ນະຄອນຫຼວງວຽງຈັນ ຈັດຊຸດອົບຮົມ ຫົວຂໍ້: " ຍຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ " ໃຫ້ແກ່ສື່ມວນຊົນ
(GMT+08:00) 2013-03-16 13:13:23 cri
ຕາມຂ່າວCRI: ວັນສຸກທີ 15 ມີນານີ້, ສະມາຄົມນັກຂ່າວລາວ ຮ່ວມກັບ ອົງການ (UNFPA) ໄດ້ຈັດຊຸດຝຶກອົບຮົມກ່ຽວກັບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ປີ 2013 ຂື້ນຢູ່ນະຄອນຫຼວງວຽງຈັນ, ເຊິ່ງມີຫົວຂໍ້ວ່າ: " ຍຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ " ໂດຍທ່ານ ນາງ ຣິຊວີນ໋າ ດີອາວິສ ຮອງຜູ້ຕາງໜ້າອົງການສະຫະປະຊາຊາດສຳລັບກອງທຶນປະຊາກອນ ເພື່ອຄວາມສະເໝີພາບລະຫວ່າງຍິງ-ຊາຍ ແລະ ຄວາມເຂັ້ມແຂງແກ່ແມ່ຍິງ ( UNFPA ) ປະຈຳລາວ, ທ່ານ ນາງ ນິໂອແອນ ໂຣຊາຍ ຜູ້ຮັບຜິດຊອບວຽກງານບົດບາດຍິງ-ຊາຍ ( UNWOMEN ), ມີທ່ານ ນາງ ວັນນະພອນ ສິດທິລາດ ຊ່ຽວຊານສື່ມວນຊົນລາວ ແລະ ຕ່າງປະເທດ ພ້ອມດ້ວຍສື່ມວນຊົນຈາກພາກສ່ວນຕ່າງໆຈຳນວນ 28 ທ່ານເຂົ້າຮ່ວມ.
ໃນການຝຶກອົບຮົມດັ່ງກ່າວ, ທ່ານ ນາງ ຣິຊວີນ໋າ ດີອາວິສໃຫ້ຮູ້ວ່າ: ປັດຈຸບັນຍັງມີແມ່ຍິງ ແລະ ເດັກນ້ອຍຈຳນວນລ້ານຄົນທີ່ຕົກເປັນເຍື່ອຂອງຄວາມຮຸນແຮງ ຫຼື ຄູ່ຄອງຂອງຕົນ, ໂດຍສະເພາະຄວາມຮຸນແຮງທາງເພດເປັນຕົ້ນແມ່ນການຖືພາໂດຍບໍ່ໄດ້ຕັ້ງໃຈ ເຊິ່ງມັນເປັນສາເຫດການຕິດເຊື້ອ HIV, ເຮັດໃຫ້ມີການເຊື່ອງຊ້າຕໍ່ການພັດທະນາຂອງຊັບພະຍາກອນມະນຸດ. ສະນັ້ນ, ພວກຂ້າພະເຈົ້າຈັດການຝຶກອົບຮົມຄັ້ງນີ້ຂື້ນມາ ມີຈຸດປະສົງສ້າງຄວາມສາມາດໃຫ້ສື່ມວນຊົນລາວໃນການລາຍງານຂ່າວປະເດັນຕ່າງໆ ກ່ຽວກັບຄວາມຮຸນແຮງຕໍ່ແມ່ຍິງ ແລະ ເດັກນ້ອຍທີ່ຕົກເປັນເຍື່ອນັ້ນ ໃຫ້ມີຄວາມລະອຽດອ່ອນ, ສ້າງມູມມອງໃນການຂຽນຂ່າວທີ່ມີແນວທາງແບບສວນສອບສວນໃຫ້ມີຄວາມລະອຽດອ່ອນ, ລາຍງານຂ່າວດ້ວຍຄວາມເປັນຈິງ ແລະ ຄວນຄຳນຶງເຖິງຄວາມປອດໄພຂອງຜູ້ໄດ້ຮັບເຄາະຮ້າຍ.
ທ່ານ ນາງ ນິໂອແອນ ໂຣຊາຍ ຜູ້ຮັບຜິດຊອບວຽກງານບົດບາດຍິງ-ຊາຍ ( UNWOMEN ) ໃຫ້ຮູ້ຕື່ມອີກວ່າ: ປັດຈຸບັນອົງການ ( UNWOMEN ) ໄດ້ເຮັດວຽກຮ່ວມກັບລັດຖະບານລາວ, ອົງການແມ່ຍິງ. ນອກນັ້ນ, ຍັງໄດ້ສ້າງສູນຊ່ວຍເຫຼືອ ແລະ ໃຫ້ຄຳປຶກສາສຸຂະພາບຈະເລີນພັນ ແລະ ຍັງໄດ້ຮ່າງກົດໝາຍເພື່ອໃຫ້ຮັດກຸມກວ່າເກົ່າ ແລະ ໄດ້ໂຄສະນາຕາມສື່ຕ່າງໆ.
