ລາວກຳປູເຈຍປຶກສາຫາລືກ່ຽວກັບບັນຫາຊາຍແດນ
ປຶກສາຫາລືບັນຫາຊາຍແດນທີ່ບໍ່ທັນຈະແຈ້ງຢູ່ແຂວງພາກໃຕ້ຂອງລາວເພື່ອເປັນການປະຕິບັດແລະການຕົກລົງກັນຂອງສອງນາຍົກລັດຖະມົນຕີທັງສອງປະເທດລາວ-ກຳປູເຈຍ. ສະນັ້ນຫວ່າງບໍ່ດົນມານີ້ຄະນະຜູ້ແທນແຫ່ງ ສປປ ລາວ ນຳໂດຍທ່ານບຸນເກີດສັງສົມສັກ,ລັດຖະມົນຕີຊ່ວຍວ່າການກະຊວງການຕ່າງປະເທດ ສປປ ລາວ ແລະ ຄະນະຜູ້ແທນແຫ່ງລາຊາອານາຈັກກຳປູເຈຍ ນຳໂດຍທ່ານ ລ໋ອງ ວິຊາໂຣ, ລັດຖະມົນຕີຊ່ວຍວ່າການກະຊວງຕ່າງປະເທດ ແລະ ການຮ່ວມມືສາກົນໄດ້ຮ່ວມກັນລົງເບິ່ງພື້ນທີ່ຊາຍແດນຕິດຈອດລະຫວ່າງເມືອງສະຫນາມໄຊ ແຂວງອັດຕະປື ແຫ່ງ ສປປ ລາວ ກັບຊຽງປາງ ແຂວງຊຽງແຕງ ແຫ່ງລາຊາອານາຈັກກຳປູເຈຍ. ເຊິ່ງເປັນເຂດພື້ນທີ່ຊາຍແດນບໍ່ທັນຈະແຈ້ງ ໃນໂອກາດດັ່ງກ່າວຄະນະທັງສອງໄດ້ຮັບຟັງການລາຍງານຂອງທ່ານນາງ ຫວັດສະດີໂຄດໂຍທາ,ຮອງເລຂາພັກແຂວງຮອງເຈົ້າແຂວງໆອັດຕະປືຊຶ່ງທ່ານໄດ້ຍົກໃຫ້ເຫັນເຖິງມູນເຊື້ອຂອງປະຊາຊົນລາວແລະປະຊາຊົນກຳປູເຈຍທີ່ຢູ່ຕາມຊາຍແດນໄດ້ເຄີຍໄປມາຫາສູ່ກັນເປັນພີ່ນ້ອງເຄີຍຊ່ວຍເຫຼືອເຊິ່ງກັນແລະກັນ. ມາແຕ່ບັນພະບູລຸດແລະການທຳມາຫາກິນຂອງປະຊາຊົນເຂດນີ້ເປັນປົກກະຕິ.
ແຕ່ເຖິງຢ່າງໃດກໍ່ຕາມປະຊາຊົນລາວແຂວງອັດຕະປືເຄີຍໄດ້ຊ່ວຍເຫຼືອປະຊາຊົນກຳປູເຈຍດັບໄຟສົງຄາມໃນເມື່ອກ່ອນ ຈຳນວນ 8 ພັນກວ່າຄົນໄດ້ໃຫ້ທີ່ພັກອາໄສ ແລະ ຊ່ວຍເຫຼືອສະບຽງອາຫານຈຳນວນໜຶ່ງ, ພ້ອມດຽວກັນເຈົ້າໜ້າທີ່ປ້ອງກັນຂອບເຂດຊາຍແດນທັງສອງປະເທດໄດ້ມີຄຳເຫັນບົນພື້ນຖານການຕົກລົງ, ທາງການທະຫານນຳກັນແບ່ງຂອບເຂດລາດຕາເວນໃນພື້ນທີ່ບໍ່ຈະແຈ້ງ ເພື່ອເຮັດໃຫ້ພື້ນທີ່ດັ່ງກ່າວຄົງໄວ້ສະພາບເດີມ ແລະ ແກ້ໄຂໃຫ້ສອດຄ່ອງລະຫວ່າງທ້ອງຖິ່ນ, ເມືອງ, ແຂວງ, ທີ່ມີຊາຍແດນຕິດຈອດກັນຈະຕ້ອງໄດ້ເປີດກອງປະຊຸມປຶກສາຫາລືແລກປ່ຽນບົດຮຽນນຳກັນ ແລະ ທັງຄະນະກຳມະການສຳຫລວດຊາຍແດນຈະໄດ້ຕົກລົງສຳຫລວດຂອບເຂດຊາຍແດນຕົວຈິງຮ່ວມກັນອີກ ຕາມ 4 ຫລັກການທີ່ຕົກລົງກັນໄວ້ໃນເບື້ອງຕົ້ນ.
