ປຶກສາຫາລືການຮ່ວມມືດ້ານວຽກງານການປ້ອງກັນໃນກອງປະຊຸມລັດຖະມົນຕີກະຊວງປ້ອງກັນປະເທດຈີນ-ອາຊຽນ
ວັນທີ 7 ພຶດສະພານີ້, ທ່ານສາງວ້ານຊວນ, ທີ່ປຶກສາແຫ່ງລັດ ທັງເປັນລັດຖະມົນຕີວ່າການກະຊວງປ້ອງກັນປະເທດຈີນ ທີ່ພວມເຄື່ອນໄຫວຢ້ຽມຢາມບຼູໄນ ໄດ້ເຂົ້າຮ່ວມກອງປະຊຸມລັດຖະມົນຕີກະຊວງປ້ອງກັນປະເທດຈີນ-ອາຊຽນຄັ້ງທີ 3. ກອງປະຊຸມລັດຖະມົນຕີກະຊວງປ້ອງກັນປະເທດຂອງອາຊຽນເທື່ອນີ້ໄດ້ສຸມໃສ່ວຽກງານການຮ່ວມມືດ້ານການປ້ອງກັນລະຫວ່າງບັນດາປະເທດອາຊຽນ ເພື່ອເຂົ້າກັບການສ້າງປະຊາຄົມອາຊຽນໃຫ້ສຳເລັດໃນປີ 2015. ແຕ່ຄວາມຈິງແລ້ວ ເລື່ອງທີ່ໄດ້ຮັບຄວາມສົນໃຈທີ່ສຸດຈາກພາຍນອກແມ່ນ ລັດຖະມົນຕີວ່າການກະຊວງປ້ອງກັນປະເທດຂອງບັນດາປະເທດຢ້ຳຄືນວ່າການ ຈັດຕັ້ງປະຕິບັດ "ກົດບັດແຫ່ງການປະພຶດຂອງບັນດາຝ່າຍໃນທະເລຈີນໃຕ້" ໂດຍໄວມີຜົນດີຕໍ່ການປົກປັກຮັກສາສັນຕິພາບແລະສະຖຽນລະພາບຂອງເຂດທະເລຈີນໃຕ້. ຈີນແລະບັນດາປະເທດອາຊຽນລ້ວນແຕ່ຮັບຮູ້ວ່າ "ກົດບັດແຫ່ງການປະພຶດຂອງບັນດາຝ່າຍໃນທະເລຈີນໃຕ້" ແມ່ນຊ່ອງທາງທີມີປະສິດທິຜົນໃນການແກ້ໄຂບັນຫາທະເລຈີນໃຕ້ ແລະ ຈະດຳເນີນການປຶກສາຫາລືຢ່າງຕັ້ງໜ້າ. ເຖິງວ່າຫວ່າງບໍ່ດົນມານີ້ ຟິລິບປິນໄດ້ຍື່ນບັນຫາຄວາມຂັດແຍ່ງດ້ານອະທິປະໄຕເໜືອເຂດທະເລຈີນໃຕ້ໃຫ້ສານທະເລສາກົນເພື່ອທຳການຕັດສິນກໍຕາມ, ແຕ່ການກະທຳຂອງຟິລິບປິນຖືກສື່ມວນຊົນຂອງປະເທດອາຊຽນເຫັນວ່າແມ່ນການກະທຳທີ່ເຮັດໃຫ້ບັນຫາສັບສົນເຂົ້າ.
ໃນກອງປະຊຸມຕ່າງໆຂອງລັດຖະມົນຕີວ່າການກະຊວງປ້ອງກັນປະເທດອາຊຽນເທື່ອນີ້, ຈີນແລະອາຊຽນໄດ້ມີຄວາມຮັບຮູ້ຄືກັນໃນດ້ານວຽກງານການປ້ອງກັນແລະການສ້າງຄວາມໄວ້ເນື້ອເຊື່ອໃຈເຊິ່ງກັນແລະກັນດ້ານການທະຫານລະຫວ່າງສອງຝ່າຍ, ໃນນັ້ນຈຸດສຳຄັນທີ່ສຸດແມ່ນບັນດາປະເທດລ້ວນແຕ່ສະແດງການສະໜັບສະໜູນຕໍ່ການດຳເນີນການຝຶກຊ້ອມຮ່ວມລະຫວ່າງຫຼາຍຝ່າຍທັງສອງຄັ້ງເຊິ່ງແມ່ນອາຊຽນເປັນແກນນຳ ທີ່ຈະຈັດຂຶ້ນໃນເດືອນມິຖຸນາໜ້ານີ້. ວັນທີ 16 ມິຖຸນາໜ້ານີ້, ສິງກະໂປແລະບຼູໄນຈະຮ່ວມກັນຈັດການຝຶກຊ້ອມການຊ່ວຍເຫຼືອດ້ານມະນຸດສະທຳແລະການກູ້ໄພອາຊຽນຄັ້ງທີ 2 ເຊິ່ງມີບັນດາປະເທດອາຊຽນເຂົ້າຮ່ວມ. ແຕ່ວັນທີ 17-20 ມິຖຸນາໜ້ານີ້, ອາຊຽນຍັງຈະຮ່ວມກັບ 8 ປະເທດຄູ່ເຈລະຈາ ຄື: ອາເມລິກາ, ຈີນ, ຣັດເຊຍ, ອິນເດຍ, ຍີ່ປຸ່ນ, ອົສຕຣາລີ, ນູແວນເຊລັງ ແລະ ສ.ເກົາຫຼີ ຈັດການຝຶກຊ້ອມຮ່ວມດ້ານການຊ່ວຍເຫຼືອມະນຸດສະທຳ, ການສົງເຄາະແລະກູ້ໄພ ແລະ ການແພດທາງການທະຫານ, ເພື່ອສ້າງຄວາມໄວ້ເນື້ອເຊື່ອໃຈກັນແລະຍົກສູງຄວາມສາມາດທີ່ກ່ຽວຂ້ອງ.
ໃນຫຼາຍປີມານີ້, ຄຽງຄູ່ກັບເສດຖະກິດຂອງປະເທດອາຊຽນໄດ້ພັດທະນາເຕີບໂຕຂຶ້ນ ແລະ ມີຄວາມຕ້ອງການໃນການຫັນປ່ຽນອາວຸດຍຸດໂທປະກອນລຸ້ນໃໝ່ທີ່ທັນສະໄໝ, ລະຫວ່າງຈີນກັບອາຊຽນກໍມີການຮ່ວມມືລະດັບສູງນັບມື້ນັບຫຼາຍ, ໃນງານວາງສະແດງການປ້ອງກັນແລະຄວາມໝັ້ນຄົງທີ່ບາງກອກປະເທດໄທປີ 2012 ແລະງານວາງສະແດງການປ້ອງກັນທີ່ລັງກາວີປະເທດມະເລເຊຍປີ 2013, ຈີນໄດ້ວາງສະແດງຮູບຈຳລອງຂອງກຳປັ່ນປ້ອງກັນອຳພາງຕົວ ແລະເຮືອບຸກໂຈມຕີທາງນ້ຳແລະບົກລຸ້ນໃໝ່ ເປັນຄັ້ງທຳອິດ, ນີ້ໄດ້ສະແດງໃຫ້ເຫັນວ່າຈີນເອົາໃຈໃສ່ຕະຫຼາດປ້ອງກັນຂອງອາຊຽນ.
