ເຈົ້າໜ້າທີ່ກະຊວງກະສິກຳຈີນຕອບຄຳຖາມຂອງນັກຂ່າວກ່ຽວກັບການເພີ່ມພະລັງຊີວິດຊີວາດ້ານການພັດທະນາຊົນນະບົດ ແລະ ພັດທະນາການຜະລິດສະບຽງອາຫານແລະການກະສິກຳຢ່າງໝັ້ນທ່ຽງ
ຕາມຂ່າວສານຊິນຮວາ: ວັນທີ 11 ມີນານີ້, ກອງປະຊຸມສະພາປະຊາຊົນແຫ່ງຊາດຈີນຄັ້ງທີໜຶ່ງສະໄໝທີ 12 ໄດ້ຈັດກອງປະຊຸມຖະແຫຼງຂ່າວ, ເຈົ້າໜ້າທີ່ກະຊວງກະສິກຳຈີນ ໄດ້ຕອບຄຳຖາມຂອງນັກຂ່າວຈີນແລະຕ່າງປະເທດ ກ່ຽວກັບບັນຫາທີ່ "ເພີ່ມພະລັງຊີວິດຊີວາດ້ານການພັດທະນາຊົນນະບົດ ແລະ ພັດທະນາການຜະລິດສະບຽງອາຫານແລະການກະສິກຳຢ່າງໝັ້ນທ່ຽງ"
ທ່ານເສີນສຽວຮວາ, ລັດຖະມົນຕີຊ່ວຍວ່າການກະຊວງກະສິກຳຈີນ ກ່າວວ່າ, ການຜະລິດສະບຽງອາຫານຂອງຈີນໄດ້ຮັບຜົນງານທີ່ດີ ຄື ຜົນຜະລິດໄດ້ເພີ່ມຂຶ້ນ 9 ປີລຽນຕິດ, ຄວາມປອດໄພດ້ານສະບຽງອາຫານຂອງຈີນແມ່ນມີຄວາມຮັບປະກັນ. ປັດຈຸບັນ, ການຜະລິດປະເພດທັນຍະພືດ, ຕົ້ນຕໍລວມທັງເຂົ້າ, ເຂົ້າເບຼ ແລະ ສາລີ, ອັດຕາການກຸ້ມຕົນເອງສາມາດຮັກສາຢູ່ໃນລະດັບຢູ່ລະຫວ່າງ 98%. ທ່ານກ່າວວ່າມີຄວາມໝັ້ນໃຈຕໍ່ການຜະລິດສະບຽງອາຫານຂອງປີນີ້ຈະໄດ້ຮັບຜົນທີ່ອຸດົມສົມບູນ.
ທ່ານເສີນສຽວຮວາກ່າວຕື່ມວ່າ: ເວົ້າລວມແລ້ວ, ຜົນຜະລິດກະສິກຳຈີນມີຄຸນນະພາບປອດໄພຢ່າງໝັ້ນທ່ຽງໂດຍພື້ນຖານ. ເມື່ອເບິ່ງຈາກການຕິດຕາມວັດແທກຕາມປົກກະຕິແລ້ວ, ອັດຕາໄດ້ຕາມມາດຖານຂອງຄວາມປອດໄພດ້ານຄຸນນະພາບຂອງຜົນຜະລິດກະສິກຳ ໄດ້ຮັກສາຢູ່ໃນລະດັບຫຼາຍກວ່າ 96%. ຂະນະດຽວກັນ, ທ່ານເສີນສຽວຮວາ ກໍກ່າວວ່າ, ສະຖານະການຄວາມປອດໄພດ້ານຄຸນນະພາບຂອງຜົນຜະລິດກະສິກຳແມ່ນຍັງມີຂໍ້ຄົງຄ້າງຈຳນວນໜຶ່ງ, ເປັນຕົ້ນແມ່ນໄດ້ເກີດເຫດຄວາມປອດໄພດ້ານຄຸນນະພາບເປັນບາງຄັ້ງບາງຄາວ, ໂດຍແນໃສ່ ແກ້ໄຂບັນຫານີ້, ທ່ານກ່າວວ່າ, ໜຶ່ງ ຕ້ອງເພີ່ມຄວາມເຂັ້ມງວດໃນການຕິດຕາມຄຸ້ມຄອງແລະການປະຕິບັດກົດໝາຍ; ສອງ ຕ້ອງສຸມໃສ່ຊຸກຍູ້ການຜະລິດໃຫ້ໄດ້ຕາມມາດຖານ; ສາມ ຕ້ອງເພີ່ມຄວາມສາມາດດ້ານການປະຕິບັດກົດໝາຍຕື່ມອີກ.
