ທາງຫຼວງແຕ່ນະຄອນຄຸນມິງຮອດນະຄອນຫຼວງບາງກອກຈະສ້າງສຳເລັດໃນເດືອນມິຖຸນາປີນີ້
ໜັງສືພິມ "ຫຼຽນເຫີຈາວປ້າວ" ຂອງສິງກະໂປ ແຈ້ງວ່າ: ຄຽງຄູ່ກັບຂົວໃຫຍ່ແຫ່ງໜຶ່ງທີ່ເຊື່ອມຕໍ່ລາວແລະໄທໃກ້ຈະສ້າງສຳເລັດ, ທາງຫຼວງສາກົນແຕ່ນະຄອນຄຸນມິງຈີນຮອດນະຄອນຫຼວງບາງກອກຂອງໄທ ທີ່ເຊື່ອມຕໍ່ສາມປະເທດ ຄື ຈີນ, ລາວ ແລະ ໄທ ຈະສ້າງສຳເລັດໃນເດືອນມິຖຸນາປີນີ້, ນີ້ຈະເຮັດໃຫ້ການສັນຈອນໄປມາແລະຂົນສົ່ງຕາມເສັ້ນທາງຄົມມະນາຄົມສາຍນີ້ສະດວກສະບາຍຂຶ້ນກວ່າເກົ່າແລະມີປະສິດທິພາບສູງຂຶ້ນກວ່າເກົ່າ.
ທາງຫຼວງແຕ່ນະຄອນຄຸນມິງຮອດນະຄອນຫຼວງບາງກອກ ແມ່ນເສັ້ນທາງຄົມມະນາຄົມທີ່ສຳຄັນເສັ້ນໜຶ່ງ ທີ່ເຊື່ອມຕໍ່ລະຫວ່າງຈີນກັບປະເທດອາຊີອາຄະເນໂດຍທາງບົກ, ແຕ່ເສັ້ນທາງນີ້ມີແມ່ນ້ຳຂອງຂັ້ນເປັນສອງຕອນຢູ່ເມືອງຫ້ວຍຊາຍຂອງລາວແລະຊຽງຂອງຂອງໄທ, ເຮັດໃຫ້ມີຄວາມຫຍຸ້ງຍາກທາງດ້ານຄົມມະນາຄົມ, ລົດຍົນພາຫະນະຕ່າງໆທີ່ໄປມາຕາມເສັ້ນທາງສາຍນີ້ຈຳເປັນຕ້ອງຕໍ່ເຮືອຂ້າມແມ້ນ້ຳຂອງ.
ປີ 2007, ຈີນ, ລາວ ແລະ ໄທ ໄດ້ບັນລຸການເຊັນສັນຍາໂດຍເຫັນດີຮ່ວມກັນດຳເນີນໂຄງການກໍ່ສ້າງຂົວຂ້າມແມ່ນ້ຳຂອງຕາມທາງຫຼວງຄຸນມິງ-ບາງກອກ, ແລະໄດ້ເລີ່ມລົງມືກໍ່ສ້າງໃນເດືອນມິຖຸນາປີ 2010, ໂດຍແມ່ນຈີນແລະໄທເປັນຜູ້ລົງທຶນເຂົ້າໃນການກໍ່ສ້າງຝ່າຍລະ 50% ຂອງມູນຄ່າທັງໝົດ.
ທາງຫຼວງນະຄອນຄຸນມິງ-ບາງກອກມີຄວາມຍາວທັງໝົດ 1807 ກິໂລແມັດ, ເຊິ່ງຕົ້ນທາງເລີ່ມແຕ່ນະຄອນຄຸນມິງຂອງຈີນ ເນັ່ງໄປຈົນຮອດນະຄອນຫຼວງບາງກອກຂອງໄທ, ຕະຫຼອດຄວາມຍາວຂອງເສັ້ນທາງໄດ້ປະກອບດ້ວຍຍານດິນແດນຂອງ 3 ປະເທດ ຈີນ, ລາວ ແລະ ໄທ.
