ສະຫາຍເຈືອງ ສົມບູນຂັນ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນພັກຄອມມູນິດຈີນ
ຕອນບ່າຍວັນທີ23ເມສາ2013ນີ້, ທີ່ສຳນັກງານຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ, ສະຫາຍເຈືອງ ສົມບູນຂັນ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກໄດ້ຕ້ອນຮັບການເຂົ້າຢ້ຽມຂ່ຳນັບຂອງຄະນະ ຊ່ຽວຊານປາຖະກະຖາສູນກາງພັກຄອມມູນິດຈີນນຳໂດຍສະຫາຍກາວຢົງຈົງ, ຮອງຫົວໜ້າຫ້ອງການຄົ້ນຄວ້າປະຫວັດສາດພັກສູນກາງພັກຄອມມູນິດຈີນພ້ອມຄະນະທີ່ມາຢ້ຽມຢາມແລະເຮັດວຽກຢູ່ລາວແຕ່ວັນທີ21ຫາວັນທີ24ເມສານີ້.
ສະຫາຍເຈືອງ ສົມບູນຂັນໄດ້ຕີລາຄາສູງແລະສະແດງຄວາມຊົມເຊີຍຕໍ່ການມາຢ້ຽມຢາມເຮັດວຽກຢູ່ລາວຂອງຄະນະ, ໂດຍສະເພາະຜົນສຳເລັດໃນການຈັດປາຖະກະຖາໃຫ້ການນຳແລະພະນັກງານວິຊາການລະດັບສູງຈາກພາກສ່ວນຕ່າງໆຂອງລາວ, ການມາຢ້ຽມຢາມຄັ້ງນີ້ໄດ້ເປັນການປະກອບສ່ວນອັນສຳຄັນເຂົ້າໃນການຮັດແໜ້ນສາຍພົວພັນມິດຕະພາບອັນເປັນມູນເຊື້ອແລະການຮ່ວມມືລະຫວ່າງສອງພັກສອງລັດແລະປະຊາຊົນສອງຊາດລາວຈີນ.ສະຫາຍໄດ້ແຈ້ງໂດຍຫຍໍ້ສະພາບການເດັ່ນຂອງລາວໃຫ້ຄະນະຊາບ, ຕີລາຄາສູງຕໍ່ການພົວພັນຮ່ວມມືລະຫວ່າງສອງຝ່າຍແລະສະແດງຄວາມຂອບໃຈຢ່າງຈິງໃຈຕໍ່ພັກ, ລັດຖະບານແລະປະຊາຊົນຈີນທີ່ໄດ້ໃຫ້ການສະໜັບສະໜູນແລະຊ່ວຍເຫຼືອຢ່າງໃຫຍ່ຫຼວງຕໍ່ພາລະກິດປະຕິວັດຂອງລາວໃນເມື່ອກ່ອນກໍ່ຄືປະຈຸບັນ.
ສະຫາຍກາວຢົງຈົງໄດ້ແຈ້ງໃຫ້ສະຫາຍເຈືອງ ສົມບູນຂັນຊາບໂດຍຫຍໍ້ກ່ຽວກັບຜົນສຳເລັດຂອງການປາຖະກະຖາແລະການພົວປະແລກປ່ຽນກັບພະນັກງງານລາວທີ່ເຄີຍໄປຝຶກອົບຮົມທິດສະດີການເມືອງຢູ່ຈີນ, ເຊິ່ງທັງໝົດນີ້ລ້ວນແຕ່ໄດ້ເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ, ການຮ່ວມມືຖານຄູ່ຮ່ວມມືຍຸດທະສາດຮອບດ້ານລະຫວ່າງສອງພັກ, ສອງລັດແລະປະຊາຊົນສອງຊາດຈີນລາວ.
ໃນໂອກາດການມາຢ້ຽມຢາມລາວຂອງຄະນະຄັ້ງນີ້, ແຕ່ວັນທີ22ຫາວັນທີ23ເມສານີ້,ຄະນະຊ່ຽວຊານຈີນໄດ້ກ່າວປາຖະກະຖາໃຫ້ການນຳພັກ, ລັດແລະພະນັກງານວິຊາການລະດັບສູງຂອງລາວ, ເຊິ່ງໄດ້ແຈ້ງໃຫ້ຊາບກ່ຽວກັບຜົນສຳເລັດຂອງກອງປະຊຸມໃຫຍ່ຄັ້ງທີ18ຂອງພັກຄອມມູນິດຈີນ, ບົດຮຽນການກໍ່ສ້າງຕົວເມືອງນ້ອຍແລະການພັດທະນາເສດຖະກິດຂັ້ນເມືອງຂອງຈີນ, ບົດຮຽນຂອງພັກຄອມມູນິດຈີນໃນການກໍ່ສ້າງພັກຂັ້ນຮາກຖານ, ການເສີມຂະຫຍາຍປະຊາທິປະໄຕ, ບັນຫາພາກພື້ນແລະສາກົນທີ່ສອງຝ່າຍມີຄວາມສົນໃຈ.
