ຄະນະຜູ້ແທນສູນກາງພັກຄອມມູນິດຈີນຢ້ຽມຢາມແລະເຮັດວຽກຢູ່ສປປລາວ
ໂດຍປະຕິບັດຕາມການຮ່ວມມືລະຫວ່າງພັກປະຊາຊົນປະຕິວັດລາວແລະພັກຄອມມູນິດຈີນ, ຄະນະຜູ້ແທນຊ່ຽວຊານປາຖະກະຖາຂອງສູນກາງພັກຄອມມູນິດຈີນ ນຳໂດຍສະຫາຍກາວຢົງຈົງ, ຮອງຫົວໜ້າຫ້ອງການຄົ້ນຄວ້າປະຫວັດສາດພັກສູນກາງຄອມມູນິດຈີນພ້ອມຄະນະໄດ້ມາເຄື່ອນໄຫວຢ້ຽມຢາມຢູ່ສປປລາວແຕ່ວັນທີ 21 ຫາວັນທີ 24 ເມສາ 2013 ນີ້.
ໃນຕອນເຊົ້າວັນທີ 22 ເມສານີ້, ຄະນະຜູ້ແທນຊ່ຽວຊານປາຖະກະຖາຂອງສູນກາງພັກຄອມມູນິດຈີນໄດ້ກ່າວປາຖະກະຖາຕໍ່ບັນດາການນຳພັກແລະລັດຂອງລາວ, ເຊິ່ງໄດ້ແຈ້ງໃຫ້ຊາບກ່ຽວກັບຜົນສຳເລັດຂອງກອງປະຊຸມໃຫຍ່ຄັ້ງທີ 18 ຂອງພັກຄອມມູນິດຈີນ,ບົດຮຽນການກໍ່ສ້າງຕົວເມືອງນ້ອຍແລະການພັດທະນາເສດຖະກິດຂັ້ນເມືອງຂອງຈີນ, ບົດຮຽນຂອງພັກຄອມມູນິດຈີນໃນການກໍ່ສ້າງພັກຂັ້ນຮາກຖານ, ການເສີມຂະຫຍາຍປະຊາທິປະໄຕແບບປຶກສາຫາລືພາຍໃນພັກ, ບັນຫາພົ້ນເດັ່ນໃນສາກົນແລະພາກພື້ນໃນປະຈຸບັນ.
ການຢ້ຽມຢາມແລະປາຖະກະຖາຂອງຄະນະຜູ້ຊ່ຽວຊານປາຖະກະຖາຂອງສູນກາງພັກຄອມມູນິດຈີນໃນຄັ້ງນີ້ເປັນການປະກອບສ່ວນເຂົ້າໃນການສົ່ງເສີມການແລກປ່ຽນບົດຮຽນທາງດ້ານຕ່າງໆຂອງສອງພັກສອງລັດ, ທັງເປັນການປະກອບສ່ວນອັນສຳຄັນເຂົ້າໃນການຮັດແໜ້ນສາຍພົວພັນມິດຕະພາບອັນເປັນມູນເຊື້ອແລະການຮ່ວມມືລະຫວ່າງສອງພັກສອງລັດແລະປະຊາຊົນສອງຊາດລາວຈີນໃຫ້ນັບມື້ຂະຫຍາຍຕົວຍິ່ງໆຂຶ້ນ.
