ທ່ານຫຼີເຄີ້ຊຽງພົບປະຮອງນາຍົກຫວຽດນາມ
ຕາມຂ່າວCRI: ວັນທີ 10 ພຶດສະພານີ້, ຢູ່ຫໍຈີກວາງເກີທຳນຽບຈົງໜານໄຮທີ່ປັກກິ່ງ, ທ່ານຫຼີເຄີ້ຊຽງ ນາຍົກລັດຖະມົນຕີຈີນໄດ້ພົບປະທ່ານຫງວຽນເທນນີນ ຮອງນາຍົກລັດຖະມົນຕີຫວຽດນາມ.
ທ່ານຫຼີເຄີ້ຊຽງກ່າວວ່າ, ຈີນ ກັບ ຫວຽດນາມແມ່ນບ້ານໃກ້ເຮືອນຄຽງທີ່ສຳຄັນ. ສອງປະເທດໄດ້ຮັກສາການຕິດຕໍ່ກັນດ້ານຍຸດທະສາດລະດັບສູງ, ລົງເລິກການຮ່ວມມືທີ່ຕິດແທດຕົວຈິງໃນຂົງເຂດຕ່າງໆ, ແກ້ໄຂຂໍ້ຂັດແຍ່ງຢ່າງເໝາະສົມ, ແມ່ນສອດຄ່ອງກັບຜົນປະໂຫຍດໃຈກາງຂອງປະຊາຊົນສອງຊາດ, ກໍ່ມີຄວາມໝາຍອັນຕັ້ງໜ້າຕໍ່ສະຖຽນລະພາບ ແລະ ການພັດທະນາຂອງພາກພື້ນ.ທ່ານຫຼີເຄີ້ຊຽງຊີ້ອອກວ່າ, ການຂະຫຍາຍໄມຕີຈິດມິດຕະພາບຖານບ້ານໃກ້ເຮືອນຄຽງແມ່ນຄວາມປາຖະໜາຮ່ວມຂອງປະຊາຊົນສອງຊາດ, ນີ້ກໍ່ຕ້ອງການເງື່ອນໄຂ ແລະ ບັນຍາກາດທີ່ດີ. ສອງຝ່າຍຈະຄວບຄຸມ ແລະ ແກ້ໄຂຂໍ້ຂັດແຍ່ງໃນບັນຫາທະເລຈີນໃຕ້, ບໍ່ເຮັດໃຫ້ມັນລົບກວນການຂະຫຍາຍການພົວພັນ ແລະ ການຮ່ວມມືລະຫວ່າງສອງຝ່າຍ.
ທ່ານຫງວຽນເທນນີນກ່າວວ່າ, ພັກ, ລັດຖະບານ ແລະ ປະຊາຊົນຫວຽດນາມສະແດງຄວາມຊົມເຊີຍຕໍ່ຈີນທີ່ໄດ້ຮັບຜົນສຳເລັດອັນໃຫຍ່ຫຼວງ. ຫວຽນນາມຍິນດີຈັດຕັ້ງປະຕິບັດຄວາມຮັບຮູ້ຄືກັນທີ່ໄດ້ກ້າວເຖິງກັນຕົກລົງກັນກັບຈີນນັ້ນໃຫ້ດີ, ເພິ່ມທະວີມິດຕະພາບອັນມີມູນເຊື້ອ, ຊຸກຍູ້ການຮ່ວມມືດ້ານເສດຖະກິດການຄ້າ, ເພິ່ມທະວີການແລກປ່ຽນດ້ານວັດທະນະທຳ, ແກ້ໄຂບັນຫາທະເລຈີນໃຕ້ຢ່າງເໝາະສົມ, ຍົກສູງມິດຕະພາບອັນຮອບດ້ານ ແລະ ການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດໃຫ້ຂຶ້ນສູ່ລະດັບໃໝ່.
