ເປີດກອງປະຊຸມສົນທະນາລະດັບສູງລະຫວ່າງປະຊາຊົນຈີນ-ອາຊີຕາເວັນອອກສຽງໃຕ້, CRI ຈະຖ່າຍທອດສົດພິທີເປີດກອງປະຊຸມດ້ວຍຫຼາຍພາສາ
ຕາມຂ່າວ CRI: ກອງປະຊຸມສົນທະນາລະດັບສູງລະຫວ່າງປະຊາຊົນຈີນ-ອາຊີຕາເວັນອອກສຽງໃຕ້ ທີ່ດຳເນີນເປັນເວລາສອງວັນ ຈະຈັດຂຶ້ນຢູ່ນະຄອນໜານໜິງ, ເທດສະບານເຂດປົກຄອງຕົນເອງເຜົ່າຈ້ວງກວາງຊີຈີນໃນວັນທີ 3 ມິຖຸນາ. ນັກການເມືອງສຳຄັນ ແລະ ຜູ້ຕາງໜ້າໃນວົງການຕ່າງໆຂອງຈີນ ແລະ ບັນດາປະເທດອາຊີຕາເວັນອອກສຽງໃຕ້, ເຊັ່ນ: ລາວ, ກຳປູເຈຍ, ມຽນມາ, ຟິລິບປິນ, ໄທ, ອິນໂອເນເຊຍ, ຫວຽດນາມ, ມະເລເຊຍ, ສິງກະໂປ, ບຼຸໄນ ແລະ ຕີມໍເລັສເຕ ຈະເຂົ້າຮ່ວມ.
ຫົວຂໍ້ຂອງກອງປະຊຸມເທື່ອນີ້ແມ່ນ "ສັນຕິພາບຊຸກຍູ້ການພັດທະນາ, ການຮ່ວມມືເພື່ອຕ່າງຝ່າຍຕ່າງມີຜົນປະໂຫຍດ--ສຽງຮ່ວມໃນດວງໃຈ ແລະ ຄວາມຝັນຮ່ວມຂອງປະຊາຊົນຈີນແລະປະຊາຊົນປະເທດອາຊີຕາເວັນອອກສຽງໃຕ້". ອີງຕາມວາລະຂອງກອງປະຊຸມ, ຜູ້ແທນບັນດາທ່ານຈະປຶກສາຫາລືກັນໂດຍປິ່ນອ້ອມສອງຫົວຂໍ້, ຄື: "ເຕົ້າໂຮມຄວາມເຫັນຂອງປະຊາຊົນ, ຊຸກຍູ້ການພົວພັນລະຫວ່າງຈີນ-ອາຊຽນໃຫ້ມີຄວາມຄືບໜ້າໃໝ່", "ມາດຕະການໃໝ່ໃນການຮ່ວມມືທີ່ແທ້ຈິງ", ແລະຍັງຈະດຳເນີນການສົນທະນາໂດຍສະເພາະ ໂດຍປິ່ນອ້ອມຫົວຂໍ້ "ລັດຖະບານແລະປະຊາຊົນເກາະແຂນກັນ-ກ້ອນກຳລັງທີ່ຊຸກຍູ້ສັນຕິພາບແລະການພັດທະນາຂອງພາກພື້ນ".
ຮອດເວລານັ້ນ, ວິທະຍຸສາກົນແຫ່ງປະເທດຈີນ ຫຼື CRI ຈະຖ່າຍທອດສົດພິທີເປີດປະຊຸມໂດຍຜ່ານທາງອິນເຕີເນັດ. ຍິນດີຕ້ອນຮັບທຸກໆທ່ານເຂົ້າສູ່ເວັບໄຊ laos.cri.cn ເພື່ອຕິດຕາມຮັບຟັງການຖ່າຍທອດສົດຂອງພວກເຮົາໃນເວລາ 9 ໂມງ ຂອງວັນທີ 3 ມິຖຸນາທີ່ຈະມາເຖິງ.
ນອກນີ້, ເວັບໄຊພາສາອັງກິດ, ພາສາອິນໂດເນເຊຍ, ພາສາກຳປູເຈຍ, ພາສາໄທ, ພາສາມະເລເຊຍ, ພາສາຫວຽດນາມ, ພາສາມຽນມາ, ພາສາຟິລິບປິນ ແລະ ວິທະຍຸລະບົບ FM ຢູ່ປະເທດຕ່າງໆຂອງ CRI ກໍຈະມີການຖ່າຍທອດສົດເຊັ່ນດຽວກັນ.
