ທີມ Silver Heritang Lao Nagas ໃນຮົງກົງໄດ້ຮັບຜົນງານດີກວ່າເກົ່າ
ວັນທີ 29 ມີນານີ້, ສະມາຄົມນັກຂ່າວແຫ່ງ ສປປ ລາວ ໄດ້ມີງານຖະແຫລງ ຂ່າວ " ການກັບມາຂອງການໄປແຂ່ງຂັນກິລາ ຣັກບີ້ ຂອງທີມລາວຢູ່ ຮົງກົງ" ໂດຍການເປັນປະທານຖະແຫລງຂ່າວຂອງ ທ່ານ ວິລະຢຸດ ຣາຕິກຸນ ປະທານສະຫະພັນຣັກບີ້ແຫ່ງຊາດລາວ, ທ. ປີຊາ ວົງເດືອນເພງ ຫົວໜ້າທີມ ແລະ ຫົວໜ້າພັດທະນາກິລາຣັກບີ້ ຂອງສະຫະພັນກິລາຣັກບີ້ ແຫ່ງຊາດລາວ, ພ້ອມດ້ວຍຄູຝຶກ ແລະ ບັນດາແຂກຜູ້ທີ່ມີກຽດເຂົ້າຮ່ວມໃນຄັ້ງນີ້.
ປີຊາ ວົງເດືອນເພງກ່າວວ່າ: ພວກຂ້າພະເຈົ້າມີຄວາມພາກພູມໃຈຫຼາຍກ່ຽວກັບຜົນການແຂ່ງຂັນໃນປີນີ້, ເນື່ອງຈາກວ່າທີມເຮົາມີນັກກິລາໃໝ່ຈໍານວນໜຶ່ງທີ່ຍັງບໍ່ເຄີຍແຂ່ງກັບບັນດາທີມອື່ນໆທີ່ນອກເໜືອຈາກທີມໃນອາຊີ. ນັກກິລາທີ່ມາຈາກປະເທດເອີຣົບ ແລະ ອົດສະຕາລີ ແມ່ນມີຄວາມໄດ້ປຽບຫລາຍທາງດ້ານຄວາມໄວ ແລະ ຮູບຮ່າງ, ແລະ ມັນກໍ່ເປັນປະສົບການທີ່ດີໃນການຮຽນຮູ້ສໍາລັບພວກເຮົາ ໃນການທົດສອບຄວາມສາມາດຂອງເຮົາໃນການແຂ່ງຂັນທີ່ຍິ່ງໃຫຍ່ແບບນີ້
ການແຂ່ງຂັນ Abacus Kowloon RugbyFest ແມ່ນເປັນການແຂ່ງຂັນໜຶ່ງທີ່ມີຊື່ສຽງສູງທີ່ສຸດໃນບັນດາການແຂ່ງຂັນຂອງສະໂມສອນກິລາຣັກບີ້ໃນໂລກ, ທີ່ມີບັນດາທີມຈາກທົ່ວມູມໂລກເດີນທາງເຂົ້າຮ່ວມ. ທີມ SHL Lao Nagas, ເປັນ ທີມທີ່ມີນັກກິລາຈໍານວນ 5 ທ່ານ ທີ່ເຂົ້າຮ່ວມໃນການແຂ່ງຂັນທີ່ສຸດຍອດນີ້ເປັນເທື່ອທໍາອິດ, ແຕ່ເຂົ້າເຈົ້າກໍ່ສາມາດເອົາຊະນະທີມຈາກອົດສະຕາລີ, ມາເລເຊຍ ແລະ ສິງກາໂປ ແລະ ໄດ້ເປັນອັນດັບທີ 11 ໃນຈໍານວນທີມທີ່ເຂົ້າຮ່ວມການແຂ່ງຂັນທັງໝົດ 24 ທີມໃນປີນີ້.
