ຜົນການສຳຫຼວດເບື້ອງຕົ້ນສະແດງໃຫ້ເຫັນວ່າ ຟິລິບປິນຂ້າຄົນໂດຍເຈດຕະນາ ເຮືອປະມົງໄຕ້ຫວັນບໍ່ໄດ້ແລ່ນໄປຕຳກຳປັ່ນປ້ອງກັນຂອງຟິລິບປິນ
ແຫຼ່ງຂ່າວຈາກພາກສ່ວນນິຕິກຳແລະການບໍລິຫານຂອງເຈົ້າໜ້າທີ່ໄຕ້ຫວັນຈີນລາຍງານໃນວັນທີ 16 ພຶດສະພານີ້ວ່າ: ຜົນການສຳຫຼວດເບື້ອງຕົ້ນທີ່ປະກາດໃນວັນທີ 15 ພຶດສະພານີ້ສະແດງໃຫ້ເຫັນວ່າ, ຟິລິບປິນຂ້າຄົນໂດຍເຈດຕະນາ.
ການສຳຫຼວດສະແດງໃຫ້ເຫັນວ່າ, ເຮືອປະມົງ "ກວາງຕ້າຊິ່ງ 28" ຂອງໄຕ້ຫວັນຖືກລູກປືນລວມ 45 ນັດ, ລູກປືນເຫຼົ່ານີ້ສ່ວນຫຼາຍໄດ້ຍິງຖືກຫ້ອງຈັກເຮືອ, ເຊິ່ງມີລູກເຮືອ 4 ຄົນທີ່ກຳລັງລີ້ຢູ່ໃຕ້ບ່ອນນັ່ງຂອງຄົນຂັບເຮືອ, ນີ້ໄດ້ຢັ້ງຢືນໃຫ້ເຫັນວ່າເຈົ້າໜ້າທີ່ປະຕິບັດກົດໝາຍຂອງຟິລິບປິນໄດ້ຍິງປືນກວາດໃສ່ລູກເຮືອຂອງເຮືອປະມົງທີ່ບໍ່ປະກອບອາວຸດນັ້ນ, ແມ່ນຂ້າຄົນໂດຍເຈດຕະນາ.
ນອກນີ້, ຂ້າງນອກຂອງເຮືອປະມົງບໍ່ມີຮ່ອງຮອຍຂອງຄວາມເສຍຫາຍຢ່າງຊັດເຈນ ທີ່ສະແດງໃຫ້ເຫັນວ່າເປັນການແລ່ນໄປຕຳກັບກຳປັ່ນປ້ອງກັນຂອງຟິລິບປິນ, ຈຶ່ງສາມາດປະຕິເສດຄວາມອາດເປັນໄປໄດ້ທີ່ວ່າເຮືອປະມົງລຳນີ້ໄດ້ແລ່ນຕຳໃສ່ກຳປັ່ນຂອງຟິລິບປິນ, ແລ້ວຝ່າຍຟິລິບປິນຈຶ່ງຍິງປືນໃສ່ເພື່ອປ້ອງກັນຕົວ. ສ່ວນຂໍ້ມູນຈາກເຄື່ອງບັນທຶກການເດີນເຮືອ ຫຼື VDR ຂອງເຮືອປະມົງ "ກວາງຕ້າຊິ່ງ 28" ໄດ້ສະແດງໃຫ້ເຫັນວ່າ, ສະຖານທີ່ເກີດເຫດແມ່ນຢູ່ບ່ອນເສັ້ນແວງ 122 ອົງສາ 55 ນາທີ 41,37 ລິບດາຕາເວັນອອກ, ເສັ້ນຂະໜານ 19 ອົງສາ 59 ນາທີ 47,27 ລິບດາເໜືອ, ເຮືອປະມົງຂອງໄຕ້ຫວັນບໍ່ໄດ້ເຂົ້າໄປໃນນ່ານທະເລຂອງຟິລິບປິນ.
