ສື່ມວນຊົນອາເມລິກາລາຍງານວ່າ ການພົບປະລະຫວ່າງປະມຸກລັດຈີນ-ອາເມລິກາໃນເດືອນມິຖຸນາໜ້ານີ້ມີຄວາມໝາຍສຳຄັນຫຼາຍ
ຕາມຂ່າວ CRI: ທ່ານສີຈິ້ນຜິງ, ປະທານປະເທດຈີນຈະເດີນທາງໄປຢ້ຽມຢາມອາເມລິກາແລະພົບປະເຈລະຈາກັບທ່ານບາຣັກ ໂອບາມາ, ປະທານາທິບໍດີອາເມລິກາໃນຕົ້ນເດືອນມິຖຸນາໜ້ານີ້. ວັນທີ 20 ພຶດສະພານີ້, ສື່ມວນຊົນຕົ້ນຕໍຂອງອາເມລິກາລ້ວນແຕ່ໄດ້ລາຍງານຂ່າວດັ່ງກ່າວອີງຕາມຖະແຫຼງການຂອງທຳນຽບຂາວ ໂດຍຊີ້ອອກວ່າ ນີ້ຈະແມ່ນຜູ້ນຳສອງປະເທດພົບປະເປັນຄັ້ງທຳອິດພາຍຫຼັງທ່ານສີຈິ້ນຜິງ ຂຶ້ນດຳລົງຕຳແໜ່ງປະທານປະເທດຈີນ ເຊິ່ງເປັນຜູ້ນຳສູງສຸດຂອງຈີນເປັນຕົ້ນມາ, ແລະໃຫ້ຄຳວິເຄາະວ່າ ການພົບປະຄັ້ງນີ້ມີຄວາມໝາຍສຳຄັນຫຼາຍ.
ໜັງສືພິມ "ວອນສະທຣິດລາຍວັນ" ລາຍງານວ່າ: ການພົບປະສຸດຍອດເທື່ອນີ້ຈະເຮັດໃຫ້ຜູ້ນຳສອງປະເທດມີໂອກາດສ້າງການພົວພັນສ່ວນຕົວແບບບໍ່ເປັນທາງການ. ລາຍງານຂ່າວກ່າວວ່າ, ການພົບປະສຸດຍອດຄັ້ງນີ້ຈະມີຂຶ້ນໃນທ່າມກາງບັນຍາກາດແຫ່ງການພົວພັນລະຫວ່າງສອງປະເທດອາເມລິກາ-ຈີນມີຄວາມເຄັ່ງຕຶງ, ສາເຫດລວມທັງອາເມລິກາພວມຈັດວາງຍຸດທະສາດທາງການທະຫານຄືນສູ່ພາກພື້ນອາຊີປາຊີຟິກຄືນໃໝ່, ນອກນີ້, ອາເມລິກາໄດ້ຕຳນິຈີນດຳເນີນການເຄື່ອນໄຫວສອດແນມທາງອິນເຕີເນັດ. ໜັງສືພິມ "ນິວຢອກເທມສ໌" ໄດ້ນຳເອົາຄຳເວົ້າຂອງທ່ານນາງແຄດເທີລິນ ເຮເດນ, ໂຄສົກຄະນະກຳມະການຄວາມໝັ້ນຄົງແຫ່ງຊາດທຳນຽບຂາວອາເມລິກາ ມາລາຍງານວ່າ: ວາລະວ່າວຽກຂອງຈີນແລະອາເມລິກາມີຫຼາຍດ້ານຫຼາຍແນວແລະທັງສັບສົນຫຼາຍ, ລະຫວ່າງສອງຝ່າຍມີຫຼາຍໆຫົວຂໍ້ທີ່ຕ້ອງຄົ້ນຄວ້າແລະປຶກສາຫາລືເພື່ອແກ້ໄຂ. ຂ່າວແຈ້ງວ່າ, ໄລຍະເວລາຂອງການພົບປະເທື່ອນີ້ແມ່ນສຳຄັນຫຼາຍ. ດ້ານໜຶ່ງແມ່ນຫວ່າງບໍ່ດົນມານີ້, ສປປ ເກົາຫຼີໄດ້ເພີ່ມການຂົ່ມຂູ່ແລະເພີ່ມຄວາມແຮງຢ່າງບໍ່ຢຸດຢັ້ງ, ອາເມລິກາຫວັງຢາກໃຫ້ຈີນເສີມຂະຫຍາຍບົດບາດຫຼາຍກວ່າເກົ່າ, ຊຸກຍູ້ໃຫ້ ສປປ ເກົາຫຼີ ເຊິ່ງເປັນປະເທດໃກ້ຄຽງຂອງຈີນທີ່ຖືກໂດດດ່ຽວນັ້ນຄວນລະມັດລະວັງການກະທຳຂອງຕົນ. ອີກດ້ານໜຶ່ງ, ຈີນຊື້ພັນທະບັດຂອງອາເມລິກາມີປະມານ 1250 ຕື້ໂດລາສະຫະລັດ, ເປັນປະເທດທີ່ຊື້ພັນທະບັດຂອງອາເມລິກາຫຼາຍທີ່ສຸດໃນໂລກ, ແຕ່ກວມອັດຕາພັນທະບັດລວມຂອງອາເມລິກາໄດ້ຫຼຸດຈາກ 10% ລົງຮອດ 7% ພາຍໃນບໍ່ເທົ່າໃດປີ, ນີ້ກໍເຮັດໃຫ້ອາເມລິກາຫຼຸດລະດັບຄວາມອີງອາໄສຈີນໜ້ອຍລົງ. ຈາກນີ້ກໍເຫັນໄດ້ວ່າ, ໃນການພົວພັນລະຫວ່າງຈີນ-ອາເມລິກາ ມີການຮ່ວມມືກັນ ແຕ່ກໍມີຄວາມແກ່ງແຍ່ງກັນ.
"ໜັງສືພິມວອນສະທຣິດ" ລາຍວັນ ໄດ້ເປີດເຜີຍວ່າ, ການພົບປະສຸດຍອດເທື່ອນີ້ຈະຈັດຂຶ້ນຢູ່ໃນສວນກະເສດອັນເນນເບິກ ທີ່ຫ່າງຈາກນະຄອນລອສແອງເຈີລິສ 100 ກວ່າກິໂລແມັດ, ສ່ວນນະຄອນລອສແອງເຈີລິສ ແມ່ນຕົວເມືອງທີ່ໃຫຍ່ທີ່ສຸດຢູ່ແຄມຝັ່ງທະເລຕາເວັນຕົກອາເມລິກາ. ເທື່ອນີ້ແມ່ນການພົບປະທີ່ບໍ່ເປັນທາງການ ບໍ່ຕ້ອງໃສ່ຊຸດສາກົນມັດກາລະວັດ, ໃສ່ພຽງແຕ່ເສື້ອເຊີດເທົ່ານັ້ນ, ແລະໃນໄລຍະຈັດການພົບປະເຈລະຈາລະຫວ່າງສອງຝ່າຍ ກໍບໍ່ມີການເຄື່ອນໄຫວກິດຈະກຳຕ່າງໆ, ນີ້ກໍເພື່ອໃຫ້ສອງຝ່າຍມີເວລາຫຼາຍກວ່າເກົ່າໃນການປຶກສາຫາລືບັນຫາຕົວຈິງ. ບົດຂ່າວຂຽນວ່າ: ນີ້ກໍສອດຄ່ອງກັບຈຸດຢືນທີ່ທ່ານປະທານສີຈິ້ນຜິງລິເລີ່ມໃນປະເທດຈີນ ຄື: ຫຼີກເວັ້ນປະກົດການທີ່ເວົ້າແຕ່ບໍ່ເຮັດ ແລະ ຕ້ານປະກົດການຟູມເຟືອຍໃນຄະນະເຈົ້າໜ້າທີ່.
