງ ທ່ານຫຼິວຢຸນຊ່ານ ແລະທ່ານຈ່າງກ່າວລີ້ ຕ່າງໄດ້ເຂົ້າຮ່ວມການ ພິຈາລະນາປຶກສາຫາລືຂອງຄະນະຜູ້ແທນຈຳຈວນໜຶ່ງໃນກອງປະຊຸມຄັ້ງທຳອິດຂອງສະພາປະຊາຊົນແຫ່ງຊາດຈີນສະໄໝທີ 12.
ທ່ານລີເຄີ້ສຽງ ກຳມະການປະຈຳກົມການເມືອງສູນກາງພັກ ຮອງນາຍົກລັດຖະມົນຕີຈີນ ໄດ້ເຂົ້າຮ່ວມການພິຈາລະນາປຶກສາຫາລືຂອງຄະນະຜູ້ແທນແຂວງກຸ້ຍໂຈ່ວ, ທ່ານກ່າວວ່າ ຖ້າວ່າເຂດພາກຕາເວັນຕົກພັດທະນາແລ້ວ, ສະພາບການພັດທະນາຂອງທົ່ວປະເທດຈະຕ່າງກັບໄລຍະຜ່ານມາຢ່າງຫຼວງຫຼາຍ. ແຂວງກຸ້ຍໂຈ່ວຄວນບັນລຸເປົ້າໝາຍສ້າງໃຫ້ເປັນສັງຄົມອີ່ມໜຳສຳລານໄປພ້ອມໆກັບເຂດແຄວ້ນອື່ນໆໃນທົ່ວປະເທດ,ບໍ່ພຽງແຕ່ຄວນພັດທະນາແບບກ້າວກະໂດດ ,ຍິ່ງຄວນຫັນປ່ຽນຮູບການພັດທະນາ. ຄວນພັດທະນາການສຶກສາເພື່ອສ້າງຊັບພະຍາກອນມະນຸດທີ່ມີຄຸນນະພາບສູງ, ເພີ່ມທະວີພື້ນຖານແຫ່ງການຫັນປ່ຽນຮູບການພັດທະນາແລະຍົກລະດັບຂະແໜງການ. ຄວນສະໜັບສະໜູນຊາວກະສິກອນທີ່ໄປເຮັດວຽກຢູ່ຕົວເມືອງນັ້ນໃຫ້ກັບຄືນພູມລຳເນົາເພື່ອປະກອບທຸລະກິດ, ເພີ່ມທະວີວຽກງານກ່ຽວພັນກັບຊີວິດການເປັນຢູ່ຂອງປະຊາຊົນເປັນຕົ້ນແມ່ນການຫຼຸດຜ່ອນຄວາມທຸກຍາກແລະອື່ນໆ.
ນອກນີ້, ທ່ານຈ່າງເຕີຈ່ຽງ ກຳມະການປະຈຳກົມການເມືອງສູນກາງພັກ ຮອງນາຍົກລັດຖະມົນຕີຈີນໄດ້ເຂົ້າຮ່ວມການ ພິຈາລະນາປຶກສາຫາລືຂອງຄະນະຜູ້ແທນຮົງກົງ ແລະຄະນະຜູ້ແທນມາກາວ.ທ່ານອີເຈິ້ງເຊິ່ງ ກຳມະການປະຈຳກົມການ ເມືອງສູນກາງພັກ ປະທານກອງປະຊຸມຄະນະປະທານຂອງກອງປະຊຸມຄັ້ງທຳອິດຂອງສະພາປຶກສາການເມືອງປະຊາຊົນແຫ່ງຊາດຈີນສະໄໝທີ 12 ໄດ້ເຂົ້າຮ່ວມການພິຈາລະນາປຶກສາຫາລືຂອງຄະນະຜູ້ແທນໄຕ້ຫວັນ. ທ່ານຫຼິວຢຸນຊ່ານ ກຳມະການປະຈຳກົມການເມືອງສູນກາງພັກ ເລຂາທິການສູນກາງພັກ ກອມມູນິດຈີນ ໄດ້ເຂົ້າຮ່ວມການພິຈາລະນາປຶກສາຫາລືຂອງຄະນະຜູ້ແທນແຂວງ ຟູຈ້ຽນ. ທ່ານຈ່າງກ່າວລີ້ ກຳມະການປະຈຳກົມການເມືອງສູນກາງພັກກອມມູນິດຈີນ ໄດ້ເຂົ້າຮ່ວມ ການພິຈາລະນາປຶກສາຫາລືຂອງຄະນະຜູ້ແທນນະຄອນຈຸ່ງກິ່ງ.
